Nineveh Ndie Tiniɛ
3
Nineveh atɛ!Linkufɛɛnlɛ kakpɔɔ atɛ,
kafinɛ kee, na yirɛ
nyjɛ pe foolo ŋunɔ
bribri yi mu nyi.
Nyjila kro nu nyimi knanwoo
na la mu na.
2 Ndie tɛɛ mu loo,
fwa tini na paan,
a soolo na yeni na paan,
na sookɛɛ ni.
3 Ŋunɔwifɛɛnlɛ tni pe soolo na
na paan,
a pe brɔfiɛn yiɛshiin
na nyini pe kɛɛ plipli,
a pe chomboolo nyu na tlan.
Pe leele gbo mu wo,
a pe n nyu ni,
a leele na nyaari na gbroi
gboolo pre na.
4 Nineveh, pan mu nyi
na tɛtiɛrɔɔ wi,
ŋu mu dobodobo
na tiprɛm kee teeri,
na waŋgrɛ peerii pɛlɛ
na pe yiri.
5 O Tafun Nyiɛkpɔɔ Jaŋgafun
wre yo mbo,
“Nineveh, mbe mu dodonyi tini
mbe mu yiɛ tɔ,
mbe ti mbe waŋgrɛ mu fɛɛrɛ nya,
mbe nyifɛɛrɛ mu gbo
pe yiɛ na.
6 Mbe ti mbe mu kaari
nɛɛrɛ ndro,
mba mu le mbe nya,
a mu kee we pe leele pan
kpɔli ni.
7 Leele mblɛ pie mu nya kpan,
we na feni mbra yilii mu nu,
mbra yuu na
Nineveh kakpɔɔ kre ja,
ŋmbi we nyɛni mbe mu ŋga hin?
A sena ndro nyi
mbe mu bre hin?”
8 Nineveh, kolo ŋgi na mu prɔ
Egypt tra kakpɔɔ
Thebes kre na hin?
Nile lɔɔ kre na kre kakpɔɔ
kre fɛ mu kun,
kre kra ki fɛ mu kun
na mboo yi.
9 Ethiopia na Egypt waŋgrɛ yire
yiraa wii na yaa Thebes na,
yire na Sudan na Libya ni.
10 A nde pra pan mu wi
na Thebes ni,
mna ki leele yii mu sɛ na pe ni
waŋgra fɔŋgɔ nu.
Pra ki bifimble gbun mu gbo,
mna pe wo ki lete yire kro na.
Mblɛ pra pe yii pre na kɛɛn tɛɛ,
mna ki lebiile yɔɔlɛ
mu peyɛ ŋga,
mna tɔɔnrɔ jlɔnyi le
pe lekpɔɛ na kro,
mu sɛ na pe ni.
11 Nineveh, fuŋga rɛ, ŋu na ki da,
mu simi gbɔ mbe to,
mbra chaa mbe fɛ mbe sɛ ndra,
mbe shɔ mu loŋgoolo kɛɛ.
12 Lawee nyjɛ nu e feni na shie
na ndra ŋunɔ nyjila yire kro,
pan yie pe na fig tiŋge
ŋga sɛnyi yi nyina yi,
na pe ki nyaara to,
mbe yi sɛnyi yire na knumu,
mbra lee ŋmba u yi chaa
mbe ka wre nyuu.
13 Yiɛ wa mu mu ŋunɔwifɛɛnlɛ
pre kro le,
pan pe nyi na chiɛlɛ lɛ.
Kanhun mu jlonwee nyu krɔɛ
yire sro,
a ki tia kolo sni
mbe mu loŋgoolo ta mbe le.
14 Nyumu ko nyaanyaa,
mu ki tɛɛ mu pooro bri,
mu mu mboo kre gbeele mu sin,
pooro kre bri,
mu tofae kun nyaanyaa.
15 Imi na mu pe kro,
pie mu sro mbe wo,
a pie mu leele gbo
brɔfiɛn yiɛshiin ni.
Hali na e nɛɛ na kpatɔ lɛ,
pie e pe imi na kpatɔ
shɔlɔ kaa kre.
16 Mna tia mu jafalifɛɛnlɛ na nɛɛ,
hali pra nɛɛ mu wɛ
wɔɛlɛɛ nyjɛ yii wa nyjeeri na.
La, mu loŋgoolo pre we
pe na kpatɔ lɛ,
mbe tra kre kla
mbe yiri mbe sɛ.
17 Pan mu loplombo
na mu shiefɛɛnlɛ pre nyi
na kpatɔ lɛ,
na yila nyjii, mbe pe paan tni
mu mboo kre na,
na yila yili mbe pe yiri mbe sɛ,
ndro wa chin mna pe sɛ.
18 Assyria waŋgra, mu ŋulo ku ku,
a mu loplombo sni
pia jaa nyi na.
A mu leele pre fɛ mu nyina
nyuɛ na,
a ndro n wa
mbe pan na pe ni katoo.
19 Kee ŋga ki mu da kre kpɔɔ,
yaka n wa
mbe jaa mu shɔ ki nu.
Ndro ŋmba
we mu kee kre loo kpan,
ki tna ufun wre pan na mu to,
mbe ufun wre na kɛnyi koori.
Ŋgi na hin? Ndro nsraa wa,
a mu nsraa u pini
ndrashelee kee.