―Maestr,

nane no,

Dios ka mixëꞌl go par tseꞌd go no,

porke yent cho tu men gak leꞌ rë zhiꞌn nazhon kwaꞌn nileꞌ go reꞌ chi gat nzo Dios kun lëꞌ xaꞌ.

3 Orzeꞌ nzhab Jesús:

―Walika kwaꞌn ganin lol,

men nagal xtu wëlt,

nagakt yo xaꞌ plo nileꞌ Dios mandad.

4 Orzeꞌ nzhab Nicodemo:

―Per,

¿xmod gal tu men xtu wëlt,

tu xaꞌ ya ngwagal la?

¿Chi zak yo xaꞌ laxtoꞌ xnaꞌ xaꞌ par gal xaꞌ xtu wëlt?

5 Orzeꞌ nzhab Jesús:

―Walika kwaꞌn nin lol reꞌ,

men nagal kun nits no kun Sprit cheꞌn Dios,

nagakt yo xaꞌ plo nileꞌ Dios mandad.

6 Or nzhal rë men yizhyuo,

men seꞌga bixaꞌ namás;

per rë xaꞌ nzhal xtu wëlt por Sprit cheꞌn Dios,

men cheꞌn Dios bixaꞌ.

7 Nayaꞌntal xe por widiꞌzh reꞌ:

“Rë men nakiꞌn gal xtu wëlt.”

8 Lëꞌ mbi nzo rë plo,

no ter nzhonal nzhaxe,

per nanetal plo nzëi no plo ñai.

Kuzeꞌ rë men seꞌga nagakt zobyek bixaꞌ xmod nzhal tu men por Sprit cheꞌn Dios.

9 Orzeꞌ nzhab Nicodemo xtu wëlt:

―¿Taxa xmod nzhak kureꞌ kun rë men?

10 Orzeꞌ nzhab Jesús:

―Taxa,

lu dox nzhoꞌb xtiꞌzhal por dox nzhakal niluꞌl Ley lo rë men Israel,

mbaino,

¿chi nanetal kureꞌ orzeꞌ?

11 Walika kwaꞌn nin,

lëꞌ no nidiꞌzh kwaꞌn nane no,

no nidiꞌzh no kwaꞌn une no,

per gat ñilat go kwaꞌn nidiꞌzh no.

12 Chi gat ñilat go or nidizha rë kwaꞌn nzho yizhyuo reꞌ,

orzeꞌ,

¿xmod yila go or dizha rë kwaꞌn nzho lo yibëꞌ?

13 Yent cho gat ya lo yibëꞌ,

nab tsa Me ngulali lo yibëꞌ nane kureꞌ,

no Me reꞌ nak Xgaꞌn Dios;

mbaino nak ska Me tu men yizhyuo.

14 No nela xmod ngulitsya Muisés tu mbëꞌl yiꞌb leꞌn yuo bizh gaꞌ,

seꞌska litsya men Xgaꞌn Dios lo krus,

Me nak ska tu men yizhyuo,

15 per rë xaꞌ yila da,

lëꞌ bixaꞌ ban par dubtaꞌ kun Dios.

16 ’Kwaꞌdox nazhiꞌ Dios rë men yizhyuo,

kuzeꞌ tugaka Xgaꞌn Me kwaꞌn nzhap Me mixëꞌl Me yizhyuo reꞌ,

nes par rë xaꞌ yila Xgaꞌn Dios,

nayot lox bixaꞌ lo Dios,

sino ke lëꞌ bixaꞌ ban par dubtaꞌ kun Dios,

17 porke nangaxëꞌltaꞌ Dios Xgaꞌn Dios lo rë men yizhyuo reꞌ par gab Xgaꞌn Me kwan nak bixaꞌ,

sino par kubchi Xgaꞌn Me rë kwaꞌn nzëꞌb xki bixaꞌ lo Dios,

kuzeꞌ mixëꞌl Dios Xgaꞌn Me.

18 Men xaꞌ yila Xgaꞌn Dios,

nanaꞌbtaꞌ Dios kwent lo xaꞌ por kwaꞌn nzëꞌb xki xaꞌ lo Dios;

per xaꞌ gat ñilat Xgaꞌn Dios,

men reꞌ kix rë kwaꞌn nzëꞌb xki xaꞌ por nangayilat xaꞌ tugaka Xgaꞌn Dios kwaꞌn nzhap Dios.

19 Rë xaꞌ gat ñilat Xgaꞌn Dios,

nzëꞌb xki la bixaꞌ lo Dios,

no por nileꞌ bixaꞌ kwaꞌn gat lëꞌ,

kuzeꞌ or mbiꞌd Me nak Ki lo rë men yizhyuo,

más nguio laxtoꞌ bixaꞌ zo bixaꞌ lo nakao ke par zo bixaꞌ lo Ki cheꞌn Dios,

20 porke rë xaꞌ gat nileꞌt rë kwaꞌn miluꞌ la Dios lo bixaꞌ,

kuzeꞌ gat nzhaklat bixaꞌ zubi bixaꞌ lo Ki cheꞌn Dios par nayaxoꞌb kwaꞌn nak bixaꞌ.

