Suminyuŋgo Fɔŋgɔ Kre Yɛnyiŋge
2
Nyiɛpɔ kɔɔnashin wo kre ble fulo na nunu na, O Tafun Nyiɛkpɔɔ na ndru mna paara na u keenyanyofun Haggai ni mbo, 2 “Paara Shealtiel biblɔ Zerubbabel ŋmba wi abani lopom Judah tra nu wre, na Srawɔfun Lopom Titi Joshua, Jehozadak biblɔ wre, na leele chiɛri mblɛ pe kro Judah tra nu pre pan, mu pe wie na, 3 ‘Ŋmbi uu wa mu kro e nu tɛ, mna Suminyuŋgo ŋga fa yɛnyiŋge nya hin? A mni fuŋga wo ŋga nyi hin? Ki pe na ŋga n pe yaka yira. 4 La fuŋga rɛ, e sheli. O! Zerubbabel, ni yo mu pan na sheli. O! Srawɔfun Lopom Titi Joshua, Jehozadak biblɔ, ni yo mu pan na sheli. Yire leele mblɛ ee wa tra kre nu kro, e faŋga ta e tnumu tun. Ŋgi na hin? Nii wa e kro, mi e Tafun Nyiɛkpɔɔ Jaŋgafun wre ni ki yo. 5 Ŋga e tolɛɛlɛ na yili Egypt tra nu, kre ndaa nyu yo pe pan na, Nii wa e kro, kre ki tia ni Ŋumu wree wa e lalaa tɛ, kena yaashia fiɛ.6 Kia mu mbe ni nyjeeri, na epo, na waŋgra kro nyaara. Mi e Tafun Nyiɛkpɔɔ Jaŋgafun wre ni ki yo. 7 Mbe waŋgrɛ kro nyaara, a yirɛ nyjɛ na pe yiɛ nyi yire kro pie pan na yi ni, a mbe ti mbe ni yɛnyiŋge pan mbe Suminyuŋgo ŋga nyi. Mi e Tafun Nyiɛkpɔɔ Jaŋgafun wre ni ki yo. 8 Waŋgra ŋga swafiŋge, na ki swanyiɛ kro ni wee yi. Mi e Tafun Nyiɛkpɔɔ wre ni ki yo. 9 Yɛnyiŋge ŋga Suminyuŋgo fɔŋgɔ kre we ta kre we kpɔɔ mbe wɛ fa wo kre na. A kre lawee ŋga nu mbe ni leele ŋga wejinyiŋge. Mi e Tafun Nyiɛkpɔɔ Jaŋgafun wre ni ki yo.’”
Haggai Sɛ Srawɔfɛɛnlɛ Pre Nya
10 Ŋga Darius na ŋunumu li ki yɛlɛ shiin wo kre nu, nyiɛpɔ kɔɔnanyjirɛ kre ki ble fulo na jijirɛ ble na, O Tafun Nyiɛkpɔɔ na paara u keenyanyofun Haggai ni na.a 11 Kee ŋga wra yo u pan yi kre mbo, “Srawɔfɛɛnlɛ pre wie imi na mbra yire yo, 12 ‘Kena na ndro kaara ŋga ki pe cheche wru mu ki fo u dodoŋgi nu, na dodoŋgi kre waa paanu mali, ndee mu le chiin, ndee simi gbɔwo, ndee simi li wo, ndee sro ka nyini nu, kena kie jaa ti mbe yire yirɛ yire ka pe cheche ra?’” A srawɔfɛɛnlɛ pre na kna mbo, “Ɔɔhɔn.”b
13 A Haggai na pe wie mbo, “Kena na ndro kɛ taa gboo na mu uyɛ tɔ nɛɛrɛ ni, na waa da yire yirɛ nyjɛ ka na kena kie ti mbe yi kaari nɛɛrɛ yirɛ ra?” A srawɔfɛɛnlɛ pre na kna mbo, “Ɛnhɛɛn.”c
14 A Haggai na yo mbo, “O Tafun Nyiɛkpɔɔ wre yo na pan waŋgra ŋga leele nyi ni yiɛ na. Kee nyjɛ pe pini, na sra nyjɛ pe woni kro pe nɛɛrɛ yirɛ ni pan.
15 Kena mu yire aŋga mu na shie e na kaalɛɛ dɔɔtaa. Nyjila ŋga ni e nsra ta mu na Suminyuŋgo kre siin kre, 16 na yire titi chin na ki sheli mu e ŋga. Na ndro shɔlɔ ble mu na jawa na we yi gbun mbe ta mbe yi da yirɛ nyini fulo kre, kɛ we kɔɔ ta. Na ndro simi fɛɛri, mu na jawa na we simi ta mbe ko mbe ki da galɔm fuloe shiin na kɛ kre, galɔm fulo we kɔɔ ta. 17 Yirɛ nyjɛ e na luu kro, ndaa tia fuflɛ wrɛŋgɛ na yi fɔ, a kaandɔɔ na yi yii, a nyiɛsubie na wo mu yi kla kro, nde e na je e nsra chinɛ mu pan ni pan. 18 Mu yire nyiɛpɔ kɔɔnanyjirɛ wo kre ble fulo na jijirɛ wo ŋga nu e o Tafun Nyiɛkpɔɔ Suminyuŋgo kre nɔɔ le ŋga, e na dɔɔtaa e le kee ŋga kie pe. 19 La, kii wa na shɔlɔ kɔ e pan yirɛ nu, a tre tinyi, na fig tinyi, na pomegranate tinyi, na olive tinyi n ja na sɛni. Mu yire aŋga mu na shie, mbe e dwan.”
Nyiɛkpɔɔ Na Nyu Yo Zerubbabel Pan
20 Kre nyiɛpɔ nunu kre ble fulo na jijirɛ wo kre chɔɔ na, o Tafun Nyiɛkpɔɔ na paara Haggai ni shiin wo na mna yo u pan mbo, 21 “Yo Zerubbabel, abani lopom ŋmba u Judah tra le wre pan na, ni paan mbe nyjeeri na tra nyaara. 22 Ni paan mbe lebiile ŋujuɛn kna mbe juule, mbe waŋgra ŋga ŋulo jaŋga shɔ pe kɛɛ. Mbe sookɛɛ, na yi nduu fɛɛnlɛ kna mbe chan kanyjuula, mbe soolo nduufɛɛnlɛ kna mbe peyɛ gbo gbo brɔfiɛn yiɛshiin ni, mbe pe soolo pre gbo gbo na. 23 Ki ble kre, mbe ŋu Shealtiel pɔ Zerubbabel ni sumifun wre wɔ, mbe mu pe na lebiile feelee yi, mbe mu ŋunumu li ni mɛɛ nu. Mi ni mu wɔ, mi e Tafun Nyiɛkpɔɔ Jaŋgafun wre ni ki yo.”