3 orzeꞌ nkili Jesús yek tu yiꞌ,

zeꞌ nguzob Me kun rë men cheꞌn Me;

4 no mer la gal lani Pask kwaꞌn nileꞌ rë men Israel.

5 Or une Jesús dox men nzhakë tich Me,

orzeꞌ nzhab Me lo Lip:

―¿Plo ziꞌ be kwaꞌn gao rë men reꞌ?

6 Kizenbeꞌ Me Lip par nabei kwan gab xaꞌ (kiwiꞌ Me xmod nak Lip),

porke lëꞌ Jesús nane la kwan leꞌ Me,

7 orzeꞌ nzhab Lip:

―Ni di dimi kwaꞌn leꞌ men gan chop gayoꞌ ngubizh lo zhiꞌn nagalte ziꞌ met kwaꞌn gao rë men reꞌ.

8 No tu men cheꞌn Jesús xaꞌ lë Ndres wech Simón Per,

nzhab xaꞌ lo Jesús:

9 ―Tu mbwin nzo reꞌ kinu gaiꞌ pan sebad,

mbaino chop mbël,

per,

¿chi zal kureꞌ par rë men reꞌ?

10 Orzeꞌ nzhab Jesús lo rë men cheꞌn Me:

―Guzh go lo rë men baꞌ zob.

Mbaino dox nzhiꞌb yixyë zeꞌ,

orzeꞌ rë men nguzob,

no nab tsa xaꞌ miyiꞌ paste gaiꞌ mil bixaꞌ,

11 orzeꞌ nguzen Jesús za gaiꞌ pan zeꞌ;

or milox mizaꞌ Me xkix lo Xuz Me Dios,

orzeꞌ mizaꞌ Mei kaꞌ rë men cheꞌn Me,

par ndiꞌz bixaꞌi xid rë men nayax zeꞌ,

no seꞌska mileꞌ Jesús kun rop mbël zeꞌ;

rë men ndao haxta plo ngwazhë bixaꞌ,

12 no or unela ndao bixaꞌ,

orzeꞌ nzhab Jesús lo rë men cheꞌn Me:

―Bikan go rë bilao kwaꞌn miaꞌn baꞌ,

par yent kwan nu.

13 Orzeꞌ mikan bixaꞌ rë bilao kwaꞌn miaꞌn lo kwaꞌn ndao bixaꞌ,

michizhë bixaꞌ tu dusen kardor win.

14 Or une rë men reꞌ kwaꞌn mileꞌ Jesús,

orzeꞌ nzhab bixaꞌ lo wech bixaꞌ:

―Walika,

profet xaꞌ reꞌ,

xaꞌ nidiꞌzh por Dios,

mbaino xaꞌ nak diꞌzh zhin yizhyuo reꞌ.

15 No lëꞌ Jesús nane la,

lëꞌ rë men zeꞌ nzhakla,

ter nane Me,

lëꞌ bixaꞌ weiꞌ Me par gak Me rey lo bixaꞌ.

Kuzeꞌ nguiubchi Me lo bixaꞌ,

ña Me yek yiꞌ,

zeꞌ miaꞌn nab Me.

16 No or ngula yëꞌl,

ngulayët rë men cheꞌn Jesús roꞌ lagun,

17 zeꞌ nkë bixaꞌ leꞌn tu bark par ña bixaꞌ xtu roꞌ nits nez yezh Capernaúm,

per ngula la yëꞌl orzeꞌ,

no lëꞌ Jesús nagat yubre Me lo bixaꞌ,

18 lëꞌchi orzeꞌ nguroꞌ tu mbi ro leꞌn nits plo ña bixaꞌ,

19 no ñazë la bixaꞌ paste gaiꞌ o xoꞌp mil metr leꞌn nits,

lëꞌchi une bixaꞌ Jesús,

ñëdzë Me lo nits,

nzhazhin Me lo bixaꞌ,

orzeꞌ mizheb bixaꞌ,

20 per nzhab Jesús lo bixaꞌ:

―¡Ka nai,

nazhebt go!

21 Orzeꞌ dox nizak laxtoꞌ bixaꞌ nguio Jesús leꞌn bark kun lëꞌ bixaꞌ,

orzeꞌ lwegaꞌ mizhin bixaꞌ yezh plo nzha bixaꞌ.

