Rë xaꞌ nane xmod nak mbël lo yibëꞌ, ngwatsiꞌ lo mëꞌdoꞌ
2
Lëꞌ Jesús ngol yezh Belén kwaꞌn ñaꞌn lazh men Judea;
leꞌn rë ngubizh zeꞌ nak Herodes rey.
Orzeꞌ nded pla men yezh Jerusalén,
rë xaꞌ nane xmod nak rë mbël lo yibëꞌ,
zit nzë bixaꞌ al nez plo nilen ngubizh,
no nzhab bixaꞌ:
2 ―¿Ma mëꞌdoꞌ kwaꞌn ngol zeꞌ,
mëꞌd nak rey cheꞌn rë men Israel?
Lëꞌno une tu mbël cheꞌn mëꞌd reꞌ lo yibëꞌ.
Nzë no par diꞌzh no nazhon mëꞌd.
3 Or mbin rey Herodes kureꞌ kun rë xaꞌ nzho yezh Jerusalén,
net bixaꞌ kwan leꞌ bixaꞌ.
4 Orzeꞌ mikan Herodes rë ngulëiꞌ xaꞌ más nileꞌ mandad,
no rë xaꞌ niluꞌ ley par minabdiꞌzh Herodes:
—¿Plo nak diꞌzh,
gal Krist?
5 Orzeꞌ nkab bixaꞌ:
―Yezh Belene,
kwaꞌn ñaꞌn lazh men Judea,
porke seꞌ nzhab tu xaꞌ midiꞌzh por Dios:
6 Lu,
yezh Belén,
kwaꞌn ñaꞌn lazh men Judea,
nagaktraꞌl tu yezh kwaꞌn natsakt kwaꞌn nzho xid rë yezh kwaꞌn tsak lazh men Judea,
lëꞌ xid rë men xaꞌ nzho lol,
roziꞌ tu xaꞌ leꞌ mandad,
par kina rë men da,
men Israel.
7 Orzeꞌ xlaꞌn ngurezh Herodes rë xaꞌ nane xmod nak mbël lo yibëꞌ,
par minabdiꞌzh Herodes,
pok ka nguluxoꞌb mbël zeꞌ,
8 no or mixëꞌl Herodes bixaꞌ par yezh Belén,
nzhab Herodes lo bixaꞌ:
―Wa go baꞌ par wanabdiꞌzh go cho ka mëꞌd baꞌ.
No or yazhël go mëꞌd,
ne go rëi lon,
par nu da yadiꞌzh nazhon mëꞌd.
9 No or milox mbin bixaꞌ kwaꞌn nzhab rey,
orzeꞌ nzha bixaꞌ.
No une bixaꞌ mbël lo yibëꞌ nzha dilant lo bixaꞌ;
no or ngulëz mbël,
nali laka zeꞌ nzho mëꞌd.
10 Or une rë xaꞌ zeꞌ ngulëz mbël,
dox mizak laxtoꞌ bixaꞌ.
11 Or nguio bixaꞌ leꞌn yoꞌ zeꞌ,
une bixaꞌ mëꞌd kun xnaꞌ mëꞌd,
orzeꞌ nguzuxib bixaꞌ lo mëꞌd mbaino midiꞌzh bixaꞌ nazhon mëꞌd.
No nguloꞌ bixaꞌ rë kwaꞌn nzhanu bixaꞌ,
rë or,
kun yaꞌl,
mbaino nits nax cheꞌn mirra.
Rë kureꞌ ngok kwaꞌn mizaꞌ bixaꞌ par lëꞌ mëꞌd.
12 Or milox ngok kureꞌ,
nzhab Dios lo bixaꞌ leꞌn mikaꞌl,
nayubretraꞌ bixaꞌ lo Herodes.
Orzeꞌ xaꞌ nez ña bixaꞌ par lazh bixaꞌ.
