2 Orzeꞌ nguzubi pla men fariseo minabdiꞌzh bixaꞌ lo Jesús par zenbeꞌ bixaꞌ Me (wiꞌ bixaꞌ xmod nak Me),

nzhab bixaꞌ:

―¿Chi zak lëꞌ tu miyiꞌ kun tsaꞌ xaꞌ,

lo ley kwaꞌn milaꞌ Dios lo Muisés?

3 Orzeꞌ nzhab Jesús:

―¿Kwan mizobniꞌ Muisés lo ley por kubaꞌ?

4 Orzeꞌ nzhab bixaꞌ:

―Lëꞌ Muisés mizobniꞌ;

chi tu miyiꞌ lëꞌ kun tsaꞌ,

orzeꞌ gakxaoꞌ tu yech par yanu unaꞌ,

par gak laꞌ miyiꞌ unaꞌ.

5 Per nzhab Jesús:

―Saꞌ mizobniꞌ Muisés por dox nakap go,

6 per dizde or mizuxkwaꞌ Dios yizhyuo,

seꞌ nzobniꞌ:

“Dios ngulo miyiꞌ no unaꞌ.”

7 No nu nzobniꞌ:

“Por unaꞌ,

lëꞌ miyiꞌ laꞌ xuz no xnaꞌ,

8 par ban xaꞌ tutsa kun tsaꞌ xaꞌ.”

No nu nzhab Jesús:

―No gat lëꞌtraꞌ chop xaꞌ,

lëꞌ xaꞌ ngok tutsa men.

9 Kuzeꞌ,

miyiꞌ xaꞌ mizo Dios tsaꞌ,

nagaktraꞌ lëꞌ xaꞌ kun tsaꞌ xaꞌ.

10 No or ña la rë bixaꞌ leꞌn yoꞌ,

orzeꞌ minaꞌbdiꞌzh rë men cheꞌn Jesús por kwaꞌn midiꞌzh Me reꞌ,

11 orzeꞌ nzhab Me:

―Wanei cho laꞌ nzëꞌb unaꞌ cheꞌn,

no ban xaꞌ kun xtu unaꞌ,

nzëꞌb xki xaꞌ lo Dios por kureꞌ.

12 No chi lëꞌ unaꞌ laꞌ tsaꞌ,

no ban xaꞌ kun xtu miyiꞌ,

nzëꞌb xki ska xaꞌ lo Dios por kureꞌ.

13 Orzeꞌ nzhanu men pla mëꞌd lo Jesús,

par naꞌb Me lo Dios por lëꞌ bimëꞌd;

orzeꞌ ngalaꞌt rë men cheꞌn Me.

14 Per or une Jesús kureꞌ,

miyiꞌ Me,

orzeꞌ nzhab Me:

―Bilaꞌ go zubi mëꞌd lon,

nakaꞌnt go lo bimëꞌd,

porke rë men nak nela rë mëꞌd,

xaꞌ zeꞌ yo plo nileꞌ Dios mandad.

15 No walika kwaꞌn nin,

xaꞌ nagak nela tu mëꞌd gaꞌ,

nagakt yo xaꞌ plo nileꞌ Dios mandad.

16 Orzeꞌ ndeꞌzh Me rë mëꞌd,

no mixoꞌb Me yaꞌ Me yek bimëꞌd,

par mizaꞌ Me yalnazhon cheꞌn Me kaꞌ bimëꞌd.

17 Or mer nzharoꞌ Jesús nez par nzha Me xtu plo,

karre mizhin tu miyiꞌ xi,

nguzuxib lo Jesús,

mbaino minabdiꞌzh miyiꞌ reꞌ:

―Maestr wen,

¿kwan nakiꞌn len par gapa yalnaban dubtaꞌ lo Dios?

―nzhab miyiꞌ.

18 Orzeꞌ nzhab Jesús:

―¿Chon nel,

wen da?

Yent cho wen,

nab tsa Dios wen.

19 Lu nane la rë ley cheꞌn Dios:

“Nagutal men,

nabantal kun unaꞌ cheꞌn men,

no naliwaꞌntal,

nakëꞌtal kixuꞌ men,

no nakidetal men par kaꞌl cheꞌn xaꞌ;

mbaino gop kwent xuzal mbaino xnaꞌl.”

20 Orzeꞌ nzhab miyiꞌ xi reꞌ:

―Maestr,

rë kureꞌ kilen,

dizde win da.

