2 nzhab Jesús lo rë men:

―Leꞌn tu yezh nguio tu jwes kwaꞌn gat nzhont nzho Dios,

no niyent cho nzhon xaꞌ nzho,

3 mbaino mis yezh zeꞌ nzho tu unaꞌ ngut tsaꞌ;

zilitaꞌ ña unaꞌ lo jwes reꞌ par leꞌ jwes yalgustis kun xaꞌ nidil unaꞌ kun lëꞌ.

4 No tu tiemp xche,

net jwes ngaknu unaꞌ reꞌ,

no lult mileꞌ jwes xigab:

“Ter gat nzhonta nzho Dios,

no yent cho nzhona nzho,

5 per dox nichaꞌb da ñiꞌd unaꞌ reꞌ lon gargaꞌl;

mejor len kwaꞌn ne xaꞌ par nayiꞌdraꞌ xaꞌ lon,

no par nakixianraꞌ unaꞌ reꞌ da.”

6 Orzeꞌ nzhab Jesús:

―Bin go kwaꞌn nzhab jwes nayaꞌ reꞌ;

7 orzeꞌ,

¿chi naleꞌt Dios yalgustis por rë xaꞌ ngule Dios par gak men cheꞌn Me,

xaꞌ ninaꞌb zhëy-yëꞌle lo Dios?

¿Chi xche par leꞌ Diose?

8 Per na ni lo go,

lëꞌ Dios leꞌi lwegaꞌ.

Per or yala,

¿chi yazhëlraꞌ da rë men da,

xaꞌ ñila len yalgustis,

kun rë xaꞌ nidil bixaꞌ?

9 No midiꞌzh Jesús kureꞌ,

lo pla men xaꞌ nidiꞌzh,

mis lëꞌ bixaꞌ dox nzhon bixaꞌ roꞌ Dios,

per rrajón bixaꞌ lo más rë men:

10 ―Nguio chop miyiꞌ,

ngwa bixaꞌ leꞌn yadoꞌ par gunaꞌb bixaꞌ lo Dios.

Tu xaꞌ fariseo,

lëꞌ xtu xaꞌ nikan dimi cheꞌn rey.

11 Xaꞌ fariseo reꞌ,

dub nzuli xaꞌ,

gunaꞌb xaꞌ lo Dios,

seꞌ nzhab xaꞌ:

“O Dios;

xkixal porke gat nakt da nela más rë men;

rë men waꞌn,

no rë men kwaꞌn nileꞌ kwaꞌn gat lëꞌ,

no rë xaꞌ nikaꞌ men gat lëꞌt tsaꞌ;

no ni gat nakt da nela men nikan dimi cheꞌn rey reꞌ;

12 na nizo xlatsa chop ngubizh leꞌn sman,

no nizan diezmo cheꞌn rë nak kwaꞌn nilen gan.”

13 Per xaꞌ kwaꞌn nikan dimi cheꞌn rey zeꞌ,

zit nguzo xaꞌ,

no milayët xaꞌ lo xaꞌ,

maska kikëꞌ xaꞌi laz xaꞌ,

no nzhab xaꞌ:

“¡O Dios,

bilats laxtoꞌ da,

lëꞌda tu men nzëꞌb xki lol!”

14 Orzeꞌ nzhab Jesús:

―Nin lo go,

or ña men nikan dimi zeꞌ lizh,

miwiꞌ Dios lo xaꞌ,

nela lo tu men yent kwan nzëꞌb gaꞌ;

per lo men fariseo reꞌ,

nangawiꞌt Dios wen,

porke rë xaꞌ mis lëꞌ nidiꞌzh nzhon roꞌ Dios,

lëꞌ xaꞌ tula;

per xaꞌ kwaꞌn nilibeꞌ xmod nak,

lëꞌ Dios leꞌ,

gak xaꞌ tu men tsak.

15 Nu nzhanu men,

haxta rë mëꞌdoꞌ,

par gal Jesús bimëꞌd,

per or une rë men cheꞌn Jesús kureꞌ,

nangalaꞌtraꞌ bixaꞌ ngweiꞌ rë men mëꞌd lo Jesús,

16 per ngurezh Jesús rë mëꞌd,

mbaino nzhab Me lo rë men cheꞌn Me:

―Nakat go yiꞌd rë mëꞌd lon;

porke men nak nela tu mëꞌd gaꞌ,

xaꞌ reꞌ yo plo nileꞌ Dios mandad.

17 Walika kwaꞌn nin lo go;

xaꞌ kwaꞌn nagak nela tu mëꞌd gaꞌ,

plo nileꞌ Dios mandad nayot xaꞌ.

18 Orzeꞌ tu xaꞌ nileꞌ mandad,

minabdiꞌzh lo Jesús,

nzhab xaꞌ:

―Maestr wen,

¿kwan len par ban da par dubtaꞌ lo Dios?

19 Orzeꞌ nzhab Jesús:

―¿Chon nel wen da?

Yent cho wen,

nab tsa Dios wen.

20 Lu nane la rë kwaꞌn nzhab ley:

“Nakaꞌtal unaꞌ gat lëꞌt tsaꞌl,

nagutal men,

naliwaꞌntal,

nakëꞌtal kixuꞌ xtu men yent kwan nzëꞌb,

no gop kwent xuzal mbaino xnaꞌl.”