Che no Mari ña bixaꞌ kun mëꞌd lazh men Egipto
13 Mbaino or ña rë xaꞌ nane xmod nak mbël lo yibëꞌ,
orzeꞌ ngurulo tu ganj cheꞌn Dios lo Che leꞌn mikaꞌl,
nzhab ganj:
―Waxche,
biꞌy mëꞌd kun xnaꞌ mëꞌd,
bizë go lazh men egipto,
no baꞌgaka guyo go haxta na ka gani pok roꞌ go baꞌ;
lëꞌ Herodes kwaꞌn mëꞌd yeꞌn par gut xaꞌ mëꞌd.
14 Orzeꞌ lwegaꞌ ngwaxche Che,
nguzen xaꞌ mëꞌd yeꞌn kun xnaꞌ mëꞌd or yëꞌl zeꞌ,
nguio xaꞌ nez,
ña xaꞌ lazh men egipto,
15 no baꞌgaka nguio bixaꞌ haxta or ngut Herodes,
par ngok rë kwaꞌn milaꞌ Dios diꞌzh lo tu xaꞌ midiꞌzh por Dios or nzhab xaꞌ:
“Dizde lazh men egipto ngurezha Xgaꞌna.”
Mileꞌ Herodes mandad, gat rë mëꞌd yeꞌn
16 No or une Herodes,
lëꞌ rë xaꞌ nane xmod nak mbël lo yibëꞌ zeꞌ mikide xaꞌ,
dox miyiꞌxian Herodes,
no mileꞌ xaꞌ mandad,
gat rë nak mëꞌd xibyiꞌ kwaꞌn nzhap haxta chop liꞌn.
Nguzen Herodes dizde zhë kwaꞌn midiꞌzhnu xaꞌ rë xaꞌ kwaꞌn une nguluxoꞌb mbël zeꞌ lo yibëꞌ;
rë mëꞌd yeꞌn mbit xaꞌ kwaꞌn nzho yezh Belén mbaino rë mëꞌd kwaꞌn nzho más rë yezh kwaꞌn nzhin nakaꞌn yezh Belén,
17 par ngok widiꞌzh cheꞌn Dios kwaꞌn mizobniꞌ Jeremías,
rë widiꞌzh kwaꞌn nzhab seꞌ:
18 Dox tu yalnawin nzho lazh men Ramá,
dox niwin laxtoꞌ Raquel,
nzhoꞌn xaꞌ naye;
nibizhyë xaꞌ por rë xmëꞌd xaꞌ,
no nanetraꞌ yalnawin cheꞌn xaꞌ kwëz,
por niyen raꞌ rë xmëꞌd xaꞌ.
19 No or ngut Herodes,
xtu wëlt ngurulo tu ganj cheꞌn Dios lo Che leꞌn mikaꞌl lazh men egipto,
20 nzhab ganj:
―Waxche,
biꞌy mëꞌd kun xnaꞌ mëꞌd;
bizë go lazh men Israel;
lëꞌ rë xaꞌ nzhakla gut mëꞌd,
lëꞌ rë bixaꞌ ngut la.
21 Ngwaxche Che,
mbiꞌy xaꞌ mëꞌd kun xnaꞌ mëꞌd,
nguiubre bixaꞌ lazh men Israel.
22 Per or mbin Che,
lëꞌ Lao nileꞌ mandad lazh men Judea lugar cheꞌn Herodes xuz xaꞌ,
dox nizheb Che bi xaꞌ zeꞌ;
orzeꞌ nzhab Dios lo xaꞌ leꞌn mikaꞌl,
bi xaꞌ lazh men Galilea,
23 no or mizhin xaꞌ zeꞌ,
ña xaꞌ tu yezh lë Nazaret,
par ngok rë widiꞌzh kwaꞌn midiꞌzh tu profet or nzhab xaꞌ:
“Lëꞌ xaꞌ ruꞌlë xaꞌ nzë yezh Nazaret.”