21 Per lëꞌ rë men,

xaꞌ walika nileꞌ rë kwaꞌn miluꞌ la Dios lo bixaꞌ,

nizubi bixaꞌ lo Ki cheꞌn Dios,

par luꞌ,

lëꞌ rë kwaꞌn nileꞌ bixaꞌ,

nzë lo Dios.

22 Dispwés di ngok kureꞌ,

orzeꞌ ngwa Jesús kun rë men cheꞌn Me lazh men Judea plo miaꞌn bixaꞌ pla raꞌ ngubizh,

no nu rë men cheꞌn Jesús mililëiꞌ rë men Judea leꞌn nits.

23 Mbaino lëꞌ Juan kililëiꞌ men leꞌn nits yezh Enón,

gax plo ñaꞌn yezh Salim,

porke dox nikë nits zeꞌ,

no rë xaꞌ nzha lo Juan,

zeꞌ ngoklëiꞌ bixaꞌ.

24 No or mileꞌ Juan rë kureꞌ,

stubi gat yo Juan lizhyiꞌb,

25 per pla rë men cheꞌn Juan michëꞌlroꞌ bixaꞌ kun más rë men Israel por xmod nimbe men lo Dios kun nits,

26 orzeꞌ ngwayab rë men cheꞌn Juane lo Juan,

nzhab bixaꞌ:

―Maestr,

chi nitsilal miyiꞌ kwaꞌn nguzo kun lu xtu roꞌ youꞌ Jordán,

xaꞌ kwaꞌn midiꞌzhal más tsak lol zeꞌ,

nal nu xaꞌ kililëiꞌ men leꞌn nits,

no rë men ñakë tich xaꞌ.

27 Orzeꞌ nzhab Juan:

―Yent cho gak leꞌ tu kwaꞌn nazhon chi gat nzo Dios kun lëꞌ xaꞌ.

28 Mis go mbin kwaꞌn midizha,

gat lëꞌt da nak Krist Me yiꞌd.

Per Dios mixëꞌl da nzhala lo Me.

29 Porke lo tu jwandang,

lëꞌ xaꞌ gak jwandang cheꞌn zeꞌ,

men zeꞌ nak xaꞌ más tsak;

mbaino lëꞌ men nichëꞌl xaꞌ kwaꞌn nzo taꞌ xaꞌ,

dox nizak laxtoꞌ xaꞌ nzhon xaꞌ chi miyiꞌ xaꞌ nzhak jwandang cheꞌn.

No seꞌtaꞌ nizak laxtoꞌn por miyiꞌ baꞌ.

30 Nal,

rë zhiꞌn nazhon kwaꞌn nileꞌ miyiꞌ baꞌ nakiꞌn reꞌche rë plo,

per rë zhiꞌn nazhon kwaꞌn nilen,

nakiꞌn loxe.

31 No nzhab Juan:

―Me nzë lo yibëꞌ,

Me zeꞌ más tsak lo rë men yizhyuo;

mbaino xaꞌ nzë yizhyuo reꞌ,

nab tsa rë kwaꞌn yizhyuo reꞌ nane xaꞌ.

Per Me nzë al ya,

Me reꞌ nane rëi,

32 mbaino nidiꞌzh Me rë kwaꞌn nane Me no rë kwaꞌn nzhon Me,

per yent cho ñila kwaꞌn nidiꞌzh Me.

33 No chi yila tu men kwaꞌn nidiꞌzh Me nzë lo yibëꞌ,

orzeꞌ men zeꞌ nane,

walika kwaꞌn nidiꞌzh Dios,

34 porke xaꞌ mixëꞌl Dios par leꞌ zhiꞌn nazhon cheꞌn Dios yizhyuo reꞌ,

nab tsa widiꞌzh cheꞌn Dios nidiꞌzh xaꞌ,

porke Dios mizaꞌ rë tsa yalnazhon cheꞌn Dios nkaꞌ xaꞌ reꞌ por Sprit cheꞌn Dios.

35 Lëꞌ Xuz be Dios nazhiꞌ Me Xgaꞌn Me,

no rë tsa kwaꞌn kinu Me mizaꞌ Me yanu Xgaꞌn Me.

36 Men yila Xgaꞌn Dios,

xaꞌ zeꞌ par dubtaꞌ ban xaꞌ kun Dios;

per xaꞌ gat ñila Xgaꞌn Dios,

nabant xaꞌ lo Dios,

sino ke kwaꞌn kimbëz par lëꞌ xaꞌ nak yalzi kwaꞌn nazheꞌb dox kwaꞌn xëꞌl Dios par rë men xaꞌ nzëꞌb xki lo Dios.