Mbiꞌy bixaꞌ Jesús lo Pilat
15
No riyëꞌl,
garziꞌl laka migan rë ngulëiꞌ xaꞌ nileꞌ mandad lo más ngulëiꞌ,
no kun rë men Israel xaꞌ nak zhiꞌn,
mbaino kun rë xaꞌ niluꞌ ley,
no kun más rë gustis xaꞌ más nileꞌ mandad;
rë xaꞌ reꞌ tutsa midiꞌzh bixaꞌ.
Orzeꞌ miliꞌb bixaꞌ Jesús par mbiꞌy bixaꞌ Me lo Pilat.
San Marcos 15:1-21
―¿Chi lu nak rey lo rë men Israel?
Orzeꞌ nzhab Jesús:
―Go nei.
3 No rë ngulëiꞌ xaꞌ nileꞌ mandad lo más ngulëiꞌ,
por dox kixuꞌ kikëꞌ bixaꞌ Jesús,
4 kuzeꞌ xtu wëlt minabdiꞌzh Pilat,
nzhab xaꞌ lo Jesús:
―¿Chon nanel kabal ni tu kwaꞌn?
Biwiꞌ,
dox kwaꞌn ne bixaꞌ nakal.
5 Per yent kwan ngakab Jesús,
kuzeꞌ haxta net Pilat,
xmod leꞌ xaꞌ.
Jesús o Barrabás
6 No or nzhal lani Pask,
kinu Pilat kostumbr,
niliyaꞌ xaꞌ tu men nzho lizhyiꞌb,
dike cho men gakla rë men roꞌ lizhyiꞌb.
7 No tu miyiꞌ lë Barrabás nzho lizhyiꞌb orzeꞌ,
kun zipla xaꞌ mbit men kun lëꞌ xaꞌ,
or ngok tu dil kun gubier César.
8 Orzeꞌ mizhin rë men lo Pilat,
ngunaꞌb bixaꞌ,
ziyël Pilat koꞌ xaꞌ tu men nela xmod nileꞌ ka xaꞌ.
9 orzeꞌ nzhab Pilat:
―¿Chi nzhakla go liyan xaꞌ nak rey cheꞌn rë men Israel?
10 Porke ngwanu laxtoꞌ Pilat,
lëꞌ rë ngulëiꞌ ro xaꞌ nileꞌ mandad,
michi Jesús por mbidios bixaꞌ.
11 Per lëꞌ rë ngulëiꞌ xaꞌ nileꞌ mandad zeꞌ,
más mileꞌ bixaꞌ par nzhab rë men,
liyaꞌ Pilat Barrabás mejor.
12 Orzeꞌ minabdiꞌzh Pilat:
―¿Nal,
kwan nzhakla go len kun xaꞌ kwaꞌn nzhab go nak rey lo rë men Israel?
13 Orzeꞌ nzhab rë men,
kibizhië bixaꞌ:
―¡Bikëꞌ xaꞌ lo krus!
14 Orzeꞌ nzhab Pilat:
―¿Per kwan tu kwaꞌn nazheꞌb mileꞌ xaꞌ reꞌ?
Per rë men,
xtu wëlt nguruzhië bixaꞌ:
―¡Bikëꞌ xaꞌ lo krus!
15 No par yaꞌn Pilat wen kun rë men,
miliyaꞌ xaꞌ Barrabás,
no dispwes di mileꞌ xaꞌ mandad ndin bixaꞌ Jesús,
orzeꞌ michi xaꞌ Jesús lo men par këꞌ bixaꞌ Jesús lo krus.
16 Orzeꞌ lëꞌ rë sondad mbiꞌy Jesús lo luwe plo nzob palas,
kwaꞌn lë ‘pretorio.’
Zeꞌ migan pas como xoꞌp gayoꞌ sondad román.
17 No mila bixaꞌ tu lar naxne yën Jesús,
nela cheꞌn tu rey gaꞌ.
Orzeꞌ mizuxkwaꞌ bixaꞌ tu koron yich,
par mizob bixaꞌi yek Jesús,
18 orzeꞌ nguzublo nibizhyë bixaꞌ,
nzhab bixaꞌ:
―¡Wen nzha rey cheꞌn rë men Israel!
