Jonah Hlɛ
Jonah Na Ndikana Pe Nyiɛkpɔɔ Na
1
Ki ble ka o Tafun Nyiɛkpɔɔ na paara Jonah Amittai biblɔ wre pan mbo, 2 “Sɛ Nineveh kakpɔɔ kre na, mu sɛ pe jaari na ni pe sisam kee nyjɛ pe pini yire kro nya.” 3 La, Jonah na Nyiɛkpɔɔ tuŋɔ kre je mna fɛ mbe sɛ lawee fɔŋgɔ nu. Bawa wra sɛ yili Joppa na mna krɔ badaaŋga ka nya na ki shie Tarshish na, a wra swa tɔ, mna sɛ tni mu chaa leele pre nu na feni, mbe wa o Tafun Nyiɛkpɔɔ wre tuŋɔ kre sɛ.4 La, o Tafun Nyiɛkpɔɔ na tia fuflɛ kpɔɔ ka na gbun, na pee wa epo yiɛ na na shie, a krɔ kre na chaa yɔɔlɛ. 5 Ki tia fiɛrɛ na leele pre yii kpɔɔ, a praa pe sɛɛnlɛ yeeri, na yirɛ nyjɛ yii wa krɔ kre nu woni na waa lɔɔ kre nu, mbe ki pe foofoo. Kre nyjila kre, na Jonah sɛ sni krɔ kre tapan kokoo ka na na ŋunu.
6 A krɔ kre lopom wre na u nya wa mna kna mbo, “Sni mu sni na ŋunu? Yiri mu mu sɛɛn yeeri, aada kie o fooro le mbe o ŋmaa shɔ.”
7 Bawa krɔ kre leele pre na kna mbo, “O wolo, e ti o kɛɛn tɛɛ mbe ndro ŋmba u pan na kre kala sisaa ŋga nyini ni o na chin.” A pra kɛɛn tɛɛ, a kra Jonah wɔ. 8 A pra u wie mbo, “Kpra yo, ŋmbi u pan na kre kanyana ŋga ni o na hin? Yira ŋgi tnumu mu tuni krɔ ŋga lam hin? A waŋgra ŋgi nu mu yiri, a ndro ŋmbi nyini wi ŋu hin?”
9 A Jonah na kna mbo, “Hebrew ndro wi mi, a ndaa o Tafun Nyiɛkpɔɔ ŋmba u nyjeeri, na epo, na tra wa wre sumi.”
10 A wra kna mna yo pe pan na o Tafun Nyiɛkpɔɔ u ni tun, a ndaa feni. Ŋga wra yo ma kre fiɛrɛ na krɔ kre fɛɛnlɛ pre yii kpɔɔ, a pra kna mu yo u pan mbo, “Mni a mu pe ma hin?” 11 Kre nyjila kre, na fuflɛ kree wa na gbuun kpɔɔ na yaa, kra tia leele pre na wie mbo, “O mu pe mni mbe fuflɛ ŋga nyu nyjii hin?”
12 A Jonah na kna mbo, “E ni wɔ e wa epo kre nu, fuflɛ kre nyu we nyjii. Ni chin na mi na kre fuflɛ gbaŋgɔ ŋga yila na gbuun.”
13 La, leele pre na gbeŋmba mbe krɔ kre bri mbe ndru pe kro. A pe nsraa ki jani, ŋgi na? Fuflɛ kre naa nyumu kre wru kpɔɔ mu wɛ ki jle na. 14 Bawa pra nyɛni mu o Tafun Nyiɛkpɔɔ yeeri mbo, “O Tafun Nyiɛkpɔɔ maashia o ndie tini na o wre ndro ŋmba gbo finfin, ŋu o Tafun Nyiɛkpɔɔ mu tia nyjɛ kro pan ma.” 15 A pra Jonah wɔ mna u viŋge mu wa epo kre nu, titɛɛ kre nu a fuflɛ kre nyu na nyjii. 16 Kre kee ŋga ndra na, pra o Tafun Nyiɛkpɔɔ wre fiɛ, ki tia pra sra wɔ mu u ŋga, a pra nyu yo na pie sumi.
17 O Tafun Nyiɛkpɔɔ na tia mbro badaaŋga wa na pan mu Jonah jɔli, wra li mbro wre lɛɛ ble nununu taarɛ, lafo na blee.