21 Orzeꞌ nzhab miyiꞌ rrik reꞌ:

―Rë nak kubaꞌ milela dizde or win da.

22 Or mbin Jesús kureꞌ,

orzeꞌ nzhab Me:

―Nzho xtu kwaꞌn jwalt leꞌl:

Bito rë nak kwaꞌn kinul,

orzeꞌ gudiꞌze kaꞌ rë men prob,

par gapal kwaꞌn tsak lo yibëꞌ,

orzeꞌ diꞌkë ticha.

23 Per or mbin miyiꞌ rrik rë kureꞌ,

dox trixt mizi xaꞌ,

porke dox rrik xaꞌ.

24 No or une Jesús,

xmod mizi miyiꞌ reꞌ,

orzeꞌ nzhab Me:

―¡Dox nagan par tu men rrik ziyël xaꞌ leꞌ Dios mandad xaꞌ!

25 Más jwals ded tu kamey xan tu yaguj,

ke par yo tu rrik plo nileꞌ Dios mandad.

26 Orzeꞌ,

rë xaꞌ kwaꞌn mbin kureꞌ,

nzhab bixaꞌ:

―Chi lëꞌi saꞌ,

¡pas yent cho roꞌ lo kwaꞌn nazheꞌb kwaꞌn nzho met!

27 Orzeꞌ nzhab Jesús:

―Par rë men,

nzho kwaꞌn nagakt leꞌ men;

per Dios,

yent cho tu kwaꞌn nagakt leꞌ Dios.

28 Orzeꞌ nzhab Per lo Jesús:

―Biwiꞌ go,

lëꞌ no milaꞌ rë nak kwaꞌn kinu no,

par nzadkë no tich go.

29 Orzeꞌ nzhab Jesús:

―Walika kwaꞌn nin lo go,

rë xaꞌ milaꞌ lizh,

o xuz,

o xnaꞌ,

o wech,

o bizan,

o unaꞌ,

o xmëꞌd,

par yo xaꞌ plo nileꞌ Dios mandad;

30 no dub ban xaꞌ yizhyuo reꞌ,

más nayax kwaꞌn gap xaꞌ,

ke rë kwaꞌn milaꞌ xaꞌ par nzadkë xaꞌ ticha,

mbaino lëꞌ xaꞌ ban par dubtaꞌ lo Dios.

31 Ngurezh Jesús tu lad,

za tu dusen men cheꞌn Me par nzhab Me:

―Biwiꞌu,

lëꞌbe nzha yezh Jerusalén,

plo gak rë kwaꞌn zaka,

rë kwaꞌn nzobniꞌ lo yech por rë profet,

xaꞌ midiꞌzh por Dios;

32 lëꞌ rë men chi da lo xtu ben men,

xaꞌ gat lëꞌt men Israel,

no kitnu rë men reꞌ da,

mbaino ke bixaꞌ da,

no chuk bixaꞌ lon.

33 Mbaino lëꞌ bixaꞌ chële ticha,

orzeꞌ gut bixaꞌ da;

per ngubizh yon lëꞌda ruban.

34 Per rë men cheꞌn Me ngazobyekt bixaꞌ widiꞌzh reꞌ;

porke nagakt zobyek bixaꞌi,

porke nake rë kwaꞌn nanet bixaꞌ kwan.

35 Or nzhazhin Jesús gax yezh Jericó,

zeꞌ nzob tu xaꞌ nikal lo roꞌ nez,

kinaꞌb xaꞌ gon.

36 Or mbin xaꞌ reꞌ,

nzhaded nayax men zeꞌ,

minabdiꞌzh xaꞌ:

“¿Cho rë xaꞌ zeꞌ gaꞌ?”

37 Orzeꞌ nzhab men lo xaꞌ:

―Lëꞌ Jesús xaꞌ nzë yezh Nazaret nzhaded reꞌ.

38 Orzeꞌ naye nguruzhië xaꞌ nikal lo reꞌ,

nzhab xaꞌ:

―¡Jesús,

Xgaꞌn Dabi!

¡Bilats laxtoꞌ da!

39 Orzeꞌ rë xaꞌ nzha dilant,

nzhab bixaꞌ lo xaꞌ nikal lo reꞌ:

“¡Kiex,

bitsaoꞌ roꞌl!”,

per más naye nzhab xaꞌ:

―Xgaꞌn Dabi,

¡bilats laxtoꞌ da!

40 Orzeꞌ ngulëz Jesús,

mileꞌ Me mandad ñëꞌd xaꞌ nikal lo reꞌ lo Me,

orzeꞌ nzhab Jesús lo xaꞌ:

41 ―¿Kwan tu kwaꞌn nzhaklal gaknun lu?

Orzeꞌ nzhab xaꞌ nikal lo reꞌ:

―Señor,

nzhaklan yani lon.

42 Orzeꞌ nzhab Jesús:

―¡Guzhë ngwani lol!,

por ngwayilal da.

43 Orzeꞌ lwegaꞌ ngwani lo xaꞌ,

no nzhakë xaꞌ tich Jesús,

mbaino kidiꞌzh xaꞌ dox nazhon Dios;

no rë xaꞌ une kureꞌ,

nu bixaꞌ kidiꞌzh nazhon Dios.