2 O Tafun Nyiɛkpɔɔ wre yo Israel leele pan mbo, “Ni e kori. La, e kna na ni wie mbo, ‘Mni mu o kori mu da hin?’ E ti mbe ni e wie, Jacob nyjɔ na ma Esau kree? A nde ndaa Jacob kori, 3 la, ndaa Esau je, mna nyuɛ lawee nyjɛ nu wre na mblɛ pra yiri u kɔkro na tni kre kaari lawee waara, a ŋmbokuŋmboe yi wru mu tni.^a

4 La, Esau nanae pre we jaa yo mbo, ‘Kii wa na pe o chiɛ yire ja, la, oo ndru mbe yi sin na.’” La, kee ŋga o Tafun Nyiɛkpɔɔ Jaŋgafun wre yuu yi kre mbo, “Pie yi gbeele mbe sin, la, mbe ndru mbe yi juari. Leele we na pe yeeri sisampefɛɛnlɛ waŋgra, leele mblɛ ni Nyiɛkpɔɔ krɔ kun kpɔɔ nyjila kro nu.^b 5 Israel leele pre we yire kee nyjɛ nya na pe nyiɛlɛ ni, mbe kna mbra yuu na, ‘O Tafun Nyiɛkpɔɔ wre jaŋga kpɔɔ Israel tra nu, hali mu sɛ su waŋgrɛ nyjɛ yi mbra o na yire kro nu.’”

6 O Tafun Nyiɛkpɔɔ Jaŋgafun wre na yo Israel srawɔfɛɛnlɛ pre pan mbo, “Pɔ u lɛ kaan buuro, a sumifun na u tafun kaan buuro, kena na e Tafun wi mi yɛŋgɛ, sena buuro ŋga e ni kaan kre nyi, a mɛɛ ŋgi e ni kaan hin? Yire srawɔfɛɛnlɛ pre, yire e ni mɛɛ kre le fiɛn, la, e yuu na, ‘Mni nyini o mu mɛɛ kre le fiɛn mu da hin?’

7 Yire srawɔfɛɛnlɛ pre, e shie na nɛɛrɛ sro taari ni sragbunu kre na. La, e yuu na, ‘Kolo ŋgi na o mu tɔ nɛɛrɛ ni hin?’ Ŋga e n ni sragbunu kre le mu nya kre ndra na. 8 Kena na e yurɛ mblɛ pe fun nyiɛlɛ na teeri na sra woni na ni kaan, kena sisam ma kre ra? Na yurɔ fuuru, ndee na yaa na fumnɔ a e u tɛɛ mu sra wɔ mu ni ŋga, kena sisam ma kre ra? Na e sɛ e ŋunu kɛ pe lɛ, u yiɛ we shɔ, mbe u ŋga ki fna pe mbe e ŋgaa?”

9 O Tafun Nyiɛkpɔɔ Jaŋgafun wre yo mbo, “E yuu mi Nyiɛkpɔɔ pan na ni e dumi. Ŋga yire sra yirɛ nyjɛ nyini wa e kɛɛ ŋga, e jawa na mbe loo e pan ra?

10 Na e wa wra sɛ Suminyuŋgo kre krɔɛ yii mbe tɔ, mbe yaa na le wa mbra kanhun waara gbɛɛri ni sragbunu kre na. Ŋgi na hin? Ni yiɛ n shɔ e na. A mba e sra yirɛ nyjɛ ni e pan ni pan yire ka shɔ. Pan mi e Tafun Nyiɛkpɔɔ Jaŋgafun wre yo. 11 Mu yire yila finhaa mu sɛ su ki tohaa, ni mɛɛ we kpɔɔ waŋgrɛ yire nu kro. Leele we yiri lawee kro nu mbe paan ni ŋga tuwe ndiom tɛɛn, mbe sra chichie wɔ mbe ni mɛɛ kre ŋga. Ŋgi na hin? Ni mɛɛ we kpɔɔ waŋgrɛ yire nu. Pan mi e Tafun Nyiɛkpɔɔ Jaŋgafun wre yo.

12 La e n ni mɛɛ kre le mu nya, na yuu na, ‘O Tafun Nyiɛkpɔɔ sragbunu kre yaka yira ma, a sra waara o woni.’ 13 E yuu na, ‘O fna yire sra nyjɛ wɔɔ kɛɛ.’ Mbe ndru mbe kna mbe yo ni pan na, ‘O Tafun Nyiɛkpɔɔ Jaŋgafun.’ Kre kɔkro mbe e yurɛ mblɛ pe fuuru, na yaa, na fumnɔ tɛɛ mbe sra wɔ mbe ni ŋga. Kena ki fna mbe mi Nyiɛkpɔɔ e sra yire shɔ ra? 14 Ndro ŋmba pan sra wɔ yurɔ blɔ nyi nagbɛɛ, a ufun nyu yo na we ni ŋga u wi, a u u ti mu na sra woni na yurɔ fumnɔ ni na ni kaan kre, suŋgɔ we ufun wre yii. Ŋgi na hin? Mi e Tafun Nyiɛkpɔɔ Jaŋgafun wre, ŋunu kpɔɔ wi mi, a ki fna mbe pe ni mɛɛ kre fiɛ waŋgrɛ nu.”