Yesu Twanfɛɛnlɛ Kɛmbɔshiin Pre Tun
9
A Yesu na u twanfɛɛnlɛ kɛmbɔshiin pre yeeri mna pe ŋga jaŋga, na faŋga mbe pra ŋumufuɛn woni leele nu, mbra yambla trai.
Luke 9:1-27
2 Wra pe tun na pe sɛ Nyiɛkpɔɔ ŋunumu kre kee kpali, mbra yambla trai.
3 Mna yo pe pan mbo, “Yaa shia sɛ na yaka ni, yaa sɛ na kanyie ni, ndee bɔtɔ ni, ndee mbe paanu wru, ndee mbe swa wru, a yaa shia dodonyi yɛ wru mbe ya nyjɛ e le ŋga na.
4 A katoo ŋga nu ee le kpan, e tni wa e sɛ su ŋga ble ee yili wa.
5 A mna ee le, a pe n shia e shɔ kre, na e yilii chia kre na, e e jeelee tra pɔ e wo wa, mbe ki pe dansiɛrɛ kee mbe pe taan.”
6 A twanfɛɛnlɛ pre na yiri mna sɛ kabɛɛlɛ yire na, mna sɛ na ketaan kre kpali, na yambla trai na tro.
Herod Chaa Mbe Yesu Nya
7 Ŋga Galilee ŋunu Herod na kee nyjɛ Yesu pe yire loo kre, kra u jawala tɔɔra kpɔɔ. Ŋgi na hin? Na leele yuu na John ndrajefun wre u ndru mu nyi.
8 A plɛ naa yuu na Elijah u yiri, a plɛ naa yuu na fa Nyiɛkpɔɔ keenyanyofɛɛnlɛ pre wa u nyi.
9 A Herod na kna mbo, “John rɛ, ndaa u gbo, kena ndro ŋmbi kee ni ndru ŋga hin? Ni u chaa mbe nya.”
Leele Kagbenyi Kunɔ Sro Ŋgahaa
10 Yesu twanfɛɛnlɛ pre na ndru mna pan mna kee nyjɛ pe sɛ pe yire krɛrɛ yo u pan. A wra pe wru, a pe kro na sɛ chia ka na, praa ki yeeri Bethsaida.
11 Ŋga lenɛɛrɛ pre na ki loo kre, pra taa u kro. U nsra pe ni, a wra Nyiɛkpɔɔ ŋunumu kre kee yo pe pan, na yambla trai.
12 Ŋga yila naa shie mbe sɛ to kre, twanfɛɛnlɛ kɛmbɔshiin pre na pan mu yo Yesu pan mbo, “Leele pre wa kolo mbe pe sɛ seechiɛ nyjɛ yi o fɛ mu kun nyjɛ na, mbe sɛ sro cha mbe li, mbe snihaa cha. Ŋgi na hin? Yaka n wa mna.”
13 A Yesu na kna mna yo pe pan mbo, “E pe ŋga yaka mbe pe ka.”
A pra kna mbo, “Yaka n wa o pan, paanu kunɔ, na mbroe shiin pee wa o pan. Kena fɔna oo sɛ sro lɔ mbe pe kro ŋga.”
14 Na bilɛ mblɛ pee wa pe nu we pe kagbenyi kunɔ.
A Yesu na kna mu yo u twanfɛɛnlɛ pre pan mbo, “E ti pe ble ble peyɛ na, fuloe shiin shiin na kɛ kɛ.”
15 A pra tia leele pre na ble ble ma.
16 A Yesu na paanu kunɔ yire na mbroe shiin pre bali mna yii kɛɛ, mna yiɛ wa nyjeeri mna dwan mu le yi nu, mna yi pile mna u twanfɛɛnlɛ pre ŋga, na pe pe ŋga imi na pe ble ble kre.
17 A leele pre kro na ka mu yɔɔ, a pra pe kamprɛɛ yire yoori, kakɛɛ kɛmbɔshiin.
Peter Na Yesu Kee Nya Mu Yo
18 Nyjila ka nu Yesu naa wa na nyiɛtali wre nunu, a u twanfɛɛnlɛ pre na pan u lawee, a wra pe wie mbo, “Ndro ŋmbi nyini lenɛɛrɛ pre ni jawa hin?”
19 A pra kna mbo, “Plɛ yuu na John ndrajefun wre wi ŋu, a plɛ na yuu na Elijah wi, a plɛ na yuu na fawolo Nyiɛkpɔɔ kee nyanyofɛɛnlɛ pre wa wi ŋu.”
20 A wra kna mna pe wie mbo, “A yire hin? Mni e ni jawa hin?”
A Peter na kna mbo, “Ŋu wi Nyiɛkpɔɔ Messiah wre.”
