Zechariah 1

Zechariah Hlɛ

Nyiɛkpɔɔ U Leele Yeeri

Ŋga ŋunu Darius na ŋunumu li Persia tra nu kre, ki yɛlɛ shiinwo kre nyiɛpɔ kɔɔnatarɛwo nu, kre o Tafun Nyiɛkpɔɔ na u kee wɔ mu u keenyanyofun Zechariah, Berekiah biblɔ wre nyina. Zechariah tolɛɛ na wi Iddo.^a 2 O Tafun Nyiɛkpɔɔ na yo Zechariah pan mbo, “Mi e Tafun Nyiɛkpɔɔ wre krɔ na kun kpɔɔ na e tolɛɛlɛ pre ni, 3 kena yo Israel leele pre pan na, kee ŋga mi e Tafun Nyiɛkpɔɔ wre yuu yi kre, ‘E ndru e pan ni pan, mbe kna mbe e le.’ Pan mi e Tafun Nyiɛkpɔɔ Jaŋgafun wre yo. 4 Yaashia pe na e tolɛɛlɛ pre lɛ, Nyiɛkpɔɔ keenyanyofɛɛnlɛ jle wolo pre na yire ni kee na mna pe jaari na pe laa pe sisam, na kefuɛn nyjɛ praa pini yire kro. La, pe nsra ndie tɛɛ, ndee mna li ni kee yire na. 5 Aŋga, sena e tolɛɛlɛ pre nyi hin? A Nyiɛkpɔɔ keenyanyofɛɛnlɛ pre, pee wa tɛ ree? 6 Ni mbra nyjɛ ndaa le ni keenyanyofɛɛnlɛ pre nyu na yire, e tolɛɛlɛ pre nsra li yi na, a kra tia kanyana na wɛ pe na. A pra yire ki na mna pe jawala chinɛ, na yuu na pe kepele, na kefuɛn nyjɛ pra pe yire ndra na mi e Tafun Nyiɛkpɔɔ Jaŋgafun wre na pe ndie tini imi na ki fna.”

Zechariah Na Soolo Nya Nyiɛlɛ Na

7 Ŋga Darius na ŋunumu li, ki yɛlɛ shiinwo kre nyiɛpɔ kɛmbɔnunu wo ŋga praa yeeri Shebat kre ble fulo na jijirɛ na, o Tafun Nyiɛkpɔɔ na kee ka wɔ blee mna mi Zechariah, Berekiah biblɔ ŋmba tolɛɛ na wi Iddo wre nyina nyiɛlɛ na.^b 8 Kee nyjɛ ndaa nya yire yi kre. Ndaa ndro wa nya na u soo nyiɛ nduu mu yire myrtle tinyi yɛ jaara landɛɛ ka nu. A ndaa soolo nyiɛ, na fimble, na nyiɛduu plɛ nya u kro. 9 A ndaa nyjeeri bituŋu ŋmba wra paara na ni ni wre wie na, “Ni tafun, a soolo mblɛ na hin?”

A wre nyjeeri bituŋu ŋmba wraa wa mu yire myrtle tinyi yire nu wre na kna mbo, “Mbe mu nyina kee ŋga pe pini. 10 Pre soolo nduufɛɛnlɛ mblɛ o Tafun Nyiɛkpɔɔ wre tun, a pe sɛ kila mu tro tra yiɛ na kre.” 11 A pe sɛ pan mu mandiɛ bɔ mbo, “O sɛ kila mu tro tra yiɛ na kro, mu nya na waŋgra kro nyu ku, a leele wa mu tni wejinyiŋge nu.” 12 A nyjeeri bituŋu ŋmba wraa wa myrtle tinyi yire nu wre na yo mbo, “O Tafun Nyiɛkpɔɔ Jaŋgafun, ŋga mu krɔ kun na Jerusalem, na Judah chiɛ yire leele ni yɛlɛ fuloe taarɛ na kɛ yi ŋga, kena nyjila ŋgi nu mu pe fooro le wo?”

13 A o Tafun Nyiɛkpɔɔ na ketaan, na gbunyiŋge kee yo nyjeeri bituŋu ŋmba wraa paara na ni ni wre pan. 14 A nyjeeri bituŋu wre na kna mu yo ni pan mbo, “Sɛ ki kpali na o Tafun Nyiɛkpɔɔ Jaŋgafun wre yo na ‘Ni yenyjam wii Jerusalem, na Zion nyua kre na. 15 La, ni krɔ kun kpɔɔ na waŋgrɛ nyjɛ yi jawa na wejiŋge nyjii yi na yire ni. Ŋgi na hin? Ŋga ni krɔ na kun na ni leele pre ni nyjila chiɛri ka nu kre, yire waŋgrɛ yire na sɛ ka ya pe kanyana na. 16 Ki tia kee ŋga o Tafun Nyiɛkpɔɔ yo yi na, foorochiɛn ni ni ndru na paan Jerusalem na. Pie ndru mbe ki sin na, mbe ni Suminyuŋgo kre sin na.’”

17 A nyjeeri bituŋu wre na kna mu yo ni pan mbo, “Ta kee kre kpali mna shie yiɛ. O Tafun Nyiɛkpɔɔ Jaŋgafun wre yo na u kakpɔɛ yire we ndru mbe yiyɛ ta kee kro nu, a we ti leele chin na u wo yi Jerusalem nyjila kro nu, a we Zion leele gbunyiŋge.”

Nyamblɛ Nyjɛ Wra Nya Nyiɛlɛ Na

18 Ndaa ndru mna nyamblɛ jijirɛ yɛ nya nyiɛlɛ na. 19 A ndaa nyjeeri bituŋu ŋmba mi na wre naa paara wre wie na, “A nyamblɛ nyjɛ ni nyaa ŋga nɔɔ yi ŋgi hin?” A wra kna mbo, “Yire nyamblɛ nyjɛ yira Judah, na Israel, na Jerusalem leele gbun mu nyina kre.”

20 A o Tafun Nyiɛkpɔɔ na ni nyina tnumu tunfɛɛnlɛ jijirɛ plɛ, na hamɛɛ wa pe kɛɛ. 21 A ndaa nyjeeri bituŋu wre wie na, “Yira ŋgi pehaa pe paan hin?”

A wra kna mbo, “Waŋgrɛ nyjɛ yira Judah, na ki leele gbun mu nyina, a pe nsra ja mbe yaka pe kre, pre pan pre leele mblɛ paan, mbe fiɛrɛ kpɔɔ le pe nu, mbe pe kla.”