Habakkuk Hlɛ
1
O Tafun Nyiɛkpɔɔ na tia mi u keenyanyofun Habakkuk, na u kee nya nyiɛlɛ na.Habakkuk Taanraa
2 O Tafun Nyiɛkpɔɔ,
fuŋga ma ni mu tali,
a mu n na ndru ni pan.
Ni nyɛni na mu yeeri,
kena nyjila ŋgi nu mu o shɔ,
mbe yili pɔɔrɔ kee
nyjɛ yi o lii ŋga nu wo?
3 Mni a mu tia ndaa sisam kee
nyjɛ nyaa ma ŋga hin?
Mni a mu kolo ŋga,
a yire kefuɛn nyjɛ na pini
ŋga hin?
Pɔɔrɔ, na dɔɔya kee bribri yi fɛ
mu ni kun,
kakrɔ na wiire yii wa
lawee kro nu.
4 Mbra n ja na tnumu tuni na,
a ki tia kpra liire n wa na.
Sisampefɛɛnlɛ frakafɛɛnlɛ fɛ
mu kun,
a ki tia pra kpra fɛɛnlɛ.
Kee Ŋga O Tafun Nyiɛkpɔɔ Na Yo
5 A o Tafun Nyiɛkpɔɔ na yo u leele pre pan mbo,
“E na waŋgrɛ nyjɛ yi e fɛ
mu e kun yire le rɛ,
kee nyjɛ ee nya
yire we e pe kawako ni.
Ŋgi na hin? Ni paan
mbe kee ka pe e nyjila ŋga nu,
hali na e ki loo, yaa ki shɔɔ li.
6 Ni paan
mbe Babylon leele ŋga jaŋga,
pe ndra we sheli,
a na pe wii pia jawa.
Pie wi mbe tro waŋgra ŋga kro nu,
mbe trɛ nyjɛ yi n pe pe wee shɔ.
7 Pe kee fiɛrɛ ni mu tro,
pre titi mbra nyjɛ pe leni
peyɛ pan na pe taari,
na peyɛ kaan kpɔɔmu.
8 Pe ŋunɔ wi soolo
pree nyaa nyaa
mu wɛ kajinyurɛ na,
a pe kee fiɛrɛ ni mu wɛ
komboolo mblɛ klo ta na.
Pe leele mblɛ pe wii soolo ni
pre yiri haalee,
na tra taanla na juari na paan.
Pan pe nyi na nyuu
u chuun, mbe kaara wru tra.
9 Pɔɔrɔ ni pe wifɛɛnlɛ pre wii,
a na pe paan,
ndro ŋmba we pe nya kpan,
fiɛrɛ we u yii kpɔɔ.
A leele mblɛ pe wi mu yii,
pre nɛɛ mu tro,
a ndro wa jaa pe tɔɔnri.
10 Pe n ŋulo le mu nya,
na loplombo pini na tɛɛ.
A pe kee ka ma
na mboe nyjɛ pe sin,
mu kakpɔɛ fɛ mu kun ni,
na pe da yi na,
mbe pe tra fa mbe ble yi kro,
mbe nduu yi na
mbe le chia kre na,
mbe wii ki shɔ.
11 Na ki pan ma, pie lawee kre pɔ
mbe tro na fuflɛ yi mbe sɛ.
Pre sisampefɛɛnlɛ mblɛ,
faŋga ŋga pe nu pe sumi.”
Habakkuk Ndru Mu Paara Nyiɛkpɔɔ Ni Na
12 “O Tafun Nyiɛkpɔɔ,
mu yire yira kro nɔɔ hle nyjila,
ŋu wi Nyiɛkpɔɔ.
Ni Nyiɛkpɔɔ, ŋu mu pe cheche,
a ni chin na waa ku.
O Tafun Nyiɛkpɔɔ,
ŋu wi Dnɛ kpɔɔ ŋga na o kaan,
a ŋu mu Babylon leele wɔ,
mu pe ŋga jaŋga
mbe pe o ndie tini.
13 Nyiɛkpɔɔ, ma jaa pieri,
mbra pre sisampefɛɛnlɛ
mblɛ le nyini ni. Ŋgi na hin?
Mna sisam kee dumbrɛ.
Kena mni a mu pre sisampefɛɛnlɛ
mblɛ ti hin?
Mu pieri mu pre kefuɛn pefɛɛnlɛ
mblɛ nyini ti,
a pra mblɛ pe prɔ pe na klai,
mni a mu pre sisampefɛɛnlɛ
pre ti ŋga hin?
14 Nyiɛkpɔɔ, ŋu mu leele kro wa
waŋgra ŋga nu,
a pe pe na mbroe, ndee yurɛ
mblɛ pee wa epo nu,
a pe n yɛklo ni lɛ.
15 A loŋgoolo sisampefɛɛnlɛ
pre pan mu pe yii,
drawa, na asau ni na shie,
a pe yiɛ shɔ.
16 Na pee wa pe waŋgra nu,
pe asau yire pe sumi,
na sra woni na yi kaan,
ŋgi na hin?
Yi pe kaan sro chichiele
nyjɛ pe chaa.
Pe asau yire tia
praa yirɛ nyjɛ pe chaa taa.
A pe yiɛ na shio,
sro nyjɛ pe chaa yire na.
17 Kena pie kro mbe asau yire tɛɛ
mbra waŋgrɛ klai,
mbe pia pe fooro le ra?”