21 A wra pe jaari na pia shia ki yo mbe ndro loo.
Yesu U Kumu Nya Mu Yo
22 Yesu na kna mu yo pe pan mbo, “Lewo Biblɔ wre fna mbe kala nya tataara, mbe Judae loplombo pre, na srawɔfɛɛnlɛ loplombo pre, na pe mbra nyinafɛɛnlɛ pre u je, mbe u gbo, a ki ble taarɛ ble na, we nyi.”
23 A Yesu na kna mu yo leele pre kro pan mbo, “Na ndro chaa mbe taa ni kro kre, ufun u uyɛ fɛɛ, mbe u kanyana kumu kaan wru mbe taa ni kro.
24 Ŋgi na hin? Ndro ŋmba we na kɛ toni u ŋmaa na kre, kie yili u kɛɛ. A ŋmba we yila ni na mbe u ŋmaa wa mbe fun kre, we ki ta.
25 Kena na lewo waŋgra ŋga yirɛ kro ta, mu u ŋmaa wa mu fun, tnu ŋgi we ta hin?
26 ŋmba we na nyifɛɛrɛ pini mi, na ni ketaan kre yoo na kre, na Lewo Biblɔ wre waa pan, wre na u Lɛ wre na nyjeeri bitumblɔ chechee pre yɛnyiŋge nu kre, we ufun mɛɛ yeeree nyifɛɛrɛ pe na.
27 La, ni yuu e pan, kpra na, leele plɛɛ wa mu yire e nu mna, a pia kumu chin, mbaa sɛ su ŋga pie Nyiɛkpɔɔ ŋunumu kre nya.”
Yesu U Yɛnyiŋge Chiɛri Nyina
28 Ŋga wra yire kee nyjɛ yo kre kɔkro, kie pe ble kɔɔnatarɛ, a Yesu, na Peter, na John, na James bali mu ya uyɛ na, a pra sɛ nyua na nyiɛtali haa.
Luke 9:28-56
29 Ŋga wraa wa wa na nyiɛtali kre, u yiɛ na chinɛ, a u dodonyi naa fniŋgei prupru u na.
30 Titɛɛ kre nu to, a bilɛ shiin plɛ, Moses na Elijah na pan na paara na u ni.
31 Pra pan na nyjeeri yɛnyiŋge ni, mna pan mu kumu ŋga Yesu we sɛ ku Jerusalem na kre kee yo.
32 Kre nyjila kre, na Peter na u wolo pre gbunu, a pra fo mu nyi mna u yɛnyiŋge kre nya, mna bilɛ shiin mblɛ praa paara na u ni pre nya na.
33 Ŋga bilɛ pre naa shie mbe Yesu ti kre, Peter na kna mu yo Yesu pan mbo, “Ni Tafun, ki nyu na oo wa mna. Kena ti mbe o sugbɛɛ taarɛ sin, ŋu wo nunu, Moses wo nunu, Elijah wo nunu.” Na Peter n chin kee ŋga u yuu.
34 Ŋga Peter na kre kee ŋga yo to, a tlo na pan mna pe tɔ, a fiɛrɛ na pe yii.
35 A mana ka na yili tlo kre nu mbo, “Ni Biblɔ ŋmba ni kori wre wi kre. Kena e ndie tɛɛ u pan.”
36 Ŋga mana kre na yili ma to, Yesu chiin pra nya na u yire wa. Pe nsra nyu kun na, a kee yire pra nya wa kre krɛrɛ, pe nsra yi ka yo ndro pan yire ble yire nu.
Pɔ Tonkolifun Wa Tra Haa
37 Ŋga ki nyiŋge na se a pra yiri nyua kre na mna tii tra kre, lenɛɛrɛ na sɛ u fni.
38 A blɔ wa na gblee badaaŋga ka le lenɛɛrɛ pre nu mbo, “Nyinafun, jande, ni pɔ ŋmba le ni pan. Ŋgi na hin? Wre nunu chom wi ni pɔ,
39 a ŋumufɔɔn wa u nu. Na ki yiri na u ni, mbe ki u chan, mbe wra gble leni, mbe ti u jire, mbe u nyu na tafɔkɔ kuun. Fuŋga ma ki u tɔɔra, a ki n na laari u na.
40 Kre ni pan mu mu twanfɛɛnlɛ pre tali mbe pe u tra, a pe n na u jani.”
41 A Yesu na kna mbo, “Yire aŋga leele ndikambla mblɛ nu shɔnlie n wa, ni tni e jaara, ndee ni kala nya na e ni mbe sɛ su nyjila ŋgi nu hin?” A wra kna mna yo blɔ wre pan mbo, “Pan na mu biblɔ wre ni mna.”
