Jesús miliyak tu xaꞌ gakt win zhë kwaꞌn nileꞌ rë men Israel diskans
5
Or milox ngok rë kureꞌ,
nguio tu lani cheꞌn rë men Israel,
kuzeꞌ nzha Jesús yezh Jerusalén.
2 No yezh Jerusalén zeꞌ,
nikë tu tank nits gax laka plo lë Puert cheꞌn mbëkxiꞌl;
tank reꞌ lë Betzata kun widiꞌzh cheꞌn men hebreo,
mbaino kinui gaiꞌ corredor.
Jesús cura en Sábado (Juan 5.1-15)
3 Roꞌ rë corredor zeꞌ nzhin nayax men nzhakne,
men nikal-lo,
no men koꞌj,
mbaino rë men mibizh tu plo;
zeꞌ nax bixaꞌ kimbëz bixaꞌ or win nits leꞌn tank zeꞌ,
4 porke kad pok nilali tu ganj cheꞌn Dios par nikwin ganj zeꞌ nits kwaꞌn nzho leꞌn tank,
no men galo laka ño dub niwin nits,
ñak xaꞌ wanei cho yalyizh nizak xaꞌ.
5 No zeꞌ nax tu miyiꞌ nzhakne nzhala galbichiꞌ bixon liꞌn.
6 Or une Jesús nax xaꞌ zeꞌ,
lëꞌ Jesús nane la,
dox nzhala nzhakne xaꞌ,
orzeꞌ nzhab Jesús lo xaꞌ:
―¿Chi nzhaklal yakal?
7 Orzeꞌ nkab xaꞌ:
―Lëꞌ go,
yent cho gaknu da yoꞌn leꞌn tank or niwin nits,
kad or nzhaklan yoꞌn,
xtu xaꞌ ño galo lon.
8 Orzeꞌ nzhab Jesús:
―Waxche,
gulits kwaꞌn naxal lo,
no bizë.
9 Orzeꞌ lwegaꞌ miak miyiꞌ zeꞌ,
ngulits xaꞌ kwaꞌn ngoꞌt xaꞌ lo,
no nguzublo nguzë xaꞌ,
mbaino zhë zeꞌ,
zhë kwaꞌn nayiꞌ kë men Israel zhiꞌn.
10 Orzeꞌ nzhab pla men Israel lo miyiꞌ miak reꞌ:
―Nalzhë,
zhë nileꞌ met diskans,
kuzeꞌ gat ñalt weiꞌyal kwaꞌn ngoꞌtal lo baꞌ.
11 Orzeꞌ nzhab miyiꞌ zeꞌ lo bixaꞌ:
―Xaꞌ miliyak da,
ne lon:
“Gulits kwaꞌn naxal lo baꞌ,
no bizë.”
12 Orzeꞌ minaꞌbdiꞌzh bixaꞌ:
―¿Cho xaꞌ ne lol:
“Gulits kwaꞌn ngoꞌtal lo baꞌ,
no bizë”?
13 Per miyiꞌ reꞌ nanet xaꞌ cho miliyak xaꞌ,
porke lwegaꞌ nguzëꞌb Jesús xid rë men nzhin zeꞌ.
14 Guzhëla zeꞌ,
mizhëꞌl Jesús miyiꞌ reꞌ leꞌn yadoꞌ,
orzeꞌ nzhab Jesús lo xaꞌ:
―Biwiꞌ,
lëꞌl miak la nal,
naleꞌtraꞌl kwaꞌn gat lëꞌ lo Dios,
par nazakal xtu kwaꞌn más nazheꞌb.
15 Orzeꞌ ña miyiꞌ zeꞌ,
no ngwayab xaꞌi lo rë men xaꞌ nzo lo rë men Israel,
lëꞌ Jesús miliyak xaꞌ.
16 No por kuzeꞌ,
ngokla bixaꞌ ngazen bixaꞌ Me,
por miliyak Me men zhë kwaꞌn nileꞌ rë men Israel diskans,
Jesús defiende su autoridad (Juan 5.16-47)
―Lëꞌ Xuza nu zhë reꞌ nikë Me zhiꞌn,
kuzeꞌ nu da nikë zhiꞌn zhë reꞌ.
