Miliwen Jesús tu men ngwazhë di ki
14
No ngol tu zhë kwaꞌn nayiꞌ kë men Israel zhiꞌn,
ngwatao Jesús lizh tu men fariseo,
xaꞌ nileꞌ mandad,
no rë men zhin zeꞌ kilaꞌch bixaꞌ,
nabei kwan leꞌ Jesús.
San Lucas 14:1-24
2 Seꞌ kileꞌ bixaꞌ porke lo Jesús nzo tu miyiꞌ nzhakne,
ngwazhë di ki.
3 Orzeꞌ minabdiꞌzh Jesús lo rë xaꞌ niluꞌ ley,
no lo rë men fariseo kwaꞌn nzhin zeꞌ,
nzhab Jesús:
―¿Chi zak liwena tu men nzhakne,
zhë kwaꞌn nayiꞌ kë men Israel zhiꞌn,
o nagakte?
4 Per yent kwan ngakab bixaꞌ.
Orzeꞌ nguzen Jesús yaꞌ xaꞌ reꞌ,
mbaino miliwen Jesús xaꞌ,
orzeꞌ nzhab Me lo xaꞌ:
“Bizë lizhal.”
5 Mbaino lo rë men fariseo zeꞌ nzhab Jesús:
―No chi tu go kinu tu xin,
o tu ngoꞌn,
no chi ngula ma leꞌn zo,
ter zhë kwaꞌn nayiꞌ kë men Israel zhiꞌn,
orzeꞌ,
¿chi nakoꞌt go ma lwegaꞌ?
6 Orzeꞌ yent kwan ngakab bixaꞌ lo Jesús.
Rë xaꞌ nzha jwandang
7 No or une Jesús,
rë xaꞌ kwaꞌn ngwane xaꞌ lo par nzë jwandang,
or nizhin bixaꞌ,
nibe bixaꞌ plo nizob pura xaꞌ ro par zob bixaꞌ,
orzeꞌ nzhab Jesús:
8 ―Or kwezh tu men go ya go tu jwandang,
nazobt go plo nizob rë men xaꞌ ro,
nzha ska zhin xtu xaꞌ más tsak lo go,
9 no xaꞌ ngurezh go reꞌ zubi lo go par ne xaꞌ:
“Watso par zob xaꞌ reꞌ”,
no orzeꞌ lëꞌ go tula,
mbaino haxta tras zob go.
10 Más wen haxta tras zob go or kwezh men go,
orzeꞌ lëꞌ xaꞌ ngurezh go ne lo go:
“Guded lareꞌ weech,
reꞌ ñal zobal”,
orzeꞌ rë men xaꞌ nzobal kun lëꞌ lo mes,
lëꞌ bixaꞌ leꞌ kasal,
11 porke xaꞌ kwaꞌn nzhakla leꞌ men kas,
per ni nawiꞌ men lo xaꞌ;
mbaino xaꞌ kwaꞌn gat nizi ya,
lëꞌ men leꞌ kas xaꞌ.
12 Orzeꞌ,
nzhab Jesús lo xaꞌ kwaꞌn ñanu Jesús lizh xaꞌ:
―Or zaꞌl tu kwaꞌn gao men,
nakwezhtal xaꞌ nichëꞌlal,
ni wechal,
ni melizhal,
ni tu men rrik;
porke lëꞌ rë xaꞌ reꞌ,
seꞌska leꞌ bixaꞌ kun lu,
par kix bixaꞌi lol.
13 Mejor or zaꞌl tu kwaꞌn gao men,
gurezh rë xaꞌ prob,
rë xaꞌ maꞌnk,
no rë xaꞌ ne niꞌ,
mbaino rë xaꞌ nikal lo,
14 par yal wen;
porke rë xaꞌ reꞌ,
nagakt kixe lol;
per Dios neꞌ tu kwaꞌn kaꞌl or ruban rë men xaꞌ nileꞌ kwaꞌn nzhakla Dios.
Kwent cheꞌn tu xcheꞌ ro
15 Or mbin tu rë xaꞌ kwaꞌn nzob lo mes zeꞌ kureꞌ,
orzeꞌ nzhab xaꞌ lo Jesús:
―¡Nazhon nzha rë xaꞌ gao plo nileꞌ Dios mandad!
16 Orzeꞌ nzhab Jesús:
―Nguio tu miyiꞌ mizaꞌ tu xcheꞌ ro gao rë men,
orzeꞌ mileꞌ xaꞌ mandad yiꞌd nayax men.
