Haggai Hlɛ
O Tafun Nyiɛkpɔɔ Yo Pe U Suminyuŋgo Kre Sin
1
Ŋga Darius na jɔɔn li Persia tra nu, ki yɛlɛ shiin wo kre nyiɛpɔ ŋga ki taa kɔɔnanu kre ble ŋga kra yiɛ klu na, kre ble kre o Tafun Nyiɛkpɔɔ na yire u keenyanyofun Haggai na mna paara Shealtiel biblɔ Zerubbabel, na Srawɔfun Lopom Titi Joshua, Jehozadak biblɔ wre pan. Zerubbabel na wi Abani lopom Judah tra kre nu.a2 Kee ŋga o Tafun Nyiɛkpɔɔ Jaŋgafun wre na yo Haggai pan na yi kre mbo, “Leele mblɛ yuu na, Nyjila ŋga nu oo o Tafun Nyiɛkpɔɔ Suminyuŋgo kre sin kre n ta mu da tun.” 3 Ki tia kee ŋga o Tafun Nyiɛkpɔɔ yire Haggai na na yuu leele pre pan yi kre mbo, 4 “Ni leele, yira ŋgi ki tia yire titi wa mu tni kalonyi chichiele nu, a ni Suminyuŋgo kre juari mu wo, a e pieri mu ki ti hin?” 5 Kena kee ŋga o Tafun Nyiɛkpɔɔ ta mbe yo e pan yi kre mbo, “E e kooloe nyjɛ na e tro yire le chichie. 6 E yirɛ ndru tataara, a chiɛri yɛ e taa na kuun. E sro taa na lii, ande e na ta mbe li mbe yɔɔ. E gboo, ande gbɔɔ na kɔ e na. E yonyi taa na toni, ande gbɛŋgɛ na e yii. E tnumu tuni na fɔtɔɔrɔ shio, la, tɔkli nyjɛ nu e yi leni yire kro nɔɔ vru vru.” 7 Ki tia kee ŋga o Tafun Nyiɛkpɔɔ Jaŋgafun yo yi kre mbo, “E e kooloe nyjɛ na e tro yire le chichie. 8 E sɛ nduu nyuɛ yire na, e tinyi yɔɔlɛ e pan e ni Suminyuŋgo kre sin mbe ki ti ni yiɛshɔ, mbe ni ni yɛnyiŋge nyina.
9 E naa jawa na ee yirɛ nyjɛ e luu yire ta mbe kun nɛɛrɛ, la, chiɛri yɛ e na ta. A nyjɛ e na ta mu pan katoo yire kuraa kre, ndaa yi fɔ mu wo. Ŋgi na hin? Ŋga e ni Suminyuŋgo ŋga ki juari mu wo kre ti, a ndro kro na wii wre titi wo chiɛn na kre ki tia. Pan mi e Tafun Nyiɛkpɔɔ Jaŋgafun wre yo. 10 Kena kee ŋga e pe kre ndra na, ki tia mɛŋɛ kuraa wa yire nyjeeri mbe wo, a tra wa ti mbe yirɛ nyjɛ ee luu yire nyu. 11 A ŋga ki ya yi na, ni tia wam yire tra kre nu, na nyuɛ na. E shɔlɔ wa nyu, a yaa simi fɔnyi ta, mbaa yo simi li wo, ndee tra sro ee ta. Wam kre we yire leele, na nui, na e kɛ nyu tnumu kro na.”
Leele Pre Li Nyiɛkpɔɔ Nyu Kee Na
12 A Shealtiel biblɔ Zerubbabel, na Joshua, srawɔfun lopom titi Jehozadak biblɔ wre, na leele chiɛri mblɛ pra kro Judah tra nu pre, na li o Tafun Nyiɛkpɔɔ kee ŋga wra yire u keenyanyofun Haggai na mna yo kre na, ŋgi na hin? O Tafun Nyiɛkpɔɔ wre wra u tun. A leele pre na o Tafun Nyiɛkpɔɔ wre fiɛ. 13 A Haggai na o Tafun Nyiɛkpɔɔ kee ŋga wra yo u pan kre yo leele pre pan mbo, “O Tafun Nyiɛkpɔɔ yo na, ‘Nii wa e kro.’” 14 A O Tafun Nyiɛkpɔɔ na tia Zerubbabel, na Joshua, Srawɔfun Lopom Titi wre na leele chiɛri pre kro ndrajina na yiri pe nu, a pe kro na sɛ nɔɔhle, na o Tafun Nyiɛkpɔɔ Jaŋgafun ŋmba wi pe Nyiɛkpɔɔ wre Suminyuŋgo kre tnumutuni. 15 Nyiɛpɔ kɔɔnanu wo kre ble fulo na jijirɛ na, na kre ŋunu Darius li yɛlɛ shiin jɔɔn na, kre pra tnumu kre nɔɔ hle.b