22 No xtu riyëꞌl,

lëꞌ rë xaꞌ nzhin xtu roꞌ nits plo nguroꞌ rë men cheꞌn Jesús zeꞌ,

une bixaꞌ,

lëꞌ rë men cheꞌn Jesús ña leꞌn tugaka bark kwaꞌn nzob zeꞌ,

per nangabit Jesús kun rë men cheꞌn Me,

23 no kwantgatsa orzeꞌ,

mizhin zipla bark kwaꞌn nzë yezh Tiberias,

no zeꞌ ñaꞌn gax laka plo mizaꞌ Jesús pan ndao rë men nayax zeꞌ,

or mizaꞌ Me xkix lo Dios por lëꞌi.

24 No or une rë men zeꞌ,

yent Jesús no ni rë men cheꞌn Me,

orzeꞌ nkë rë men reꞌ leꞌn pla bark par nzhakwaꞌn bixaꞌ Jesús al nez yezh Capernaúm.

25 No or mizhin bixaꞌ xtu roꞌ nits,

zeꞌ mizhëꞌl bixaꞌ Jesús,

orzeꞌ nzhab bixaꞌ:

―Maestr,

¿pok ka mizhinal reꞌ?

26 Orzeꞌ nzhab Jesús lo bixaꞌ:

―Walika kwaꞌn nin lo go,

kikwaꞌn go da por ndao go haxta plo une go;

no gat lëꞌt por une go cho ka dai,

por zhiꞌn nazhon kwaꞌn une go milen baꞌ.

27 Naleꞌt go beꞌs xigab por kwaꞌn nzhao go yizhyuo reꞌ,

sino ke bileꞌ go xigab por kwaꞌn nayot lox,

kwaꞌn leꞌ ban men dubtaꞌ kun Dios.

Kwaꞌn gao go reꞌ nak kwaꞌn ninen kaꞌ go,

na nak Xgaꞌn Dios no nak ska da tu men yizhyuo,

porke lëꞌ Xuza Dios miluꞌ la lo rë men cho ka da.

28 Orzeꞌ minaꞌbdiꞌzh rë men zeꞌ:

―¿Xmod leꞌ no par leꞌ no kwaꞌn nzhakla Dios?

29 Orzeꞌ nzhab Jesús:

―Nabtsa kwaꞌn nzhakla Dios leꞌ go,

yila go Me kwaꞌn mixëꞌl Dios yizhyuo reꞌ.

30 Orzeꞌ minaꞌbdiꞌzh bixaꞌ lo Jesús,

nzhab bixaꞌ:

―¿Kwan tu kwaꞌn nazhon leꞌl lo no,

nes yila no lu?,

mbaino,

¿cho paꞌ zhiꞌn wen lëꞌl par no?

31 Rë xuz no xaꞌ nzhala,

ndao bixaꞌ pan kwaꞌn lë maná or nguzë bixaꞌ leꞌn yuo bizh,

nela xmod nzobniꞌ ka lo Yech cheꞌn Dios:

“Dios mizaꞌ pan kwaꞌn ngula lo yibëꞌ,

ndao bixaꞌ.”

32 Orzeꞌ nzhab Jesús:

―Walika kwaꞌn nin lo go,

gat lëꞌt Muisés mizaꞌ pan kwaꞌn ngula lo yibëꞌ ndao bixaꞌ,

sino ke lëꞌ Xuza Dios mizaꞌi;

per nal,

lëꞌ Xuza Dios mizaꞌ kwaꞌn walika pan kwaꞌn nzë lo yibëꞌ,

33 porke lëꞌ pan kwaꞌn nzë lo yibëꞌ reꞌ,

pan reꞌ nizaꞌ yalnaban kaꞌ rë men yizhyuo.

34 Orzeꞌ nzhab bixaꞌ lo Jesús:

―Lëꞌ go,

neꞌu pan reꞌ gao no dubtaꞌ.

35 Orzeꞌ nzhab Jesús:

―Lëꞌda nak pan kwaꞌn nizaꞌ yalnaban;

rë men xaꞌ gak men da,

nayotraꞌ laꞌn bixaꞌ;

mbaino rë men xaꞌ yila da,

nayotraꞌ zëiꞌ laxtoꞌ bixaꞌ,

36 per lëꞌda ni la,

ter nane go cho da,

per nayilat go da.

