Kwent cheꞌn tu mos xaꞌ nileꞌ mandad
16
No midiꞌzh Jesús kureꞌ lo rë men cheꞌn Me:
―Nguio tu miyiꞌ rrik,
kinu xaꞌ tu xaꞌ nikina rë cheꞌn xaꞌ,
no ngwayab zipla mos cheꞌn miyiꞌ reꞌ:
“Xaꞌ nikina rë cheꞌnal baꞌ,
gat lëꞌt kileꞌ xaꞌ.”
San Lucas 16:1-18
2 Orzeꞌ ngurezh xaꞌ rrik reꞌ miyiꞌ reꞌ par nzhab xaꞌ:
“¿Chi wali gat lëꞌt kileꞌl kun rë cheda?
Biteꞌd kwent rë kwaꞌn kileꞌl,
porke nakinatraꞌl rë cheda.”
3 Orzeꞌ mileꞌ xaꞌ nikina reꞌ xigab:
“¿Xmod len nal,
lëꞌ xaꞌ nileꞌ mandad da reꞌ milat zhiꞌn lon?
No naxekt da gaꞌna yuo,
no nitulan naꞌba karida.
4 ¡Ah!
Ne ka kwan len,
par kwezh men da lizh xaꞌ,
or niyenraꞌ zhiꞌn kën.”
5 Orzeꞌ ngurezh xaꞌ nikina reꞌ,
tugaꞌ rë xaꞌ nzëꞌb lo xaꞌ nileꞌ mandad xaꞌ;
nzhab xaꞌ lo xaꞌ galo laka mizhin:
“¿Plak nzëꞌbal lo xaꞌ nileꞌ mandad da?”
6 Orzeꞌ nzhab xaꞌ reꞌ:
“Lëꞌda nzëꞌb tu gayoꞌ barril aseit.”
Orzeꞌ nzhab xaꞌ nikina reꞌ:
“Lëꞌ yech kwaꞌn nzëꞌbal reꞌ,
karre nguzob,
bizuxkwaꞌ xtu yech,
bizob choꞌ bichiꞌ tsa barril aseit nzëꞌbal.”
7 Orzeꞌ nzhab xaꞌ lo xtu xaꞌ nzëꞌb:
“Lu gaꞌ,
¿plak nzëꞌbal?”
Orzeꞌ nzhab xaꞌ zeꞌ:
“Tu gayoꞌ dabed triu.”
Orzeꞌ nzhab xaꞌ nikina reꞌ:
“Lëꞌ yech kwaꞌn nzëꞌbal reꞌ,
bizuxkwaꞌ xtu yech,
bizob tap galtsa dabed loi.”
8 No or une xaꞌ rrik reꞌ,
lëꞌ mos xaꞌ gat niteꞌd kwent kumplet reꞌ,
dox natsin por xmod mileꞌ xaꞌ,
orzeꞌ nzhab xaꞌ rrik reꞌ lo mos reꞌ:
“Dox natsinal.”
Kuzeꞌ nzhab Jesús:
―Porke rë men yizhyuo reꞌ,
nzho xaꞌ más natsin lo rë kwaꞌn nileꞌ xaꞌ kun rë men,
ke xmod nileꞌ rë men xaꞌ nidiꞌzh,
nilibeꞌ Dios.
9 ’No nin lo go,
bikwaꞌn go xmod chëꞌl go kun rë men yent kwan nzhap,
kun yalrrik kwaꞌn gat lëꞌ kwaꞌn nzho yizhyuo reꞌ.
No or lox yalrrik lo go,
lëꞌ Dios weiꞌ go plo yo go par dubtaꞌ.
10 ’No men xaꞌ nileꞌ wen lo tu kwaꞌn cheꞌp,
pwes nu ska lo kwaꞌn nayax nileꞌ xaꞌ wen;
mbaino xaꞌ nileꞌ kwaꞌn gat lëꞌ lo tu kwaꞌn cheꞌp,
nu ska lo kwaꞌn nayax leꞌ xaꞌ kwaꞌn gat lëꞌ.
11 No,
chi nileꞌ go kwaꞌn gat lëꞌ lo rë kwaꞌn tsak lo yizhyuo reꞌ,
orzeꞌ,
nagabt go,
lëꞌ Dios laꞌ yalrrik kwaꞌn nidiꞌ par dubtaꞌ par kina go.
12 No chi gat nileꞌ go xmod ñal kun rë kwaꞌn nak cheꞌn xtu men,
orzeꞌ,
¿xmod zhin rë kwaꞌn nak cheꞌn go?
13 ’Yent cho tu mos gak kë zhiꞌn lo chop xaꞌ nileꞌ mandad xaꞌ,
porke tu xaꞌ reꞌ yiꞌ mos ne mos,
no lëꞌ xtu xaꞌ chizhiꞌ mos;
o roꞌ tu rë xaꞌ reꞌ gon mos,
no lo xtu xaꞌ leꞌ mos nayaꞌ.
Kuzeꞌ nagakt chizhiꞌ men Dios no orzeꞌ chizhiꞌ men dimi nela tu dios gaꞌ.
