Nyiɛkpɔɔ Pimikuɔn
9
Ndaa o Tafun Nyiɛkpɔɔ nyana uu wa mu yire,
sragbunu kre jaara,
mna yuu mbo,
“E Suminyuŋgo pilaasi yire ndrɛ,
yire gbun e kuari,
mbe nyuŋgo kre seeri,
mbe juari mbe wo,
leele pre ndrɛ na.
A pe hamblɛ mblɛ pie kro pre,
mbe pe gbo ŋunɔ.
Ndro wa shɔ pe nu.
2 Hali na pe wee tuu,
mu le mu sɛ kuulo ndoo kuraa kre,
mbe pe yii wa.
Hali na pe nduu mu sɛ nyjeeri,
mbe pe tre tra.
3 Na pe sɛ ndra
nyua Carmel ndra na,
mbe sɛ pe haa cha,
mbe pe yii wa.
A na pe tii mu sɛ ndra,
epo tapan kuraa kre,
mbe ti mbe epo wɔɔ kpɔɔ wre
pe niɔ wa.
4 A na pe loŋgoolo pe yii tinlɛ,
mu sɛ na pe ni
waŋgra fɔŋgɔ nu kuraa kre,
mbe ti pe pe gbo wa.
Ni jawala pe na,
mbe pe kla,
yaa ma mbe ya pe na.”
Nyiɛkpɔɔ U Gbeele Na Klai
5 O Tafun Nyiɛkpɔɔ Jaŋgafun wre,
na u tii tra mbe tra na seeri,
mbe ki leele na fooro lii.
Mbe tra ŋga kro na yiri nyjeeri,
mbra tuuri,
imi na Nile lɔɔ nyini
mbe nduu nyjeeri,
mbe ndruu tii kre.
6 O Tafun Nyiɛkpɔɔ
u tnihaa pe nyjeeri,
mu tia nyiɛ tra yiɛ tɔ.
Wre u epo nyumu yeeri,
na ki woni tra na,
u mɛɛ o Tafun Nyiɛkpɔɔ.
7 O Tafun Nyiɛkpɔɔ wre yo mbo,
“Yire Israel leele,
pan e nyi ni pan
na Ethiopia leele lɛ.
Mi ndaa Philistine leele wɔ
mna yili Crete tra nu,
mna Syria leele wɔ,
mu yili Kir tra nu,
imi na ndaa e wɔ,
mu yili Egypt tra nu kre.
8 Mi wi e Tafun,
Nyiɛkpɔɔ Jaŋgafun wre.
Kpra na,
ni yiɛɛ wa yire Israel
sisam waŋgra ŋga na.
A mbe ki kla,
mbe flo tra ŋga yiɛ na.
Yire Jacob nanae pre,
mba e kro kla ya.
9 Mbe ti mbe pe
yire Israel leele nyaara,
imi na pe shɔlɔ chlɛ kre.
Mbe pe chlɛ waŋgrɛ yire nu,
mbe pe mblɛ nu,
tnu n wa pre wa.
10 Sisam pefɛɛnlɛ mblɛ pee wa,
ni leele pre nu kre,
pie pe gbo ŋunɔ.
Mblɛ pe yuu na,
‘Nyiɛkpɔɔ wa ti
mbe yaka o ta pre kro
we to ŋunɔ.’”
Mbakɔ Shɔmu
11 O Tafun Nyiɛkpɔɔ wre yo mbo,
“Nyjila kaa wa na paan,
mbe ni ti pe
ŋunu David katoo ŋunumu,
ŋga ki pe na kajaa yi kre,
ndru mbe yire na.
Mbe ki mboo,
ŋga ki juari kre gbeele,
mbe ki yire na ki fa yi.
12 Na ki pan ma,
Israel leele pre we wi,
na leele mblɛ pe kro
Edom tra nu pre ni,
mbe pe ja,
yire na waŋgrɛ nyjɛ,
yira pe mi Nyiɛkpɔɔ
wee yire ni kro.
Pan mi e Tafun Nyiɛkpɔɔ,
ŋmba mbe ti
yire kee nyjɛ pe wre yo.”
13 O Tafun Nyiɛkpɔɔ wre yo mbo,
“Ble yɛɛ wa na paan,
yire ble yire nu
tra kre we tna mbe tro,
falifun wa shɔlɔ luu mbe kɔ,
na nyjɛ u klu mu luu yire lɛ,
mbe u yi kun,
a tre sɛnyi we bɔ,
a pia jaa yi tɛɛ mbe simi pe,
kre nyjila kre simi taan we bɔ,
nyambie yire na,
mbra fuu yi na.
14 Mbe ndru mbe pan na,
ni leele ni pe tra nu,
mbe pe paan pe kakpɔɛ,
nyjɛ yi juari yire gbeele,
mbe sin mbe tni yi na.
A pie tre seele pe,
mbe yi simi ta mbe gbɔ.
A pie sro luu mbe yi ta mbe li.
15 Kre nyjila kre,
mbe ni leele pre luu,
na tiŋge yi pe tra
ŋga ni pe ŋga kre nu.
A ndro wa jaa pe kɔ ki nu,
mbe wa na.
Mi e Tafun Nyiɛkpɔɔ wre
ni ki yo.”