21 Orzeꞌ miwiꞌ Jesús lo miyiꞌ,

michizhiꞌ Me miyiꞌ,

mbaino nzhab Me:

―Xtutsa kwaꞌn jwalt leꞌl:

Bito rë nak kwaꞌn kinul,

orzeꞌ bizaꞌi,

kaꞌ rë men xaꞌ yent kwan nzhap,

nes par gapal rë kwaꞌn dox tsak lo yibëꞌ;

orzeꞌ diꞌkë ticha.

22 Or mbin miyiꞌ reꞌ kureꞌ,

xe miaꞌn xaꞌ tuli di miwin laxtoꞌ xaꞌ,

orzeꞌ dox nalats ña xaꞌ,

porke dox kwaꞌn nzhap xaꞌ,

23 mbaino miwiꞌ Jesús nakaꞌn lo rë men cheꞌn Me;

no nzhab Me:

―¡Tatu nagan yo tu rrik plo nileꞌ Dios mandad!

24 Or mbin bixaꞌ widiꞌzh reꞌ,

xe miaꞌn rë men cheꞌn Me tuli,

no nzhab Jesús xtu wëlt:

―Bin goi xgaꞌn,

¡tatu nagan yo tu rrik plo nileꞌ Dios mandad!

25 Más jwals ded tu kamey xan tu yaguj,

ke par yo tu rrik plo nileꞌ Dios mandad.

26 Or mbin bixaꞌ kureꞌ,

más miaꞌn xe bixaꞌ,

orzeꞌ nzhab bixaꞌ lo wech bixaꞌ:

―Chi lëꞌi saꞌ,

¡pas yent cho men gak roꞌ lo rë kwaꞌn nazheꞌb kwaꞌn nzëdkë tich men!

―nzhab bixaꞌ.

27 Orzeꞌ xe miwiꞌ Jesús lo bixaꞌ,

no nzhab Me:

―Par rë men,

nzho kwaꞌn nagakt leꞌ men;

per Dios,

yent cho tu kwaꞌn nagak leꞌ Dios.

28 Orzeꞌ nguzublo nzhab Per:

―Biwiꞌ go,

no milaꞌ rë kwaꞌn,

par nzadkë no tich go.

29 Nkab Jesús:

―Walika kwaꞌn nin lo go,

rë xaꞌ laꞌ lizh,

o wech xaꞌ,

o bizan xaꞌ,

o xuz xaꞌ o xnaꞌ xaꞌ,

o xmëꞌd xaꞌ,

o yuo cheꞌn xaꞌ,

por ñila xaꞌ da;

30 per rë kwaꞌn milaꞌ xaꞌ,

xtu gayoꞌ wëlt máse gap xaꞌ mis yizhyuo reꞌ;

mbaino nu yiꞌ men ne men xaꞌ por da;

no xtu yizhyuo kwaꞌn laore yiꞌd,

lëꞌ xaꞌ ban par dubtaꞌ.

31 Per nayax xaꞌ galo nal reꞌ,

gak xaꞌ lult laka;

no xaꞌ lult laka nal reꞌ,

gak xaꞌ galo laka.

32 Or nzha Jesús nez kun rë men cheꞌn Me par yezh Jerusalén,

nzhubner Me lo bixaꞌ;

orzeꞌ xe miaꞌn rë men cheꞌn Me niwiꞌ bixaꞌ lo Me;

mbaino nu rë men seꞌga,

dub nizheb bixaꞌ nzadkë bixaꞌ tich rë men cheꞌn Me.

Orzeꞌ ngurezh Jesús za tu dusen men cheꞌn Me tu lad,

nguzublo kidiꞌzh Me lo bixaꞌ kwan zak Me,

33 nzhab Me:

―Biwiꞌu,

lëꞌ be nzha yezh Jerusalén plo zen bixaꞌ da,

par chi bixaꞌ da lo rë ngulëiꞌ ro,

no lo rë xaꞌ niluꞌ ley;

no lëꞌ rë xaꞌ reꞌ gab,

ñal gat da;

orzeꞌ chi bixaꞌ da lo rë men gat lëꞌt men Israel par gut rë men reꞌ da,

34 mbaino xizhnu bixaꞌ da,

chuk bixaꞌ lon,

no kin bixaꞌ da;

orzeꞌ gut bixaꞌ da,

per ngubizh yon,

lëꞌda ruban.

35 Orzeꞌ nguzubi Jakob kun Juan xgaꞌn Zebedeo lo Jesús,

par nzhab bixaꞌ:

―Maestr,

nzhakla no,

leꞌ go tu kwaꞌn naꞌb no lo go.