37 Rë men xaꞌ ngule Xuza gak men da,

lëꞌ bixaꞌ yiꞌd lon;

mbaino xaꞌ yiꞌd lon,

nayot zhë kubchin xaꞌ lon.

38 Nzhala lo yibëꞌ,

gat lëꞌt par len kwaꞌn nzhaklan yizhyuo reꞌi,

sino nzhala par len kwaꞌn nzhakla Xuzai,

Me nzho lo yibëꞌ.

39 No kureꞌ nak kwaꞌn nzhakla Xuza,

Me mixëꞌl da:

Rë men xaꞌ ngule Xuza gak men da,

nayot lox ni tu bixaꞌ lo Dios;

na le ruban rë bixaꞌ or yala xtu wëlt,

40 porke kureꞌ nak xigab cheꞌn Xuza Me nzho lo yibëꞌ:

Rë men xaꞌ nilibeꞌ cho da no ñila bixaꞌ da,

lëꞌ bixaꞌ ban dubtaꞌ kun Dios,

mbaino len ruban bixaꞌ or yala xtu wëlt.

41 Orzeꞌ por kwaꞌn nzhab Jesús:

“Na nak pan kwaꞌn nzë lo yibëꞌ”,

nguzublo kidiꞌzh rë men Israel,

gat lëꞌ por Jesús,

rë xaꞌ nak zhiꞌn,

42 nzhab bixaꞌ:

―¿Chi gat lëꞌt Jesús reꞌ,

xgaꞌn Che?

Be nilibeꞌ ka xuz xaꞌ reꞌ no xnaꞌ xaꞌ.

¿No chon kidiꞌzh xaꞌ,

lëꞌ xaꞌ nzë lo yibëꞌ?

43 Orzeꞌ nzhab Jesús lo bixaꞌ:

―Nadiꞌzhtraꞌ go da gat lëꞌ.

44 Ni tu go nagakt gak men da,

chi gat lëꞌ Xuza Me mixëꞌl da yiꞌdnu go lon;

mbaino rë xaꞌ nak men da,

na le ruban bixaꞌ or yala xtu wëlt,

45 porke seꞌ ka mizobniꞌ rë xaꞌ midiꞌzh por Dios:

“Dios tseꞌd rë men.”

Kuzeꞌ,

rë men xaꞌ nzhon roꞌ Dios no tseꞌd bixaꞌ lo Me,

rë xaꞌ zeꞌ gak men da.

46 Gat lëꞌt por nin kureꞌ kidizha,

nzho cho ya une la lo Xuza;

nab tsa Xgaꞌn Dios Me nzë lo yibëꞌ,

une Xuz.

47 Walika kwaꞌn nin lo go;

xaꞌ yila da,

xaꞌ zeꞌ kinu la yalnaban dubtaꞌ kun Dios.

48 Na nak pan kwaꞌn nizaꞌ yalnaban par rë men,

xaꞌ yila da.

49 Ter ndao rë xuz go xaꞌ tiemp,

pan kwaꞌn lë maná or nkizë bixaꞌ leꞌn yuo bizh,

no ngut ka bixaꞌ;

50 per rë men xaꞌ gao yub pan kwaꞌn nzë lo yibëꞌ reꞌ,

nayotraꞌ gat bixaꞌ.

51 No na nak pan kwaꞌn nzë lo yibëꞌ reꞌ,

kwaꞌn nizaꞌ yalnaban par dubtaꞌ kaꞌ men;

no xaꞌ gao pan reꞌ,

lëꞌ xaꞌ ban dubtaꞌ kun Dios,

no pan kwaꞌn zan gao men reꞌ nak kwerp da kwaꞌn zan par rë men yizhyuo.

52 Orzeꞌ rë xaꞌ nzhin zeꞌ,

xaꞌ nzo lo rë men Israel,

nguzublo kichëꞌlroꞌ mis lëꞌ bixaꞌ,

nzhab bixaꞌ lo wech bixaꞌ:

―¡Taxa!,

¿xmod neꞌ xaꞌ reꞌ kwerp cheꞌn xaꞌ gao be?

53 Orzeꞌ nzhab Jesús:

―Walika kwaꞌn nin lo go,

chi lëꞌ go nagao kwerp cheꞌn Xgaꞌn Dios,

Me nak ska tu men yizhyuo,

no chi nago go ren cheꞌn Me,

nabant go dubtaꞌ kun Dios.

