Kwent cheꞌn tu jwandang
22
Xtu kwent midiꞌzh Jesús,
nzhab Me:
2 ―Plo nileꞌ Dios mandad nak nela tu rey xaꞌ mileꞌ jwandang cheꞌn xgaꞌn,
3 mixëꞌl xaꞌ rë mos cheꞌn xaꞌ ngwane lo men par yiꞌd bixaꞌ jwandang;
per net bixaꞌ ngayiꞌd bixaꞌ.
4 Orzeꞌ xtu wëlt mixëꞌl rey zeꞌ xtu ben mos cheꞌn xaꞌ par ngwayab:
“Dëꞌ go,
lëꞌ kwaꞌn gao be nzhin la;
lëꞌda mbit la rë ngoꞌn da kun rë ma más nachaꞌ,
rëi nzhin la;
kuzeꞌ,
dëꞌ go leꞌ be lani.”
5 Per mileꞌ bixaꞌ nayaꞌ;
nzho bixaꞌ ngwa zhiꞌn lo yuo cheꞌn,
no nzho bixaꞌ ngwa xbiꞌ,
6 no más bixaꞌ nguzen rë mos cheꞌn rey,
ndin bixaꞌ haxta mbit bixaꞌ rë mos zeꞌ.
7 Orzeꞌ niyiꞌ rey no mixëꞌl rey rë sondad cheꞌn xaꞌ par ngwayut rë xaꞌ nzhut men zeꞌ,
no haxta lazh rë men nakap zeꞌ mizëꞌk bixaꞌ.
8 Lult nzhab rey lo rë mos cheꞌn:
“Lëꞌ rëi nzhin la par leꞌ be jwandang,
per rë men xaꞌ nak diꞌzh ngayiꞌd,
gat ñalt bixaꞌ kureꞌ;
9 nalse wa go rë nez,
wakaꞌo cho la rë men yazhëꞌl go par yiꞌd bixaꞌ jwandang.”
10 Orzeꞌ ngwa rë mos cheꞌn rey,
rë nez mikan bixaꞌ dike men ngwazhëꞌl bixaꞌ,
men wene o men nakape,
haxta ngwazhë plo nzhin bixaꞌ kileꞌ bixaꞌ jwandang.
11 Per or nguio rey par ne xaꞌ rë men nzhin lo mes,
no une xaꞌ tu men nzob zeꞌ,
no gat nakt xaꞌ lar kwaꞌn nzhak men lo jwandang,
12 orzeꞌ nzhab xaꞌ lo men zeꞌ:
“Lëꞌ mbeꞌ,
¿chi niye laxtoꞌl nzol reꞌ,
ter gat naktal lar kwaꞌn ñal gak men lo jwandang?”
Per yent kwan ngab xaꞌ reꞌ lo rey.
13 Orzeꞌ nzhab rey lo rë mos cheꞌn xaꞌ:
“Biliꞌb go yaꞌ xaꞌ no niꞌ xaꞌ,
no guloꞌ go xaꞌ tich lo nakao,
plo goꞌn xaꞌ haxta kwezh lëi xaꞌ lo yalne”,
14 porke nayax men nibezh Dios par gak men cheꞌn Me,
per cheꞌptsa men nileꞌ kwaꞌn nzhakla Me.
Nzhab Jesús, ñal kix men dimi cheꞌn rey César
15 Or milox midiꞌzh Jesús kureꞌ,
nguiubchi rë men fariseo plo nzo Jesús par miaꞌn bixaꞌ diꞌzh,
leꞌ bixaꞌ gab Me tu kwaꞌn gat lëꞌ,
16 kuzeꞌ tutsa mixëꞌl bixaꞌ pla men cheꞌn bixaꞌ kun pla men cheꞌn Herodes par nzhab rë xaꞌ reꞌ kureꞌ lo Jesús:
―Maestr,
nane no,
lëꞌtsa lëꞌ kwaꞌn nidiꞌzhal,
no dox nzhakal niluꞌl xmod nak nez cheꞌn Dios;
mbaino or nigobeꞌl tu kwaꞌn,
gat nibetal men.
17 Nal bine lo no,
¿xmod nak xigab cheꞌnal?
¿Chi ñal kix no dimi kwaꞌn nzhax lo rey César,
o gat ñalt gaxe?
18 Per lëꞌ Jesús nane la xmod nak xigab cheꞌn bixaꞌ,
kuzeꞌ nzhab Jesús:
―¡Mbël gox,
chigab walika men wen go!
¿Chon nzhakla go zenbeꞌ go da?
(wiꞌ go xmod nak da)
19 Biluꞌ go tu pes kwaꞌn nzhax lo rey César.
―¿Cho nikë lo pes reꞌ,
no cho lë nikë loi?
21 Orzeꞌ nzhab bixaꞌ:
―César nikë loi.
Orzeꞌ mikab Jesús:
―Ne goix,
bizaꞌ go cheꞌn César kwaꞌn nak cheꞌn César,
no bizaꞌ go cheꞌn Dios kwaꞌn nak cheꞌn Dios.
22 Or mbin bixaꞌ kureꞌ,
xe miaꞌn bixaꞌ tuli,
net bixaꞌ kwan leꞌ bixaꞌ,
orzeꞌ milaꞌ bixaꞌ Jesús,
ña bixaꞌ.
