2 A Yesu na kna mna yo pe pan mbo, “Na yila shie mbe sɛ to, a lawee nyina zaan kre, e ja na yuu na, imi na lawee pe ŋga, baŋga ndramu we saan.

3 A na nyiŋge se bnimi kre, e ja na tloe le na yuu na nyiɛ we pan. E ja na ndram le, na kaalɛɛ taa na yuu, la, yire ble nyjɛ nu e nyi ŋga, e n ja mbe kee nyjɛ yi pini le, mbe yi kee nya mbe yo.

4 E ti ni yo e pan mbe e loo, yire sisam pefɛɛnlɛ mblɛ, e Nyiɛkpɔɔ je, mu na kawako kee chaa mbe nya, la, yaa ka ta mbe nya na, fɔna Jonah wo ŋga kra pe kre.” Ŋga Yesu nyu na to kre, a wra pe ti wa mna sɛ.

5 Ŋga Yesu twanfɛɛnlɛ pre na tapla kre kun mna kna ki kro kre, pra paanu fɛɛ.

6 Ŋga praa wa wa kre, Yesu na yo pe pan mbo, “E le, e eyɛ dɔɔta Pharisee leele pre, na Sadducee leele pre yiisi yire haa.”

7 A pra kna na yuu peyɛ pan mbo, “Ŋga o n pan na paanu ni kre, kre ki tia wra yuu o pan ma kre.”

8 Kee ŋga praa yuu kre, Yesu na pe jawala nya, mna kna mu pe wie mbo, “Ŋgi ki tia e na jawa na ŋga e n pan na paanu ni kre ki tia ndaa yuu e pan ma ŋga hin? E shɔnlie fiɛn kpa.

9 Kena e n ta mu kee nyjɛ nɔɔloo tuun? A e n sɔɔnri na ndaa paanu kunɔ pile, mna leele kagbenyi kunɔ ŋga kree? A ŋga pra ka mu yɔɔ kre, yi mbuuroe yire kakɛɛ mni e na yoori hin?

10 A ŋga ndaa paanu kɔɔnashin yire pile mna leele kagbenyi jijirɛ ŋga kre, yi mbuuroe kakɛɛ mni e na yoori hin?

11 Kena yira ŋgi ki tia e n kee ŋga ni yo ŋga nɔɔloo, a e na jawa na paanu kee ni yuu ŋga hin? Kena ni yuu e pan na, e eyɛ dɔɔ ta Pharisee leele na Sadducee leele pre yiisi yire haa.”

12 Ŋga Yesu nyu na to kre, bawa u twanfɛɛnlɛ pre na chin mu kee kre nɔɔloo, na yiisi ŋga pe leni paanu nu kre kee ma u yuu, la, Pharisee na Sadducee leele pre kooloe fuɛn nyjɛ praa leele nyina yire kee wraa yuu, na pe peyɛ dɔɔ ta yi na.

13 Ŋga Yesu na le Caesarea Philippi tra nu kre, wra u twanfɛɛnlɛ pre wie mbo, “Ndro ŋmbi sembremu leele mi Lewo Biblɔ wre kra hin?”

14 A pra kna mbo, “Plɛ yuu na John ndrajefun wre wi, a plɛ na yuu na Elijah wi, a plɛ na yuu na Jeremiah wi, a plɛ na yuu na fawolo Nyiɛkpɔɔ kee nyanyofɛɛnlɛ pre wa wi.”

15 A Yesu na kna mbo, “A yire hin? Ndro ŋmbi sembremu e ni kra hin?”

16 A Simon Peter na kna mbo, “Ŋu wi Kristo wre, Nyiɛkpɔɔ ŋmba u le wre Biblɔ.”

17 A Yesu na kna mbo, “Simon, Jonah pɔ, Nyiɛkpɔɔ mu dwan. Ŋgi na hin? Lewo ma u mu nyina kre kee ŋga, la, ni Lɛ ŋmba uu wa nyjeeri wre u ki wɔ mu mu nyina.

18 Ni yuu mu pan, mu mɛɛ Peter kre nɔɔ yi dnɛ, a kre dnɛ ŋga ni wɔ, mbe ni leele yire ki na mbe ni sumi, a kumu wa jaŋga ta ki na.

19 Ŋu kɛɛ mbe nyjeeri ŋunumu kre safwa le, kena kee ŋga mu yii tra mna kre, pie ki yii nyjeeri, a kee ŋga mu je tra mna kre, pie ki je nyjeeri.”

20 Bawa Yesu na u twanfɛɛnlɛ pre jaari na pia shia ki yo mbe ndro loo na wre wi Kristo ŋmba Nyiɛkpɔɔ wɔ wre.

21 Mu yire kre nyjila kre nu na shie kre, Yesu na paara chasi mna u twanfɛɛnlɛ pre nyina mbo, “Ki fna mbe ni sɛ Jerusalem na, mbe sɛ kala nya loplombo pre, na Judah srawɔfɛɛnlɛ loplombo pre, na pe mbra nyinafɛɛnlɛ pre kɛɛ. Pie ni gbo, a ki ble taarɛ ble na mbe nyi.”

22 Ŋga Yesu na yo ma kre, Peter na Yesu yeeri mbɛɛ na mna sɛ u yiɛ kee yo u pan mbo, “Ni Tafun, Nyiɛkpɔɔ we sɛ na kre kee ŋga mu yo ŋga ni lee. Kre kee ŋga n fna mbe pan mu na.”

23 A Yesu na kna mna yo Peter pan mbo, “Laa ni na, Sutna wi ŋu. Mni a mna ni toni kolo hin? Mu n na Nyiɛkpɔɔ wo haa jawa, la, lewo wo haa mu jawa.”

24 A Yesu na kna mu yo u twanfɛɛnlɛ pre pan mbo, “Na ndro chaa mbe taa ni kro kre, ufun u uyɛ fɛɛ, mbe u kanyana kumu kaan tio mbe taa ni kro.

25 Ŋgi na hin? Ŋmba we na wii u ŋmaa na kre, kie yili u kɛɛ. La, ŋmba we yila ni na mbe u ŋmaa wa mbe fun kre, we ki ta.

26 Kena na lewo waŋgra ŋga yirɛ kro ta, mu u ŋmaa wa mu fun, yira ŋgi tnu we ta hin? Ndee yira ŋgi sembremu lewo we jaa ta tra mna mbe Nyiɛkpɔɔ ŋga, mbe ki jaa ti u ŋmaa ta hin?

27 Mi Lewo Biblɔ wre, mbe pan ni Lɛ wre yɛnyiŋge kre nu, mi na nyjeeri bitumblɔ ni, mbe paan lewo ŋga kee nyjɛ u pe kro fɔtɔɔrɔ.

28 Kpra na, e ti ni yo e pan mbe e loo, plɛɛ wa mu yire e nu mna, a pia kumu chin, fɔna pe mi Lewo Biblɔ wre nya na ni paan na ni ŋunumu ni.”