Obadiah Hlɛ
O Tafun Wre We Edom Kla
1
O Tafun Nyiɛkpɔɔ Jaŋgafun wre na Edom tra kre na ki leele kee wɔ mu Obadiah nyina.Wra u bituŋu tun trɛ yire leele pan, a pra u mana loo mbo,
“E eyɛ kna mbe o sɛ wi na,
Edom leele ni.”
2 O Tafun Nyiɛkpɔɔ wre na yo
Edom leele pre pan mbo,
“Mbe ti e faŋga kɔ e nu,
a mbe ti leele e le fiɛn.
3 E yɛkpɔɔmu tɛɛ mu eyɛ fana,
ŋga e dnɛ tɛɛ mu mboe sin,
mu e kakpɔɛ fɛ mu kun,
nyuɛ ndra na kre na,
e yuu na,
‘Ŋmbi we jaa o tre tra hin?’
4 Hali na e yiri mu sɛ,
e nyinyi sin nyjeeri haalee,
na nyuu zeere yi.
Hali na e sɛ yi sin,
mu chaa wɔɛlɛɛ nu kuraa kre,
mbe e tre tra.”
5 Na juolo pan mbe ju blee kre,
yirɛ nyjɛ pe chaa pie wru,
a na leele tinyi sɛnyi kuun kre,
imi na kie pe kpan,
chiɛri yɛ we kro tiŋge kre na.
La, yire rɛ,
e loŋgoolo we e yirɛ koli peii.
6 Esau nanae,
pie e krɔyirɛ koli kro.
7 E tamfɛɛnlɛ mblɛ yire na pre,
na tna pre,
pie e fana mbe e ni
mbe yili e tra nu.
Leele mblɛ yire na pre
naa wa mu tni
wejinyiŋge nu pre,
pre pie jaŋga ta e na.
E nɔɔlɔ mblɛ yire na pre,
na kɛ le mu li pre,
pre pe e pɛɛri pɛlɛ kre,
pre pe e kee yuu mbo,
“Sena pe kachindɛ nyi hin?
8 Ki ble ŋga mbe,
Edom leele ndie tini kre,
mbe pe kachindɛ wɔ pe nu,
mbe pe kla.
9 Fiɛrɛ we Teman
ŋunɔwifɛɛnlɛ yii,
a soja ŋmba uu wa Edom na kro,
pie u gbo.
10 Mbe e ndie tini,
ŋgi na hin?
E na e wolo,
Jacob nanae pre gbo,
mu pe yirɛ foolo.
Mbe e kla,
a mbe ti mbe e yiɛ le nyumu.
11 Nyjila ŋga nu loŋgoolo,
na pan mu Jerusalem
jlonwee nyu krɔɛ yire kuari kre,
na ee wa mu yire na le.
E na eyɛ pe na
loŋgoolo pre plɛ lɛ yire,
nyjila ŋga nu pra kɛɛn tɛɛ,
mna yire yi na,
na Jerusalem krɔyirɛ yɔɔlɛ,
na pe yɛ kaan kre.
12 E wolo Judae pre
kanyana nyjila kre,
ki n fna e na pe ma,
ki n fna mbe e yiɛ na shɔ,
pe kla nyjila kre nu.
Ki n fna e naa pe tɛɛ,
pe kanyana nyjila kre nu.
13 Ni leele pre kanyana ble kre,
ki n fna mbe e na le,
kakpɔɔ kre na,
mbra pe yirɛ koli,
mbe pe kanyana kre
na tna e pan.
14 Ki n fna mbe e na sɛ yire,
kochiɛnlɛ na mbra
mblɛ praa feni mbe shɔ pre yiri.
Ki n fna mbe e na pe yii,
mbe le loŋgoolo kɛɛ
pe kanyana ble yire nu.
Nyiɛkpɔɔ We Leele Kpra Kun
15 Mi e Tafun Nyiɛkpɔɔ,
ni nyjila kre da,
mbe ni leele kro kpra kun.
Edom leele,
kala ŋga e pe kro,
pie ki ka pe e na na.
Sisam kee nyjɛ e pe yire kro,
we tuu e ndra na.
16 Imi na e ni leele pre fiŋge,
ni nyua cheche kre na
mu da kre,
pan chɔɔ mbe ti waŋgrɛ nyjɛ,
yi e fɛ mu kun yire pe.
Ee pe na gbɔɔ e gbɔ mu to,
mbe sɛ fun kuraa,
ndro wa e sɔɔnri na fio.
Pan kie pe na
e n da mu tni tra ŋga nu.
Israel Leele We Pe Loŋgoolo Ja
17 La, nyua Zion ŋga na,
Jerusalem nyi kre,
we pe ndra haa,
mbe mblɛ pie fɛɛ shɔ pre ŋga.
A kie pe lawee cheche,
mbe Israel leele pre ndruu pan,
mbe pe krɔyira kre shɔ mbe tni.
18 Kre nyjila kre,
Israel leele pre
we pe na kanhun
ŋga ki nyini yi,
a Edom we pe na,
kɛɛn nyjɛ pe sro,
a yi kuɛn kro yi.
Kanhun kre we paan,
yi sro putuu,
mbe yi lala mbe tro,
hali yaka wa kro,
Edom tra nu na.
Mi e Tafun Nyiɛkpɔɔ,
ni paara.
19 A ni leele mblɛ
pee wa Negev na pre,
we pan mbe Edom
nyua chia kre wru mbe tni,
a mblɛ pee wa Judah nyuɛ
tapan pre
we Philistine tra kre wru mbe tni.
A Ephraim na Samaria trɛ,
we pe Israel leele wee.
A Benjamin sele leele
we sɛ Gilead tra wru mbe tni.
20 A Israel leele mblɛ pe sɛ kro
plɛ waŋgra nu, pre we ndru
mbe paan Phoenicia tra shɔ,
hali mbe sɛ yili Zarephath na.
Jerusalem leele, mblɛ pra yii
mu sɛ fimi haa pre,
we ndru mbe pan pe tra nu,
mbe paan chiɛ kun
Negev lawee yire nu.
21 Jerusalem leele mblɛ
pe wi mu yili pre
we sɛ Edom tra shɔ mbe tni,
mbe ki ti o Tafun Nyiɛkpɔɔ
wre titi pe ki ŋunu.”