Midiꞌzh Jesús, lëꞌ men ruban
23 Mis zhë zeꞌ,
ngwa pla men saduceo lo Jesús,
rë xaꞌ nidiꞌzh:
“Gat walit ruban men ngut”,
24 orzeꞌ nzhab bixaꞌ:
―Maestr,
lëꞌ Muisés milaꞌ diꞌzh lo no:
“Chi lëꞌ tu miyiꞌ gat,
no nangapt xaꞌ mëꞌd kun unaꞌ cheꞌn xaꞌ,
orzeꞌ lëꞌ wech xaꞌ nakiꞌn ban kun lëꞌ unaꞌ par gap xaꞌ mëꞌd por kwent cheꞌn xaꞌ ngut reꞌ.”
25 Mbaino nguio tu xaꞌ xid no,
ngop gazh wech;
xaꞌ galo ngop tu unaꞌ,
per ngut xaꞌ no nangapt xaꞌ mëꞌd;
orzeꞌ wech mirop xaꞌ miban kun lëꞌ unaꞌ,
26 per nu ska xaꞌ reꞌ ngut no nangapt ska xaꞌ mëꞌd kun lëꞌ unaꞌ;
no seꞌska kun xaꞌ mion,
haxta kun za gazh xaꞌ,
rë xaꞌ ngut,
ni tu xaꞌ nangapt mëꞌd;
27 no lult,
nu unaꞌ ngut.
28 Or ruban bixaꞌ,
¿cho xaꞌ yaꞌn kun lëꞌ unaꞌ?,
porke za gazh xaꞌ miban kun lëꞌ unaꞌ.
29 Orzeꞌ mikab Jesús:
―Men migoch yek go,
kuzeꞌ nagakt zobyek go rë kwaꞌn nzobniꞌ lo Yech cheꞌn Dios;
no ni yalnazhon cheꞌn Dios nanet go kwan.
30 Or ruban men,
yentraꞌ cho ban kun unaꞌ,
no ni yentraꞌ cho zaꞌ xchaꞌp ban kun miyiꞌ;
porke lëꞌ bixaꞌ gak nela rë ganj cheꞌn Dios,
Me nzho lo yibëꞌ.
31 No por kwaꞌn ruban men ngut,
¿chi nagat goꞌl go kwan midiꞌzh mis Dios or midiꞌzh Me seꞌ:
32 “Na nak Dios cheꞌn Abraham,
no Dios cheꞌn Isaac,
no Dios cheꞌn Jakob”?
Porke Dios,
gat lëꞌt Dios cheꞌn rë mengute,
lëꞌ Dios nak Dios cheꞌn rë men naban.
33 Or mbin rë men nzhin zeꞌ kureꞌ,
xe miaꞌn bixaꞌ por rë widiꞌzh kwaꞌn miluꞌ Jesús.
Kwaꞌn más nakiꞌn leꞌ men
34 Or mbin rë men fariseo,
lëꞌ Jesús mitsaoꞌ roꞌ rë men saduceo zeꞌ,
orzeꞌ migan bixaꞌ lo Jesús,
35 no xid rë xaꞌ reꞌ,
tu xaꞌ niluꞌ ley minaꞌbdiꞌzh kureꞌ lo Jesús par zenbeꞌ xaꞌ Me:
36 ―Maestr,
¿kwan más nakiꞌn leꞌ men xid rë kwaꞌn nzobniꞌ lo ley?
37 Nkab Jesús:
―“Bichizhiꞌ Señor Dios cheꞌnal kun dub laxtoꞌl,
kun dub lal,
mbaino kun rë xigab cheꞌnal.”
38 Kureꞌ kwaꞌn más nakiꞌn leꞌ men galo laka lo rëi;
39 No kwaꞌn rop kwaꞌn nakiꞌn leꞌ men nak kureꞌ:
“Bichizhiꞌ xtu men,
nela lu ka.”
40 Rop gaka kureꞌ más kwaꞌro xid rë kwaꞌn nzobniꞌ lo ley,
mbaino xid rë kwaꞌn midiꞌzh rë profet,
xaꞌ midiꞌzh por Dios.
¿Cho Xuz Krist?
―¿Xmod nileꞌ go xigab,
plo nzë Krist?
¿Cho Xuz Krist?
Nkab bixaꞌ:
―Dabi nzhak xuz Krist.
43 Per nzhab Me:
―¿Chon midiꞌzh Dabi,
por Sprit cheꞌn Dios,
or nzhab xaꞌ:
“Lëꞌ Krist,
Me nileꞌ mandad da”,
porke yub Dabi nzhab:
44 Lëꞌ Dios nzhab lo Me nileꞌ mandad da:
“Guzob taꞌn lad direch haxta or len,
cheꞌptsa (biꞌch laka) gak rë xaꞌ nidilal,
xan niꞌl”?
45 Chi yub Dabi nzhab:
“Krist Me nileꞌ mandad da”,
orzeꞌ,
¿xmod gak Dabi Xuz Krist?
46 No ni tu bixaꞌ nangakt ngakab ni tu widiꞌzh lo Jesús,
no dizde orzeꞌ,
yent raꞌ cho ngaye laxtoꞌ nganaꞌbdiꞌzh más kwaꞌn lo Jesús.