―Mis go nidiꞌzh wen go lo rë men;
per lëꞌ Dios nane ka xmod nak laxtoꞌ go;
porke rë kwaꞌn zak men dox tsak,
per par Dios nikap laxtoꞌ Diose.
Ley cheꞌn Muisés mbaino plo nileꞌ Dios mandad
16 No nzhab Jesús:
―Haxta zhë cheꞌn Juan,
une nakiꞌn mileꞌ men kwaꞌn nzhab ley mbaino rë widiꞌzh kwaꞌn midiꞌzh rë profet.
Dizde orzeꞌ,
nzhon men xmod yo men plo nileꞌ Dios mandad,
no jwers nileꞌ men par yo men zeꞌ,
17 per más jwals lox yibëꞌ no yizhyuo ke par ded tu rë kwaꞌn nzobniꞌ lo ley;
sino ke rëi gak.
Jesús miluꞌ kwan nzhak or nilëꞌ tu men kun tsaꞌ xaꞌ
18 ’No chi tu miyiꞌ lëꞌ kun unaꞌ cheꞌn xaꞌ,
no ban xaꞌ kun xtu unaꞌ,
orzeꞌ nzëꞌb xki miyiꞌ reꞌ lo Dios por lëꞌi;
mbaino miyiꞌ kwaꞌn ban kun unaꞌ kwaꞌn milëꞌ kun xmiyiꞌ reꞌ,
nzëꞌb xki ska xaꞌ reꞌ,
por kureꞌ.
Rik no Lásaro
19 ’Nguio tu men rrik,
dox nabe xaꞌ,
no pura lar wen nzhak xaꞌ;
no zilitaꞌ nileꞌ xaꞌ lani,
no dox kwaꞌn kar niziꞌ xaꞌ par nileꞌ xaꞌ lani.
San Lucas 16:19-31
20 No nguio tu men prob,
xaꞌ lë Lásaro,
dub kwerp cheꞌn xaꞌ nzhazh lai;
mbaino roꞌ pwert cheꞌn rrik reꞌ ñanu men xaꞌ par nizob xaꞌ zeꞌ.
21 No haxta rë kwaꞌn nzhab xan mes cheꞌn rrik niwix xaꞌ gao xaꞌ,
no rë mbëk nizubi mizup taꞌ xaꞌ reꞌ.
22 Per ngol tu ngubizh,
ngut Lásaro,
no mbiyꞌ rë ganj cheꞌn Dios Lásaro plo nzho Abraham;
mbaino nu ska rrik ngut no migaꞌch xaꞌ.
23 No dizde leꞌn gabil plo nzho rrik,
naxektraꞌ xaꞌ di yalne;
no ngulits xaꞌ lo xaꞌ dizde zit une xaꞌ Abraham no Lásaro nzo kun Abraham.
24 Orzeꞌ nguruzhië rrik:
“¡Xuza Abraham!,
bilats laxtoꞌ da,
bixëꞌl Lásaro par gazh xaꞌ yek bikwen yaꞌ xaꞌ kun nits,
par gazh luzha,
porke naxektraꞌ da leꞌn bël reꞌ.”
25 Per nzhab Abraham:
“Xgaꞌna,
bitsila dox wen mibanal,
no lëꞌ Lásaro dox nalats miban;
no nal,
milox yalnalats kwaꞌn une xaꞌ,
per lu kine kwaꞌn nazheꞌb nal.
26 Mbaino nu ska garol tsaoꞌ plo nzo go,
no plo nzo no,
nided tu barrank kwaꞌn yent cho nane plak naꞌch.
Kuzeꞌ,
rë xaꞌ kwaꞌn nzho reꞌ,
nagakt yiꞌd xaꞌ baꞌ,
no ni rë xaꞌ kwaꞌn nzho baꞌ,
nagakt yiꞌd xaꞌ reꞌ.”
27 Orzeꞌ nzhab rrik:
“Kinaꞌba lol xuza Abraham,
xëꞌlal Lásaro lizh xuza,
28 plo kinun gaiꞌ wecha,
nes par nayiꞌd bixaꞌ plo nazheꞌb nizakzi men reꞌ.”
29 Per nzhab Abraham:
“Lëꞌ bixaꞌ kinu ka ley kwaꞌn milaꞌ Dios lo Muisés,
no rë kwaꞌn midiꞌzh rë profet;
rë kubaꞌ ñal gon bixaꞌ.”
30 Orzeꞌ nzhab rrik:
“Nagont bixaꞌ roꞌ rë xaꞌ baꞌ,
xuza Abraham;
nakiꞌn ruban tu xaꞌ,
par yayab rë kureꞌ lo rë wecha,
par laꞌ bixaꞌ rë kwaꞌn gat lëꞌ nak bixaꞌ,
mbaino ban bixaꞌ nela xmod nzhakla Dios.”
31 Per nzhab Abraham:
“Per chi gat ñila bixaꞌ rë widiꞌzh cheꞌn Muisés,
no rë widiꞌzh cheꞌn rë profet,
rë xaꞌ kwaꞌn midiꞌzh por Dios,
nayot yila bixaꞌi,
ter tu men ngut ruban,
yadiꞌzhe lo bixaꞌ.”