Srawɔfɛɛnlɛ Kafinɛfɛɛnlɛ
2
“Yire srawɔfɛɛnlɛ pre pan ni paara tɛ. 2 Na e n ndie tɛɛ ni pan, mu lɛɛ wɔ mu ni mɛɛ kre ŋga buuro, mbe ti mbe suŋgɔ e yii, a mbe ti mbe e dwamu kaari sɔŋgɔ. Ni klu mu e sun, ŋgi na hin? E n lɛɛ wɔ mu ni ŋga buuro.” Mi e Tafun Nyiɛkpɔɔ Jaŋgafun wre ni ki yo. 3 “Yire ndra na, mbe e nanae ndie tini. Mbe yurɛ mblɛ ni e sra woni pre fre tɛɛ mbe e yiɛ fa, mbe kɛ laa e na.4 Kre ee chin na mi e Tafun Jaŋgafun Nyiɛkpɔɔ wre ni paara e pan, imi kie pe mbe ni nyu nunu ŋga ni pe na Levi ni kre kro ma, pan mi e Tafun Nyiɛkpɔɔ Jaŋgafun wre yo.” 5 “Nyu nunu ŋga ndaa pe na u ni kre, na pe nyu nunu ŋga nu ŋmaa na wejinyiŋge nyi. A wra taa ki na mnaa ni kaan buuro na ni yɛnyiŋge. 6 Kpra kee wraa leele nyina, kafinɛ kee nsraa yilii u nyuu. Wra nyaari ni yiɛ wejinyiŋge ni, mna fraka, mna lenɛɛrɛ laa sisam kro.
7 Yire srawɔfɛɛnlɛ pre nyuu ki fna mbe Nyiɛkpɔɔ chiŋgɛ kee naa yilii, a yire pan ki fna mbe leele naa shie mbra ni kee twan, ŋgi na hin? Yire lɛ mi e Tafun Nyiɛkpɔɔ Jaŋgafun wre bitumblɔ. 8 La, e ni kolo kre wa, a kee nyjɛ e leele nyina yire tia lenɛɛrɛ na gbroi, a nyu nunu ŋga mi na Levi na pe kre, e ki kla. Pan mi e Tafun Nyiɛkpɔɔ Jaŋgafun wre yo.” 9 “Kre ndra na, na e yire leele pre yiɛ, mbe ti mbe pe e le fiɛn, pia e le mbe nya, ŋgi na hin? E ni kolo kre wa, na leele pre le na yoori.”
Leele Pre Ayɛte Nyiɛkpɔɔ Na
10 E n chin na o lɛ wree nunu ra? A Nyiɛkpɔɔ ma wra o kro wa ra? A yira ŋgi ki tia o o lɛ wre nyu nunu ŋga wra pe na o tolɛɛlɛ ni kre le fiɛn, mu oyɛ shɔnlie kla hin? 11 Judae na Jerusalem leele kro ayɛte Nyiɛkpɔɔ na. A afunyi kee nyjɛ mu chin ŋga kro na pini Jerusalem na. Judah leele o Tafun Nyiɛkpɔɔ Suminyuŋgo ŋga u kori kre tɔ nɛɛrɛ ni, mu na sɛɛnlɛ sumi. 12 Lewo ŋmba u kre kee ŋga pini kre, imi na ufun nyi kpan, O Tafun Nyiɛkpɔɔ we u wɔ mbe yili Israel leele nu, mbe wa jaa pan na srayirɛ ni u Suminyuŋgo wa na.
13 Kee ŋga e piin na yaa yi na, e nyɛni, na gble leni, na yotunyi woni mi e Tafun Nyiɛkpɔɔ wre sragbunu kre na, ŋgi na hin? Ni ndie wɔ e na, a ni kee ka ma na e sra nyjɛ e woni yire ni. 14 A e na eyɛ wie na, “Yira ŋgi ki tia u yiɛ n shɔ o na ŋga hin?” Ŋga nyu nunu ŋga kii wa yire na e chɔ ŋmba e na leŋge e yirifum nyjila kre kla, kre ki tia. E nyu yo na yire na wre we pe nunu, la, e nyu ŋga e na yo kre kla.
15 O Tafun Nyiɛkpɔɔ wre na yire na e chɔ wre wa, mbe e na pe na ndro nunu lɛ yire. Yira ŋgi ki tia wra ki pe ma hin? Imi kie pe mbe e biile se, mbe pe pe Nyiɛkpɔɔ leele. Kena e eyɛ dɔɔ ta mbe e wa wa nyu nunu ŋga wre na u yirifum nyjila chɔ pe kre kla. 16 E Tafun Israel Nyiɛkpɔɔ wre yo mbo, “Ni leŋgeere jeere fun.” Kee ŋga ki ni bin yi na wa we kre sisam kee ŋga pe u chɔ na. Kena e le na wa wa nyu ŋga u yo u chɔ pan na we kpra li mbe u ŋga kre kla.
Kpra Kun Ble Kre Mbra
17 E o Tafun Nyiɛkpɔɔ wre tɔɔra na e kee nyjɛ e yuu yire ni. A e kna na eyɛ wie na, “Kolo ŋgi na o u tɔɔra hin?” Kolo ŋga na e yire na u jawala tɔɔra yi na, “E yuu na, o Tafun Nyiɛkpɔɔ wre yiɛshɔ sisam pefɛɛnlɛ na.” A nyjila ka nu e yuu na, “Sena Nyiɛkpɔɔ ŋmba u kpra lii wre nyi hin?”