Gon kwaꞌn mizaꞌ tu unaꞌ ngut xmiyiꞌ
21
Dub nzo Jesús lo luwe cheꞌn yadoꞌ kun rë men cheꞌn Me,
lëꞌchi ngulits Me lo Me,
une Me xmod kizaꞌ rë men rrik gon,
kila bixaꞌi leꞌn alkansí cheꞌn yadoꞌ,
San Lucas 21:1-28
2 no nu une Jesús tu unaꞌ ngut xmiyiꞌ,
no prob unaꞌ;
mila unaꞌ chop tsa dimi win kwaꞌn dox cheꞌp tsak leꞌn alkansí zeꞌ,
3 orzeꞌ nzhab Jesús lo rë men cheꞌn Me:
―Walika kwaꞌn nin lo go,
más kwaꞌn mizaꞌ unaꞌ baꞌ ke más rë men baꞌ,
4 porke rë xaꞌ baꞌ,
kwaꞌn miaꞌn sobr lo xaꞌ,
mizaꞌ bixaꞌ gon,
per unaꞌ reꞌse,
dub niyente nizak unaꞌ,
mizaꞌ unaꞌ gon,
rë tsa dimi kwaꞌn kinu unaꞌ par gao unaꞌ.
Midiꞌzh Jesús, lëꞌ yadoꞌ bil
5 No pla rë men cheꞌn Jesús,
kidiꞌzh bixaꞌ xmod ngokxaoꞌ yadoꞌ,
no tatu chul rë ke nzho taꞌi,
no rë dimi kwaꞌn ngoknu men,
par miluꞌi chul,
orzeꞌ nzhab Jesús:
6 ―Lëꞌ tu zhë zhin,
lëꞌ rë nak kwaꞌn kiwiꞌ go lo rë,
ley bil;
ni tu ke kwaꞌn nakxaoꞌwe,
yaꞌnte tich weche.
Rë kureꞌ gak antis di lox yizhyuo
7 Orzeꞌ minabdiꞌzh bixaꞌ,
nzhab bixaꞌ:
―Maestr,
¿pok gak rë kureꞌ?
No,
¿xmod luꞌ rë zhë mizhin la gak rë kureꞌ?
8 Orzeꞌ nzhab Jesús:
―Biwiꞌ go par yent cho kide go,
porke nayax men yiꞌd,
ded bixaꞌ nela da gaꞌ,
diꞌzh bixaꞌ lo men:
“Na nak Krist”;
mbaino nu diꞌzh bixaꞌ:
“Mizhin gaxla zhë lox yizhyuo”,
per nayilat go bixaꞌ.
9 No or gon go kidil rë gobier,
kun tsaꞌ gubier bixaꞌ,
no or kidil men kun mis gubier cheꞌn bixaꞌ,
nazhebt go kwaꞌn dox;
porke rë kureꞌ galo laka gak,
per jwaltraꞌ lox yizhyuo.
10 No nzhab Jesús:
―Lëꞌ tu lazh men dil kun xtu lazh men,
no tu gubier dil kun xtu gubier,
11 no dox rë xo ro win nayax plo,
rë zhë zeꞌ,
no yo yalwin no yalyizh;
mbaino lo yibëꞌ luꞌ rë kwaꞌn nazheꞌb,
no rë señ nazheꞌb dox.
12 ’No antis di ke gak rë kureꞌ,
lëꞌ men zen go par zakzi bixaꞌ go,
no chi bixaꞌ go lo rë xaꞌ nileꞌ mandad leꞌn yoꞌ plo nitseꞌd men widiꞌzh cheꞌn Dios;
no ko bixaꞌ go lizhyiꞌb;
no haxta chi xaꞌ go lo rë xaꞌ más nileꞌ mandad,
haxta lo rë rey no lo rë gobiernador,
por nak go men da,
13 nes par zaꞌ diꞌzh go xtizha lo rë men.
14 Kuzeꞌ,
naleꞌt go xigab kwan diꞌzh go lo bixaꞌ,
15 porke na gane xigab kaꞌ go,
par xmod kab go lo bixaꞌ;
mbaino ni tu bixaꞌ gakt kab lo kwaꞌn diꞌzh go lo bixaꞌ.
16 Per go,
haxta rë xuz go,
no rë xnaꞌ go no rë wech go,
mbaino rë melizh go,
no rë xaꞌ nichëꞌl go;
mis rë xaꞌ reꞌ chi go lo rë men,
par gut bixaꞌ pla go;
17 no rë nak men yiꞌ neꞌ go por nak go men da;
18 no ter zak go rë kureꞌ,
per Dios kina ka go.
19 Por ñila go da dub kizak go rë kureꞌ,
kuzeꞌ leꞌ go ban par dubtaꞌ lo Dios.