19 Orzeꞌ mixaꞌt bixaꞌ ya yek Jesús,
no michuk bixaꞌ lo Me,
mbaino nguzuxib bixaꞌ par mileꞌ bixaꞌ nela nileꞌ men kun tu rey gaꞌ lo Me.
20 No or milox mixizhnu bixaꞌ Jesús,
orzeꞌ nguloꞌ bixaꞌ lar naxne zeꞌ yën Me,
orzeꞌ migak ska bixaꞌ xab ka Me,
orzeꞌ nguloꞌ bixaꞌ Jesús par këꞌ bixaꞌ Jesús lo krus.
Or nkë Jesús lo krus
21 No tu miyiꞌ lë Simón,
xaꞌ nzë yezh Cirene,
xaꞌ nak xuz Lejandr no Ruf;
ñëꞌd xaꞌ di dan.
Or nded xaꞌ zeꞌ,
orzeꞌ mileꞌ rë sondad,
mbiꞌy xaꞌ krus cheꞌn Jesús.
22 Orzeꞌ nzhanu bixaꞌ Jesús plo lë Gólgota (Widiꞌzh reꞌ gab,
Yek Men Ngut).
San Marcos 15:22-41
23 No nzhakla bixaꞌ ngazaꞌ bixaꞌ vin kwaꞌn noch mirra,
par goꞌ Jesús,
per nangot Mei.
24 Orzeꞌ mikëꞌ bixaꞌ Jesús lo krus,
orzeꞌ nguzhit bixaꞌ di swert,
par ne bixaꞌ,
cho yaꞌn kun xab Jesús,
no kwan leꞌ kad bixaꞌ.
25 Pas como las nueve garziꞌl,
mikëꞌ bixaꞌ Jesús lo krus.
26 No mikëꞌ bixaꞌ tu letr por kwan ngut Jesús,
kwaꞌn nzhab seꞌ:
“Xaꞌ reꞌ rey cheꞌn rë men Israel.”
27 No nu chop waꞌn mikëꞌ bixaꞌ lo krus orzeꞌ;
tu xaꞌ lad direch,
no xtu xaꞌ lad izkierd cheꞌn Jesús,
28 par ngok tu widiꞌzh kwaꞌn nzobniꞌ lo Yech cheꞌn Dios kwaꞌn nzhab seꞌ:
“No nu xaꞌ nguio kwent,
xid rë xaꞌ kwaꞌn nzëꞌb xki lo Dios.”
29 No rë men nided zeꞌ,
nidiꞌzh bixaꞌ kwaꞌn gat lëꞌ,
nikwin bixaꞌ yek bixaꞌ,
nzhab bixaꞌ:
―¡Taxa!
¡Lu kwaꞌn nidiꞌzh,
chilal yadoꞌ;
no chontsa ngubizh,
kuxkwaꞌle!
30 ¡Gula lo krus baꞌ;
no mis lu,
laꞌtal gatal!
31 Seꞌska nzhab rë ngulëiꞌ xaꞌ nileꞌ mandad,
kun rë xaꞌ niluꞌ ley kwaꞌn milaꞌ Dios lo Muisés,
mixizhnu bixaꞌ Jesús;
kidiꞌzh bixaꞌ lo wech bixaꞌ:
―Nayax men miliyak xaꞌ;
per kun lëꞌ xaꞌ,
nangaleꞌt xaꞌi.
32 Chi lëꞌ xaꞌ walika nak Krist,
no rey lo rë men Israel;
¡nzhakla no la xaꞌ yub xaꞌ lo krus,
par ne noi,
orzeꞌ yayila no xaꞌ!
No haxta rop xaꞌ nikë lo krus kun lëꞌ Jesús,
midiꞌzh bixaꞌ gat lëꞌ lo Me.
Or ngut Jesús
33 No or ngol garol ngubizh,
dub yizhyuo mikao haxta las tres guzhe,
34 no mis orzeꞌ,
midiꞌzh Jesús naye:
―¡Eloi,
Eloi!,
¿lama sabactani?