42 Ŋga biblɔ wre naa paan to, a ŋumufɔɔn kre na u chan, a wraa jirei. A Yesu na fuu ŋumufɔɔn kre na, a biblɔ wre na saanla, a wra u wru mna u lɛ ŋga.
43 Jaŋga kpɔɔ kee ŋga Nyiɛkpɔɔ na nyina wa kre, na leele pre pe kawako.
Yesu U Kumu Kee Yo Shiinwo
Ŋga leele pre na yire na kawa na Yesu kee nyjɛ u pe yire ni kre, a wra kna mna yo u twanfɛɛnlɛ pre pan mbo,
44 “E ti mbe kee ŋga le e ndie. Pie Lewo Biblɔ wre wɔ mbe le leele kɛɛ.”
45 Kee kre wra yo kre, pe nsra ki nɔɔloo. Na pe ki ndra pe na, mbe pia ki nɔɔloo. A praa fiɛ na pie ki nɔɔ wie.
Ŋmbi Wi Lekpɔɔ Hin?
46 Kakra ka na le twanfɛɛnlɛ pre lalaa, a praa yuu na, pe ŋmbihaa u wɛ pe kro na hin?
47 Yesu na pe jawala nya, mna kna mu pɔ wa yii mu yire u jaara.
48 Mna kna mna yo pe pan mbo, “Ŋmba we pɔ fiɛn imi shɔ mi ndra na kre, kena ufun ni shɔ. A ŋmba we ni shɔ kre ŋmba u ni tun wre shɔ. Ŋgi na hin? Ŋmba we uyɛ pe fiɛn e nu kre, we pe e kro yɛklo.”
Ŋmba U N Yiri Mu E Taan Kre, Uu Wa E Kro
49 A John na kna mbo, “Ni Tafun, o blɔ wa nya na u mu mɛɛ tɛɛ na ŋumufuɛn woni leele nu, a o u jaari, na u n chaa o nu.”
50 A Yesu na kna mbo, “Yaa u jaari. Ŋgi na hin? Ŋmba u n na paara na e taanla kre, kena uu wa e nu.”
Samaria Chia Leele Yesu Je
51 Ŋga Yesu ble yire naa paan mbe kɔ, mbe u sɛ nyjeeri kre, wra yiɛ le Jerusalem na.
52 A wra leele tun a pra yiɛklu mna sɛ le Samaritan kable ka na, mna lawee gbeele na u sri.
53 La, bawa leele pre nsra u shɔ. Ŋga wraa shie Jerusalem na kre ndra na.
54 Ŋga u twanfɛɛnlɛ pre, James na John na leele pre nya ma kre, a pra kna mbo, “O Tafun, mu chaa mbe o kanhun yeeri mbe ki yiri nyjeeri mbe paan pe sro ree?”
55 A wra kna mna fuu, mna pe yiɛ kee yo pe pan mbo, “E n chin ŋumu ŋmba leele lɛ yire ree? Lewo Biblɔ wre n pan leele klahaa, la, pe shɔhaa u pan.”
56 A pra yili wa mna sɛ chia fɔŋgɔ na.
Mblɛ Pe Chaa Mbe Kee Yɛ Pe Tun Mbe Chiin Taa Kristo Kro
57 Ŋga pra kolo kre yii na shie kre, a blɔ wa na kna mna yo Yesu pan mbo, “Mna mu sɛ kpan, ni chaa mbe taa mu kro.”
Luke 9:57-62
58 A Yesu na kna mna yo u pan mbo, “Ŋmbokuŋmboe wa na wee ni na sni, a hanyiɛlɛ mblɛ pe tro nyjeeri ŋgaa wa na zeere ni na sni, la Lewo Biblɔ wre n wa na ndra tɛɛ haa ni.”
59 A wra kna mna yo lefuŋu pan, mbo, “Taa ni kro.”
A wra kna mbo, “Ni Tafun, ni ŋga kolo mbe ni sɛ ni lɛ gboo le tun.”
60 A Yesu na kna mu yo u pan mbo, “Ti mbe mblɛ pe n ŋmaa ni pre, sɛ na pe gboolo leni, la, ŋu rɛ, sɛ Nyiɛkpɔɔ ŋunumu kee kre kpali.”
61 A wa na kna mbo, “Ni Tafun, mbe taa mu kro, la ti mbe ni sɛ ni katoofɛɛnlɛ kla mbe pan.”
62 A Yesu na kna mna yo u pan mbo, “Ndro ŋmba we kɛ le Nyiɛkpɔɔ tnumu nu, mbe ndru kro kre, u n fna Nyiɛkpɔɔ ŋunumu kre nu.”