18 Por kwaꞌn nzhab Jesús reꞌ,
más ngokla rë men Israel zeꞌ,
ngagal bixaꞌ Me,
gat lëꞌt nab por nikë Me zhiꞌn zhë kwaꞌn nileꞌ rë men Israel diskanse,
sino ke nu por nzhab Me:
“Lëꞌ Dios nak Xuza”,
mbaino nu Me nileꞌ rë kwaꞌn nileꞌ Dios.
Xgaꞌn Dios nileꞌ mandad nela Xuz Me gaꞌ
19 Orzeꞌ nzhab Jesús:
―Walika kwaꞌn nin lo go,
nagakt leꞌ Xgaꞌn Dios ni tu kwaꞌn xigab yek,
nab tsa nileꞌ Me rë kwaꞌn niwiꞌ Me nileꞌ Xuz Me,
no rë kwaꞌn nileꞌ Xuz Me nileꞌ Me.
20 Lëꞌ Xuz Me nazhiꞌ Me,
kuzeꞌ rë kwaꞌn nileꞌ Xuz Me,
niluꞌ Xuz Me lo Me,
mbaino lëꞌ Xuz Me laore luꞌ kwaꞌn más nazhon lo Me,
kwaꞌn leꞌ yaꞌn xe go tuli,
21 no nela nileꞌ Xuz Me niruban rë men,
par nizaꞌ Dios yalnaban kaꞌ bixaꞌ,
seꞌska nizaꞌ Xgaꞌn Dios yalnaban kaꞌ men,
xaꞌ nzhakla Me zaꞌ Mei,
22 no Xuz Me nagabt kwan ñal rë men por kwaꞌn nzëꞌb xki bixaꞌ,
sino ke lo Xgaꞌn Me milaꞌ Me kureꞌ,
par lëꞌ Xgaꞌn Me gab kwan gak kun tu gaꞌ rë men por kwaꞌn nzëꞌb xki bixaꞌ,
23 nes par rë men gap kwent kwaꞌn nidiꞌzh Xgaꞌn Dios nela xmod nzhap men kwent yub paꞌ Dios,
Me mixëꞌl Me reꞌ.
No xaꞌ nazoꞌb diꞌzh kwaꞌn nidiꞌzh Xgaꞌn Dios,
gat lëꞌt kun Xgaꞌn Dios mileꞌ xaꞌ kureꞌ sino ke kun yub paꞌ Diose.
24 No nzhab Jesús:
—Dox wali kwaꞌn nin,
xaꞌ gon kwaꞌn nidizha,
mbaino yila xaꞌ Me mixëꞌl da,
por kureꞌ ban xaꞌ kun Dios par dubtaꞌ.
No nanaꞌbtraꞌ Dios kwent lo xaꞌ por kwaꞌn mileꞌ xaꞌ.
No naleꞌtraꞌ xaꞌ kwaꞌn gat lëꞌ par nalox xaꞌ lo Dios,
sino ke zublo ban xaꞌ kun Dios.
25 Pwes walika kwaꞌn nin lo go,
lëꞌ zhë zhin,
mbaino lëꞌ zhë zeꞌ mizhin la,
lëꞌ rë men xaꞌ nzo zit lo Dios,
lëꞌ bixaꞌ gon widiꞌzh cheꞌn Xgaꞌn Dios,
no rë xaꞌ yila widiꞌzh cheꞌn Xgaꞌn Me reꞌ,
por kureꞌ lëꞌ bixaꞌ ban par dubtaꞌ kun Dios.
26 Nela xmod kinu Dios yalnazhon par nizaꞌ Me yalnaban kaꞌ men par dubtaꞌ,
seꞌska mizaꞌ Dios yalnazhon reꞌ kaꞌ Xgaꞌn Me,
par nileꞌ Xgaꞌn Me ban men dubtaꞌ kun Dios.
27 Mbaino nu mizo Dios Xgaꞌn Me par naꞌb Xgaꞌn Dios kwent lo rë men yizhyuo por rë kwaꞌn nzëꞌb xki bixaꞌ,
no nu por nak Xgaꞌn Dios tu men yizhyuo.
