Widiꞌzh cheꞌn Juan, xaꞌ nililëiꞌ men leꞌn nits
3
Leꞌn rë ngubizh zeꞌ,
Juan xaꞌ nililëiꞌ men leꞌn nits,
nguio xaꞌ leꞌn yuo bizh kwaꞌn ñaꞌn lo yuo cheꞌn men Judea,
kidiꞌzh xaꞌ lo rë men,
2 nzhab xaꞌ:
―Bilaꞌ go rë kwaꞌn gat lëꞌ nak go;
lëꞌ zhë nzhazhin la,
ne go xmod ban go kun Dios.
3 No Juan reꞌ mizeꞌt Isaías,
tu xaꞌ midiꞌzh por Dios chi tiemp or nzhab xaꞌ:
Dizde leꞌn yuo bizh,
naye kibizhyë tu xaꞌ,
kidiꞌzh:
“Bizuxkwaꞌ go laxtoꞌ go par Dios;
bilaꞌ go rë kwaꞌn gat lëꞌ kwaꞌn nak go.”
4 Nakxaoꞌ xab Juan kun yich cheꞌn kamey,
no naziꞌ tu sint yid laxtoꞌ xaꞌ;
kwaꞌn nzhao Juan nak nab tsa xanch kun mizhin cheꞌn rë mbëz dan.
5 Rë men reꞌ ñayon kwaꞌn nidiꞌzh Juan:
rë men yezh Jerusalén kun rë men xaꞌ nzho lazh men Judea,
mbaino rë men xaꞌ nzho nakaꞌn roꞌ youꞌ Jordán.
6 Or nixoꞌbdol bixaꞌ lo Juan,
niliꞌlëiꞌ Juan bixaꞌ leꞌn youꞌ Jordán.
7 No or une Juan,
nayax rë men fariseo kun nayax men saduceo,
nzë bixaꞌ par lilëiꞌ Juan bixaꞌ,
orzeꞌ nzhab Juan:
―¡Rë go,
men nakap,
xaꞌ nak nela mbëꞌl nayiꞌ gaꞌ!
¿Cho ne lo go,
nab por gaklëiꞌ go,
leꞌ go gan lo kwaꞌn nazheꞌb kwaꞌn xëꞌl Dios par rë men kwaꞌn nzëꞌb xki lo Me?
8 Nal biluꞌ go,
walika milaꞌ go rë kwaꞌn gat lëꞌ nak go,
9 mbaino nagabt go,
yent kwaꞌn leꞌ Dios kun go por nzë go ben cheꞌn Abraham,
porke nin lo go,
haxta kun rë ke reꞌ,
gak leꞌ Dios,
gake rë men xaꞌ nzë ben cheꞌn Abraham,
10 no lëꞌ yiꞌb ya nzo la xan rë ya,
par choꞌi rë ya kwaꞌn gat nizaꞌ xlë wen,
orzeꞌ yole.
11 Walika,
nab tsa nililë̱i̱ꞌña̱ men leꞌn nits or walika nilaꞌ bixaꞌ rë kwaꞌn gat lëꞌ nak bixaꞌ lo Dios.
Per nzho xtu xaꞌ,
xaꞌ nzadkë ticha,
xaꞌ reꞌ nililëiꞌ men kun Sprit cheꞌn Dios,
no más tsak xaꞌ lon.
Per ni gat ñal lan yalyid cheꞌn xaꞌ niꞌ xaꞌ.
12 No nzen la xaꞌ pal par tsumbe xaꞌ triu,
no tu lad koꞌ xaꞌ yix.
Or lox tsumbe xaꞌi,
orzeꞌ kan xaꞌ triu par kichaoꞌ xaꞌi,
per lëꞌ yix zëꞌk xaꞌ plo gat ñalt bël.
Ngoklëiꞌ Jesús youꞌ Jordán
13 Nalse nzha Jesús plo nzo Juan par lilëiꞌ Juan Me leꞌn nits;
dizde lazh men Galilea nguroꞌ Me par mizhin Me roꞌ youꞌ Jordán plo nzo Juan.
14 Or galo laka nanet Juan lilëiꞌ Juan Jesús,
nzhab Juan:
―¿Taxa na lilë̱i̱ña̱l?
¡Maska lu lilëiꞌ da!
15 Per nzhab Jesús:
―Por nal,
laꞌ be gake seꞌ,
par leꞌ be rë kwaꞌn nzhakla Dios gak.
Orzeꞌ mililëiꞌ Juan Jesús.
16 No or milox ngoklëiꞌ Jesús,
tuli nguroꞌ Me leꞌn nits,
lëꞌchi mixaꞌl lo yibëꞌ,
une Jesús ngulayët Sprit cheꞌn Dios yek Me,
nela tu palom gaꞌ,
17 lëꞌchi mien tu widiꞌzh dizde lo yibëꞌ kwaꞌn nzhab:
―Xaꞌ reꞌ Xgaꞌna xaꞌ nazhiꞌ da;
dox nizak laxtoꞌn por xaꞌ reꞌ.