54 Rë xaꞌ gao kwerp da no go xaꞌ ren da,

men reꞌ kinu yalnaban dubtaꞌ kun Dios;

mbaino len ruban xaꞌ or yala xtu wëlt,

55 porke lëꞌ kwerp da nak wali paꞌ pan kwaꞌn gao rë men,

no ren da nak kwaꞌn wali paꞌ nakiꞌn go rë men.

56 Men xaꞌ gao kwerp da mbaino go xaꞌ ren da,

men reꞌ dubtaꞌ zo kun na,

no na kun lëꞌ xaꞌ.

57 Lëꞌ Xuza,

Me mixëꞌl da yizhyuo reꞌ,

kinu yalnaban par dubtaꞌ,

no por lëꞌ Me kinun yalnaban.

Seꞌska,

rë men xaꞌ gao kwerp da,

dubtaꞌ kinu xaꞌ yalnaban por da.

58 Kureꞌ nak pan kwaꞌn nzë lo yibëꞌ,

no gat nakte nela pan maná kwaꞌn ndao rë xuz go,

xaꞌ nzhala or nkizë bixaꞌ leꞌn yuo bizh,

mbaino ngut ka bixaꞌ.

Per xaꞌ gao pan kwaꞌn nzë lo yibëꞌ reꞌ,

xaꞌ reꞌ ban dubtaꞌ kun Dios.

59 Rë kureꞌ midiꞌzh Jesús or kiluꞌ Me widiꞌzh cheꞌn Dios leꞌn yoꞌ plo nitseꞌd rë men Israel widiꞌzh cheꞌn Dios,

kwaꞌn nzob yezh Capernaúm.

60 No or mbin rë men cheꞌn Jesús widiꞌzh reꞌ,

nzhab bixaꞌ:

―Dox nagan widiꞌzh reꞌ par zobyek mene;

pas yent cho gak zobyeke.

61 Or une Jesús,

lëꞌ rë men cheꞌn Me kidiꞌzh gat lëꞌ por kwaꞌn midiꞌzh Me,

kuzeꞌ nzhab Me:

―¿Chi por kwaꞌn midizha baꞌ,

nzho go laꞌ,

nayilatraꞌ go da?

62 ¿Per chi ne go,

kilin plo nzhoꞌn or naga yala yizhyuo reꞌ?

63 Lëꞌ Sprit cheꞌn Dios nizaꞌ yalnaban kaꞌ men;

chi gat lëꞌ por Sprite,

yent kwaꞌn zuꞌ kwerp cheꞌn men;

no widiꞌzh kwaꞌn nin lo go nzë por Sprit cheꞌn Dios,

mbaino nileꞌi niban men dubtaꞌ kun Dios.

64 Per xid go stubi nzho zipla go xaꞌ gat ñilat widiꞌzh kwaꞌn nidizha.

Lëꞌ Jesús nane la dizde or galo,

cho rë xaꞌ gat ñilat rë kwaꞌn nidiꞌzh Me,

mbaino cho xaꞌ chi Me par gat Me,

65 orzeꞌ nzhab Jesús:

―Kuzeꞌ nin lo go,

yent cho gak,

gak men da chi gat lëꞌt por Xuza zhin bixaꞌ lon.

66 No dizde orzeꞌ nayax rë xaꞌ nzhakë tich Jesús,

milaꞌ bixaꞌ,

nangakëtraꞌ bixaꞌ tich Me.

67 Orzeꞌ minaꞌbdiꞌzh Jesús lo za tu dusen men cheꞌn Me,

nzhab Me:

―Mbaino go gaꞌ,

orzeꞌ,

¿chi nu go laꞌ da?

68 Lëꞌchi orzeꞌ nzhab Simón Per:

―Señor,

¿cho tich yakë no?,

porke nab gaka go kinu widiꞌzh kwaꞌn nileꞌ ban men dubtaꞌ kun Dios,

69 porke no ngwayila la go,

mbaino nane ka no,

go nak Krist,

Me Nazhon cheꞌn Dios.

70 Orzeꞌ nzhab Jesús:

―Ter na ngule za tu dusen go,

¡per tu go,

nzho Mizhab laxtoꞌ!

71 Kureꞌ midiꞌzh Jesús por Judas,

xgaꞌn Simón Iscariote;

porke lëꞌ Judas nak xaꞌ michi Jesús par ngut Me,

no ter nu Judas nzho xid za tu dusen men cheꞌn Me.