36 Nkab Jesús:

―¿Kwan nzhakla go len por go?

37 Orzeꞌ nzhab bixaꞌ:

―Or gak go rey,

gap go rë kwaꞌn,

ziyël go zob tugaꞌ no,

kad taꞌ go.

38 Per nzhab Jesús:

―Nanet go kwan kinaꞌb go.

¿Chi zo go kwaꞌn nala kwaꞌn goꞌn,

no chi xek go ne go kwaꞌn nazheꞌb kwaꞌn zak da?

39 Orzeꞌ nkab bixaꞌ:

―Lëꞌ no xek ka loi.

Per nzhab Jesús:

―Lëꞌ go go ka kwaꞌn nala kwaꞌn goꞌn;

mbaino lëꞌ go zakka kwaꞌn nazheꞌb kwaꞌn zak da,

40 per par zob tugaꞌ go taꞌn,

nagaktaꞌ nene;

nab tsa Xuza kobeꞌ (wiꞌ) cho zob kad taꞌn.

41 Or mbin za chiꞌ men cheꞌn Jesús kureꞌ,

orzeꞌ niyiꞌ bixaꞌ lo Jakob no lo Juan,

42 per ngurezh Jesús za chiꞌ bixaꞌ reꞌ par nzhab Me:

―Nane ka go xmod nak rë xaꞌ nileꞌ mandad xid rë men gat lëꞌt men Israel,

dox naye nikë rë xaꞌ reꞌ men zhiꞌn;

mbaino rë xaꞌ ro xid rë men baꞌ,

mod nzhakla xaꞌ nilinu xaꞌ rë men.

43 Per go,

nagakt go saꞌ;

men kwaꞌn nzhakla leꞌ mandad xid go,

xaꞌ zeꞌ gak nela tu mos gaꞌ lo go,

44 no xaꞌ nzhakla gak xaꞌ tsak xid go,

xaꞌ zeꞌ gak xaꞌ leꞌ mandad cheꞌn más go;

45 lëꞌla na,

nak da Xgaꞌn Dios mbaino nak da tu men yizhyuo;

gat nzhalta par len mandad lo rë men;

lëꞌda nzhal par len mandad cheꞌn bixaꞌ,

mbaino gat da por nayax men yizhyuo par ban bixaꞌ.

46 Or mizhin bixaꞌ yezh Jeriko no or nzharoꞌ la Jesús yezh zeꞌ kun rë men cheꞌn Me,

mbaino kun nayax men seꞌga nzhakë tich Me,

no roꞌ nez zeꞌ nzob tu xaꞌ nikal lo lë Bartimeo,

xgaꞌn tu xaꞌ lë Timeo,

kinaꞌb xaꞌ gon.

47 Or mbin xaꞌ nikal lo reꞌ,

lëꞌ Jesús nzë yezh Nazaret nzhaded zeꞌ,

nguzublo kibizhië xaꞌ reꞌ,

naye nzhab xaꞌ:

―¡Jesús,

Xgaꞌn Dabi,

bilats laxtoꞌ da!

48 Orzeꞌ nzhab rë men:

“¡Kiex,

nakuzhiëtraꞌl!”,

per más nayë nguruzhië xaꞌ,

nzhab xaꞌ:

―¡Xgaꞌn Dabi,

bilats laxtoꞌ da!

49 Lëꞌchi ngulëz Jesús,

mbaino nzhab Me:

―Wakaꞌ go xaꞌ baꞌ.

Orzeꞌ nzhab rë men lo xaꞌ nikal lo reꞌ:

―¡Nazhebtal,

watso;

lëꞌ Jesús kibezhal!

50 Orzeꞌ xaꞌ nikal lo reꞌ,

ngulubi xaꞌ lar kwaꞌn nzhoꞌb tich xaꞌ,

nayen laka ngwatso xaꞌ,

mizhin xaꞌ lo Jesús,

51 no minabdiꞌzh Jesús lo xaꞌ,

nzhab Me:

―¿Kwan nzhaklal len pur lu?

Mikab xaꞌ nikal lo reꞌ:

―Maestr,

nzhaklan yani lon.

52 Orzeꞌ nzhab Jesús:

―Bizë,

guzhë ngwani lol por ngwayilal da.

No mis orzeꞌ,

tuli ngwani lo xaꞌ reꞌ,

orzeꞌ nzhakë xaꞌ tich Jesús.