28 Nawiꞌt go lon xe por rë kwaꞌn kidizha lo go reꞌ,
porke lëꞌ zhë zhin,
lëꞌ rë xaꞌ nzho leꞌn baꞌ gon widiꞌzh cheꞌn Xgaꞌn Dios,
29 orzeꞌ ruban bixaꞌ,
no rë xaꞌ mileꞌ kwaꞌn wen,
lëꞌ bixaꞌ ban par dubtaꞌ kun Dios;
per rë xaꞌ mileꞌ kwaꞌn gat lëꞌ,
lëꞌ bixaꞌ ruban par dubtaꞌ zakzi bixaꞌ.
Walika Dios mixëꞌl Krist
30 No nzhab Jesús:
―Nagakt len ni tu kwaꞌn xigab yeka,
nab tsa nilen nela xmod ne Xuza lon.
Kuzeꞌ nali nigobeꞌn xmod nak men,
porke gat nileꞌtaꞌ kwaꞌn nzhaklan,
sino kwaꞌn nzhakla Xuza,
Me mixëꞌl da,
kuzeꞌ nilen.
31 Chi por xigab yeka nidizha,
pues gat walit kwaꞌn nidizha orzeꞌ,
32 per nzho xtu Me nidiꞌzh por na,
mbaino nanen,
walika rë kwaꞌn nidiꞌzh Me por da.
33 Lëꞌ go mixëꞌl men par ngwanaꞌbdiꞌzh bixaꞌ lo Juan,
no walika kwaꞌn midiꞌzh Juan por da.
34 Per na gat nakiꞌnt da diꞌzh men cho da;
nin cho da lo go par roꞌ go lo rë kwaꞌn nazheꞌb nzho go.
35 Rë widiꞌzh kwaꞌn miluꞌ Juan lo go ngok nela tu ki kwaꞌn nizini lo nakao gaꞌ;
mbaino por kwaꞌn miluꞌ Juan lo go reꞌ,
cheꞌptsa mizak laxtoꞌ go mileꞌi.
36 Per na kinu kwaꞌn más niluꞌ cho da,
mbaino más tsake lo rë kwaꞌn miluꞌ Juan:
Rë zhiꞌn nazhon kwaꞌn nilen,
tutsa nake kun rë zhiꞌn nazhon kwaꞌn mikaꞌb Xuza len.
Kureꞌ niluꞌ,
Xuzka mixëꞌl da.
37 No Xuza Me mixëꞌl da,
lëꞌ Me midiꞌzh la cho da,
no ter naga gon go chi Me,
no ni naga ne go Me.
38 Kun roꞌ go nidiꞌzh go ñila go Dios,
per gat niguchaoꞌt go widiꞌzh cheꞌn Me laxtoꞌ go,
porke gat ñilat go da,
mbaino lëꞌ Me mixëꞌl dax.
39 Lëꞌ go niwiꞌ laka go kwaꞌn nzhoꞌl go lo Widiꞌzh cheꞌn Dios,
nes par gab go,
saꞌ yazhël go xmod ban go dubtaꞌ kun Dios,
mbaino rë kwaꞌn nzhoꞌl go zeꞌ,
na ka nizeꞌte;
40 per nanet go yila go da par len ban go dubtaꞌ kun Dios.
41 Par na,
yent kwan tsak diꞌzh men wen da,
42 per por nilibeꞌn go,
wenawen nanen,
gat nazhiꞌt go Dios.
43 Mbaino Me reꞌ nak Xuza,
Me mixëꞌl da lo go,
per nanet go yila go da;
lëꞌla cho la xtu ñila go,
xaꞌ nidiꞌzh kwaꞌn xigab yek xaꞌ lo go.
44 ¡Kuzeꞌ ka,
gat ñila go dax!,
porke dox ño laxtoꞌ go diꞌzh men lëꞌ go wen;
per gat nikwaꞌnt go xmod yaꞌn go wen kun Dios,
ter lëꞌgaka nab Me nak Dios.
45 Nagabt go nal,
na gap lo Xuza rë kwaꞌn nak go.
Per yub Muisés gab kwan nak go,
ter nileꞌ go xigab,
Muisés koꞌ go lo rë de kwaꞌn nzadkë tich go.
46 Chi walika ngayila go kwaꞌn mizobniꞌ Muisés,
orzeꞌ nu ska da ngayila go,
porke na nizeꞌt kwaꞌn mizobniꞌ Muisés,
47 per por gat wali ñila go kwaꞌn mizobniꞌ Muisés,
kuzeꞌ nu da,
gat ñilat go kwaꞌn nidizha.