(Widiꞌzh reꞌ gab:
¡Dios da,
Dios da!,
¿chon milaꞌ nzëꞌb go da?)
35 No pla rë men nzhin zeꞌ mbin widiꞌzh reꞌ;
nzhab bixaꞌ:
“Bin go,
lëꞌ xaꞌ kibezh Li,
tu xaꞌ mixëꞌl Dios nzhala.”
36 Orzeꞌ karre ngwa tu xaꞌ,
migazh tlëꞌ sponj leꞌn vin nala;
orzeꞌ miliꞌb xaꞌi yek tu ya,
no michi xaꞌi roꞌ Jesús par ngo Mei,
orzeꞌ nzhab xaꞌ:
―Bilaꞌ go,
nabei chi ziyiꞌd Li,
par la xaꞌ lo krus.
37 Per orzeꞌ naye nguruꞌzhië Jesús,
no miziꞌla Me;
ngut Me,
38 lëꞌchi ngurëz lar kwaꞌn nayaoꞌ leꞌn yadoꞌ plo dox nazhon;
chop lëꞌ ngoke tuli,
dizde al ya haxta al yët.
39 No une capitán cheꞌn rë sondad,
xaꞌ nzo gax lo Jesús,
xmod ngut Jesús,
orzeꞌ nzhab xaꞌ:
―Walika,
Xgaꞌn Dios miyiꞌ reꞌ.
40 No nu ska pla rë unaꞌ kwaꞌn nzhin zit zeꞌ,
une rë kureꞌ.
Xid rë unaꞌ reꞌ nzo Mari Madalén,
mbaino xtu Mari xnaꞌ Jakob xaꞌ más xi,
no xnaꞌ Che;
no xtu unaꞌ lë Salomé.
41 Rë unaꞌ reꞌ,
or stubi nzo Jesús Galilea,
ngwakë bixaꞌ tich Me,
no mileꞌ bixaꞌ mandad cheꞌn Jesús;
no nu más rë unaꞌ nzhin zeꞌ,
xaꞌ kwaꞌn ngwakë tich Jesús par yezh Jerusalén.
Or migaꞌch Jesús
42 No or ngwaꞌz ngubizh zhë Vier,
nguzublo zhë bispr cheꞌn sabd,
zhë kwaꞌn nayiꞌ kë men Israel zhiꞌn,
San Marcos 15:42-47
43 orzeꞌ tu miyiꞌ lë Che,
xaꞌ nzë yezh Arimatea,
no nak xaꞌ tu xaꞌ nak zhiꞌn xid rë gustis xaꞌ más nileꞌ mandad cheꞌn men Israel,
no nu miyiꞌ reꞌ kimbëz yo plo nileꞌ Dios mandad;
xaꞌ reꞌ mileꞌ rriez,
ngwa lo Pilat,
par ngunaꞌb xaꞌ kwerp cheꞌn Jesús.
44 Orzeꞌ xe miaꞌn Pilat or mbin xaꞌ,
lëꞌ Jesús ngut la;
orzeꞌ ngurezh xaꞌ capitán cheꞌn rë sondad kwaꞌn mikëꞌ Jesús lo krus,
par minabdiꞌzh xaꞌ,
nabei chi walika ngut la Jesús.
45 Or mbin xaꞌ:
“Walikai”,
nzhab capitán,
orzeꞌ mizaꞌ xaꞌ kwerp cheꞌn Jesús weiꞌ Che.
46 Orzeꞌ nguziꞌ Che tu lar yex;
no or milox mila xaꞌ kwerp lo krus,
orzeꞌ michël xaꞌ lar yex kwerp cheꞌn Jesús,
ngwakaꞌch xaꞌi leꞌn tu baꞌ kwaꞌn nadeꞌn la leꞌn pura ke;
no mitsaoꞌ xaꞌ roꞌi kun tu ke ro.
47 No Mari Madalen kun xtu Mari xnaꞌ Che,
une bixaꞌ plo migaꞌch kwerp cheꞌn Jesús.