17 Or ngol or gao bixaꞌ,
mixëꞌl xaꞌ nileꞌ mandad zeꞌ tu mos cheꞌn xaꞌ,
par nzhab xaꞌ lo rë men xaꞌ nak diꞌzh yiꞌd:
“Dëꞌ go nal,
porke lëꞌ yeꞌn ya nzhin la.”
18 Per rë bixaꞌ tutsa miaꞌnkë bixaꞌ diꞌzh.
Xaꞌ galo nzhab:
“Milox nguzin tlëꞌ yuo,
lëꞌda nzha za wëlt loi.
Leꞌ dispense,
nagakt yala.”
19 No xtu xaꞌ nzhab:
“Lëꞌda nguziꞌ gaiꞌ nez ngoꞌn,
lëꞌda nzhaleꞌ preb ma;
leꞌ dispense,
nagakt yala.”
20 No lëꞌ xtu xaꞌ nzhab:
“Lëꞌ jwandang da laore ngok laka;
kuzeꞌ nagakt yala.”
21 No or miëk mos zeꞌ,
nzhab xaꞌ rë kureꞌ lo xaꞌ zaꞌ kwaꞌn gao men reꞌ.
Orzeꞌ dox niyiꞌxian xaꞌ,
no nzhab xaꞌ lo mos zeꞌ:
“Leꞌ purad,
leꞌn rë nez ro cheꞌn yezh reꞌ,
no rë bered,
par wakaꞌ rë men xaꞌ prob,
no rë xaꞌ maꞌnk,
mbaino rë xaꞌ nikal lo,
no rë xaꞌ koꞌj.”
22 Guzhël la zeꞌ nzhab mos:
“Señor,
lëꞌda mile la kwaꞌn mileꞌl mandad,
per stubi nzho lugar.”
23 Orzeꞌ nzhab xaꞌ nileꞌ mandad reꞌ:
“Wa leꞌn rë nez,
mbaino wa roꞌ rë yalo,
no jwers guzh yiꞌd rë men,
par yazhë lizha.
24 Kuzeꞌ nin lo go,
ni tu rë xaꞌ kwaꞌn ngurezha galo baꞌ,
gaoxcheꞌt lizha.”
Xmod nak tu men walika men cheꞌn Jesukrist
25 No dox nayax men nzhakë tich Jesús,
orzeꞌ miëk Me,
miwiꞌ Me lo bixaꞌ,
nzhab Me:
San Lucas 14:25-35
26 ―Chi nzho tu go nzadkë ticha,
no más nileꞌ go por xuz go,
o por xnaꞌ go,
o por tsaꞌ go,
o por xmëꞌd go,
o por wech go,
o por bizan go,
o nileꞌ go más por rë kwaꞌn nileꞌ go xigab;
no chi más nazhiꞌ go rë kubaꞌ lon,
orzeꞌ nagakt gak go tu men da.
27 Mbaino nu chi tu go nzadkë ticha,
no nizheb go zakzi go o gat go por nak go men da;
no chi saꞌ nak go,
pwes nagakt gak go men da.
28 O chi nzho tu go nileꞌ xigab kuxkwaꞌ go tu yoꞌ nayax pis,
¿gat galo laka zob go par leꞌ go xigab,
plak dimi gal par yaloi?,
29 porke chi zob go nab tsa simient cheꞌne,
naloꞌxt go kuxkwaꞌ goi,
orzeꞌ lëꞌ rë men xizhnu go,
30 gab bixaꞌ:
“Biwiꞌ,
nangakt ngaloꞌx xaꞌ ngazuxkwaꞌ xaꞌ lizh xaꞌ.”
31 O chi tu rey nzhakla dil kun xtu rey,
¿gat galo laka nakiꞌn leꞌ xaꞌ xigab,
chi zixek chiꞌ mil sondad cheꞌn xaꞌ lo gal mil sondad cheꞌn xtu rey xaꞌ nidil xaꞌ?
32 No chi niwiꞌ xaꞌ naxekt xpen xaꞌ,
orzeꞌ antis di ke yiꞌd xtu rey par dil xaꞌ,
lëꞌ xaꞌ xëꞌl abis par kwëz dil.
33 Seꞌska,
chi nzho tu go xaꞌ nak men da,
per más nazhiꞌ go rë kwaꞌn lon,
rë kwaꞌn kinu go baꞌ,
pwes nagakt gak go men da.
Or gat nazhiꞌraꞌ zed
34 Nu nzhab Jesús: