Bituŋu Ŋmba Kee Pe Yo Mu Tɛɛ Wre
3
O Tafun Nyiɛkpɔɔ na yo mbo, “E le, mbe ni bituŋu tun, wre we paan kolo gbeele ni pan.a Mbe e Tafun ŋmba e le kolo wre fo mbe pan u Suminyuŋgo wa. Ni nyu nunu kre bituŋu ŋmba kee e chaa wre we pan.”2 La, ŋmbi we jaa frɔ ta kre ble kre nu hin?b Na u pan ŋmbi we jaa yire u yiɛ hin? Pan we pe na fiireefun kanhun yi, ndee na yonyi jefun zemna yi. 3 We pe na fiireefun ŋmba u nɛɛrɛ wo swafiŋge nu wi, we nɛɛrɛ laa Levi leele pre na, mbe pe pe chasi na swanyiɛ, na swafiŋge yi. Kre o Tafun Nyiɛkpɔɔ wre we leele ta mbe pe sra wɔ kolo chiriri na mbe u ŋga. 4 Kre nyjila kre o Tafun Nyiɛkpɔɔ wre we Judah, na Jerusalem sra yirɛ yire shɔ yɛshɔɔrɔ ni na fa kre yi.
5 O Tafun Nyiɛkpɔɔ yo mbo, “Ni paan mbe e kpra kun. Ni paan mbe mblɛ pe chlɛ, na leŋgeere klafɛɛnlɛ, na mblɛ pe kala fnɛ pre kala li haa, ni paan mbe mblɛ pe pe tnumu tunfɛɛnlɛ dnumu pe fɔtɔɔrɔ haa, na mblɛ pe lekuchiɛlɛ, na bijile yirɛ shio pe pan, a pe n na fumblɔ mblɛ pe yiri waŋgra ka nu mu pan mu tni pe nu kre kala lii kpra ni kre gbun pimi ni. Ŋgi na hin? Pe n na ni fiɛ.
Mblɛ Pe Nyiɛkpɔɔ Juu
6 Mi e Tafun Nyiɛkpɔɔ wre, ndaa chinɛ, kena yire Jacob nanae, e n kla. 7 Mu yire e tolɛɛlɛ nyjila, kre e laa ni mbra yire kro, a e n li yi na. E ndru e pan ni pan, mbe ndru mbe pan e pan. Pan mi e Tafun Nyiɛkpɔɔ Jaŋgafun wre yo. La, e wie na, ‘Mni oo pe mbe ndru mbe pan mu pan hin?’
8 Kena ki fna mbe ndro Nyiɛkpɔɔ juu? A nde e ni juu. Mbe ndruu kna wie na, ‘Kolo ŋgi na o mu juu hin?’ E tnu nyjɛ e taa, mbe yi yɔ kɛ mbe ni ŋga nunu, na e srayirɛ yire wɔɔ na e ni juu. 9 Israel waŋgra kre kro, suŋgɔ e yii, ŋgi na hin? E ni juu. 10 E pan yirɛ nyjɛ e woni na ni kaan yire kro ni ni yirɛ tɛɛ haa wa, mbe ki ti sro pe ni katoo wa. E kre kee ŋga tɛɛ e ni pe e le, na mba ti mbe nyjeeri vromboe nyaala, mbe ndaa dwamu kna mbra wo e na, mbe ki ti yirɛ na bɔ e na, yaa na lawee ta mbra yi tɛɛ kple. 11 A mba ti mbe yurɛ na e see yirɛ kla, a e tre seele we sɛ. Pan mi e Tafun Nyiɛkpɔɔ Jaŋgafun wre yo. 12 Na ki pan ma kre, waŋgrɛ yire kro we e yeeri dwamu fɛɛnlɛ, ŋgi na hin? E tra kre we pe yɛshɔɔrɔ lawee. Pan mi e Tafun Nyiɛkpɔɔ Jaŋgafun wre yo.
Tnu Wa Nyiɛkpɔɔ Sumiɛ Nu
13 Mi e Tafun Nyiɛkpɔɔ wre yo. E kee fuɛn titi yo ni na tataara. A nde e ndru na wie na, ‘Kee ŋgi o yo mu na hin?’
14 E yuu na, ‘Tnu ŋgi kii wa Nyiɛkpɔɔ sumiɛ nu hin? A ŋga o lii u nyu kee yire na, mu je na fooro lii u yiɛ ŋga, yira ŋgi o taa ki nu hin? 15 E le imi na mblɛ pe peyɛ kpɔɔri, pre dwamu taa. A sisam pefɛɛnlɛ pre na peyɛ taa, a na pe Nyiɛkpɔɔ wre nyu kaanri kuraa kre, yaka na pe ta.’”
Kpralie Pe Tnu Yira
16 Mblɛ pe o Tafun Nyiɛkpɔɔ wre fiɛ, na u mɛɛ kaan buuro kre na kna na kee yire paara na peyɛ ni, a o Tafun Nyiɛkpɔɔ wre na ndie tɛɛ mna yi loo. Hlɛ ka naa wa u yiɛ wa, kre nu pra leele mblɛ pe Nyiɛkpɔɔ wre fiɛ na u mɛɛ kaan buuro kre mɛɛ nyunɔ mu le.
17 O Tafun Nyiɛkpɔɔ Jaŋgafun wre yo mbo, “Ŋga ble mbe pan kre, pie pe ni leele mblɛ keshian kii wa ni na. Mbe pe fooro chin imi na lɛ u pɔ ŋmba u u sumi fooro chini kre. 18 Kre ble kre ee yɔɔlɛɛ ŋga kii wa frakafɛɛnlɛ na sisam pefɛɛnlɛ, na mblɛ pe Nyiɛkpɔɔ sumi, na mblɛ pe n na Nyiɛkpɔɔ sumi kre lalaa chin.”