Zephaniah Hlɛ
1
Kee ŋga o Tafun Nyiɛkpɔɔ na yo Zephaniah pan, nyjila ŋga ni Amon biblɔ Josiah na ŋunumu li Judah tra nu kre yi kre. Zephaniah lɛ mɛɛ naa Cushi, a u tolɛɛ mɛɛ na yi Gedaliah, a u tolɛɛ wre lɛ mɛɛ na yi Amariah, a wre lɛ na wi ŋunu Hezekiah.Nyiɛkpɔɔ We Yirɛ Kro Kla
2 Mi Nyiɛkpɔɔ wre yo na,
“Ni paan mbe yirɛ kro pɔ
tra yiɛ na.
3 Mbe leele, na yurɛ kro kla,
mbe hanyiɛlɛ na epo mbroe
kro kla.
Mbe leele na sisam kee kro kla,
ndro nunu chom wa kro tra yiɛ na.
Mi e Tafun Nyiɛkpɔɔ wre ni ki yo.
Nyiɛkpɔɔ Judah Leele Ndie Tini
4 Mbe ni jaŋga nyina Jerusalem
na Judah leele na,
mbe pre na Jerusalem leele
ndie tini.
A mbe Baal sɛɛn ŋga praa sumi
kre lawee nyjɛ yi kro yire kla,
a ndro wa yi pɛɛrifɛɛnlɛ
pre sɔɔnri na.
5 A mblɛ pe ndru zio na,
na lɛɛlɛ na yila, na yeŋge,
na wɔɛlɛɛ sumi pre kro,
mbe pe kla.
A pan chɔɔ mbe mblɛ
pe nyu yuu na pie ni sumi,
mbe kɔɔ yili ni kro
mbe sɛ Ammon leele sɛɛn
Molech sumi kre,
mbe pe kla na.
6 Leele mblɛ pe mi Nyiɛkpɔɔ je,
mu laa ni kro, a pia pan ni pan,
ndee mbe ni wie yaka kre,
mbe pe kla peii.”
7 E pe komm o Tafun Nyiɛkpɔɔ
Jaŋgafun wre yiɛ, ŋgi na hin?
U kpra kun ble kre mbra.
“Ni ble kre da, kena e pieri,
e na mi e Tafun Nyiɛkpɔɔ
wre le.
Ni paan mbe ni leele tɛɛ
mbe sra wɔ,
a ni kɛ wa mu loŋgoolo yeeri,
mbe pe paan Judah foolo.”
8 O Tafun Nyiɛkpɔɔ wre yo mbo,
“Ŋga ble mbe sra wɔ kre,
mbe loplombo pre,
na ŋulo biile,
na mblɛ pe lii waŋgra ka paala na
pre kro ndie tini.
9 Kre ble kre mbe sɛɛn sumifɛɛnlɛ,
na mblɛ pe leele kuu,
na yirɛ foolo na shie
na teeri pe sɛɛnlɛ nyinyi nu kre,
mbe pe ndie tini.”
10 O Tafun Nyiɛkpɔɔ wre yo mbo,
“Kre ble kre, pie yire
Mbro Jlonwee kre nyu,
na Jerusalem na mbe gblee kun.
Ee kuulo tɔɔnrɔɔ loo
chia kre kafɔŋgɔ kre na,
a ee gblee kpɔɔ loo
nyuɛ yire nu.
11 Yire mblɛ ee wa
kakpɔɔ kre jafa lawee kre,
we nyɛni mbe kuulo tɔɔnri.
Ŋgi na hin?
E jafalifɛɛnlɛ na swa
chinɛfɛɛnlɛ pre kro we ku.
12 Kre nyjila kre,
kania ni mbe kila
mbe leele haa cha
Jerusalem lam.
Mbe leele mblɛ yiɛ ki shio
kee nyjɛ pe piin kro nu
pre ndie tini,
pre pe yuu na o Tafun Nyiɛkpɔɔ
wre na chichie, ndee sisaa pe.
13 Mbe ti pe pe yirɛ foolo,
mbe pe kalonyi juari,
pia pe kalonyi nyjɛ pe sin
yire ta mbe tni.
Pie tre seele fali,
a pia yi simi ta mbe gbɔ.”
Nyiɛkpɔɔ Ble Kpɔɔ Kre Mbra Mna
14 O Tafun Nyiɛkpɔɔ ble kpɔɔ
kre da mna,
kie pan nyaanyaa,
E loo, ki ble kre we sro,
nyɛnɛɛ kpɔɔ ble yi,
ki ble kre ŋunɔwifɛɛnlɛ we
gblee sisaa le.
15 Ki ble kre we pe krɔkuɔn ble,
na kanyana na srawɔŋgɔ ble.
Kie pe lawee kla ble,
kie pe wɔmu sisaa ble,
ki ble kre tloe, na wɔmu
we lawee tɔ.
16 Ki ble kre we pe
ŋunɔ bnɔɛ tin ble,
mbe ŋunɔ wifɛɛnlɛ na koklomi leni,
mbra wii na kakpɔɛ
nyjɛ pe mboe sin,
mu fɛ mu kun yire leele ni,
mbra nyinyi gedenyi,
nyjɛ na pe yiree na chia sri
yire juari.
17 O Tafun Nyiɛkpɔɔ wre yo mbo,
“Mbe ti mbe sra wɔ leele na,
mbe praa nyaari
mbra lawee tali na fuunlo lɛ,
Ŋgi na hin?
Pe sisaa pe mu ni taan.
Pe nyimi we wo tra na nyumu yi,
a pe gboolo we fɔɔn lete na.”
18 Ki ble ŋga o Tafun Nyiɛkpɔɔ
we u krɔkuɔn kpɔɔ kre wɔ
fimi na kre,
pe swafiŋge, na pe swanyiɛ yire
wa jaa pe shɔ.
U krɔkuɔn we pe na kanhun yi
mbe waŋgra ŋga kro kla,
we ti mbe yira kro nyu to
nyaanyaa,
we leele kla tra yiɛ na kro.