Micah Hlɛ
1
Nyjila ŋga nu Jotham, na Ahaz, na Hezekiah na Judah ŋunumu li mu taala kre, o Tafun Nyiɛkpɔɔ na kee wɔ mu Moresheth ndro Micah wre nyina, mu wru Samaria, na Jerusalem haa.2 E loo, e kro e ndie tɛɛ e loo,
tra ŋga, na yirɛ nyjɛ
yii wa ki na kro,
e loo.
O Tafun Nyiɛkpɔɔ Jaŋgafun wre,
wre titi we yire
u Suminyuŋgo
cheche kre nu,
mbe dansiɛrɛ li mbe e taan.
3 E le, o Tafun Nyiɛkpɔɔ wre,
u yili u tnihaa wa nyjeeri
na paan,
u paan mbe sɛɛnlɛ pɛɛri ndoe
yire kro taanla mbe mbra tra.
4 Nyuɛ we na nyani
u jeelee tapan,
mbe pe na srɛ kanya
pe le kanhun,
mbe pe na nyumu
pe yire kotum na,
mu kan mu wo,
a kra fuu na tri landɛɛ nu.
5 Yire kee nyjɛ kro we pe,
ŋgi na hin?
Israel leele sisaa pe,
mu yiri mu Nyiɛkpɔɔ taan.
Samaria leele,
pre pe Israel leele le sisam nu,
a sɛɛnlɛ pɛɛri ndoe nyjɛ yii wa
Jerusalem na yire,
yire yi tia Judah leele le
sisam nu.
6 Ki tia mi Nyiɛkpɔɔ,
mbe ti Samaria kaari kajaa,
mbe pe tre seele fali wa.
Mbe ti mbe pe yi kramboe koli
mbe wo landɛɛ kre nu,
mbe ki nyinyi nɔɔ yi na,
nyaa fimi na.
7 Samaria sɛɛnlɛ nyjɛ pe tɛ
tinyi ni yire kro,
pie yi chile bujibuji mbe yi sro.
A swa ŋga chiɛlɛ mblɛ pe tiɛri
sɛɛnlɛ yire nyinyi nu taa yire kro,
pie yi sro mbe wo.
Swafiŋge, na swanyiɛ nyjɛ
pe paan na sɛɛnlɛ yire
kaan yire, fumblɔ
mblɛ pe yiri waŋgra ka nu
pie paan yi koli,
mbe Samaria tiɛrifɛɛnlɛ pre
fɔlɔ tɔ na yi ni.
8 Kre kee ŋga ndra na,
mbe nyɛni, mbe kuulo tɔɔnri,
mbe nyaari wejiwaara,
na jewaara,
mbe ki nyina na fooro ni lii.
Mbra gnu na kombo wi,
mbra jiin na kuwee wi.
9 Klɛ nyjɛ yi to to
Samaria leele na yire
wa jaa tra.
A kre kanyana kre chɔɔ,
kie Judah leele we nya.
Hali kie kna,
mbe sɛ le Jerusalem leele nu.
Loŋgoolo Le Jerusalem Na
10 Kee nyjɛ yi o nyaa ŋga,
yaashia yi yo Gath leele pan,
a yaashia nyɛni mbe pe loo.
Yire mblɛ ee wa
Beth-Ophrah na,
e gbila bloŋgo nu,
mbe ki nyina na fooro e lii.
11 Yire mblɛ ee wa Shaphir na,
e nyaari wejinwaara,
mbe nyifɛɛrɛ e gbo.
Leele mblɛ pee wa Zaanan na pre,
wa jaa yili pe chia kre na.
Na e waa loo a Beth-Ezel leele
na fooro lii kre,
kena e chin na yaa jaa fɛ
mbe sɛ kaari wa.
12 Maroth leele wa kanyana
kpɔɔ nu,
na shɔfun chaa, ŋgi na hin?
O Tafun Nyiɛkpɔɔ tia
kanyana to pe na,
hali mu sɛ le
Jerusalem leele nu.
13 Yire Lachish leele,
e e soolo pre pɔ pɔ
sookɛɛ yire na,
yire e tia Jerusalem leele le
sisam nu.
Israel leele pre sisam
nyjɛ nu pe le kro,
yire e pe le yi nu.
14 Fuŋgaami ŋga yire
Judah leele,
e Moresheth Gath leele
pre kla,
Achzib leele wa jaa ya
Israel ŋulo na.
15 Yire Mareshah leele,
o Tafun Nyiɛkpɔɔ we e le,
e loŋgo kɛɛ,
we paan wi na e ni
mbe e chia kre shɔ,
mbe Israel ŋulo fɛ,
mbe sɛ tni Adullam
dnɛ wee kre nu.
16 Judah leele, ee e ndrɛ klu,
e na e biile mblɛ
e kori pre nyɛni.
E e ndrɛ klu gbeligbeli,
na kɔkɔsaki ndra yi,
ŋgi na hin? Pie e biile pre yii,
mbe sɛ waŋgra fɔŋgɔ nu.