20 ’Or ne go,
nakaꞌn roꞌ yezh Jerusalén nzhin sondad,
nane la go mizhin la loxe,
21 orzeꞌ lëꞌ rë men Judea,
ñal yukaꞌch bixaꞌ leꞌn rë mont,
no rë xaꞌ nzho yezh Jerusalén,
ñal roꞌ bixaꞌ;
no rë xaꞌ nzhin dan,
ñal nayëktraꞌ bixaꞌ lizh bixaꞌ,
22 porke zhë reꞌ,
gak zhë kwaꞌn gab Dios xmod gak kun rë men Israel,
par gak rë kwaꞌn nzobniꞌ lo ley cheꞌn Muisés mbaino rë kwaꞌn mikëꞌ rë xaꞌ midiꞌzh por Dios chi tiemp.
23 ¡Zheꞌb nalats,
nzha rë unaꞌ xaꞌ nak xin rë zhë zeꞌ,
no rë unaꞌ xaꞌ nakaꞌ mëꞌd orzeꞌ,
porke dox nazheꞌb kwaꞌn yiꞌd yizhyuo rë zhë reꞌ;
no rë men yezh reꞌ,
dox kwaꞌn nazheꞌb ne bixaꞌ!
24 No gat bixaꞌ kun spad,
no más bixaꞌ weiꞌ men,
par gak bixaꞌ mos nado lo xtu men,
lo más rë lazh men;
no yezh Jerusalén,
rë men xaꞌ gat lëꞌt men Israel,
gak cheꞌne mbaino leꞌ mandade,
per lëꞌ zhë zhin,
nagaktraꞌi cheꞌn bixaꞌ,
mbaino naleꞌtraꞌ xaꞌ mandade.
Or yubre Xgaꞌn Dios xtu wëlt
25 No nzhab Jesús:
―No yo nayax señ lo ngubizh,
no lo mbëoꞌ,
no lo rë mbël.
Mbaino lo yizhyuo,
rë lazh men yo yalnazheꞌb,
net men kwan leꞌ men por dox naye nibezh nitsdoꞌ kiyite.
26 Lëꞌ rë men teꞌdyëꞌl por tanta zheꞌb,
por rë kwaꞌn gak yizhyuo reꞌ;
porke haxta rë kwaꞌn nzen rë kwaꞌn nzho lo yibëꞌ,
lëꞌi roꞌ xlugare.
27 Orzeꞌ rë men yizhyuo ne,
lëꞌ Xgaꞌn Dios xaꞌ nak ska tu men yizhyuo yiꞌd leꞌn tu xkao,
mbaino kun biani kwaꞌn nizini nayiꞌ dox,
no dox kinu Me jwers par lëꞌ Me mandad no par leꞌ Me rë kwaꞌn,
kwaꞌn niyent cho gak leꞌ.
28 Or zublo gak rë kureꞌ,
list guzo go,
gulits go lo go lo yibëꞌ,
porke ya nzhazhin la,
roꞌ go lo rë kwaꞌn nazheꞌb,
mbaino ban go kun lëꞌ Me.
29 No midiꞌzh Jesús kwent reꞌ:
―Biwiꞌ go lo ya nzhaoꞌ,
no lo más rë ya;
San Lucas 21:29-38
30 or ne go nzhaxichla rë rram cheꞌne,
lëꞌ go nizaꞌ kwent,
lëꞌ mbëoꞌ nëiꞌ nzhazhin la;
31 no seꞌgaꞌ,
or ne go,
kiyak rë kureꞌ;
nane la go,
nzhazhin la zhë,
leꞌ Dios mandad dub yizhyuo.
32 ’Walika kwaꞌn nin lo go,
rë kureꞌ gak antis dike gat rë men xaꞌ nzho orzeꞌ.
33 Yibëꞌ no yizhyuo lëꞌi lox;
per rë kwaꞌn nidizha,
rëi lëꞌi zhin gak.
34 ’Bikina go go,
nalaꞌt go yo rë xigab laxtoꞌ go,
kwaꞌn leꞌ weiꞌ go lo rë kwaꞌn nzhakla kwerp cheꞌn go,
no lo rë xigab ña-ñëꞌd yek go,
xmod paꞌ leꞌ go yizhyuo reꞌ,
no di repent zhin zhë nazheꞌb reꞌ lo go,
35 porke zhë reꞌ zhin ¡di!
lo rë nak men nzhin yizhyuo,
nela or nizen tramp mizin gaꞌ,
yagaꞌ men loi.
36 Kuzeꞌ list guzou biwiꞌu,
no gunaꞌb go zilitaꞌ lo Dios,
par leꞌ go gan lo rë kwaꞌn nazheꞌb yiꞌd yizhyuo reꞌ,
mbaino par yent kwan zheb go,
or zhin go lo Xgaꞌn Dios,
Me nu nak tu men yizhyuo.