Joel Hlɛ
Kpatɔ Na Pan Mu Tra Kre Tɔ
1
Kee ŋga O Tafun Nyiɛkpɔɔ na yo, Pethuel biblɔ Joel wre pan na yi kre.2 Yire loplombo pre, e loo,
yire mblɛ ee wa
Judah tra nu kro, e ndie tɛɛ.
Kee ŋga ka nyini da
mu pe e nyjila,
ndee e tolɛɛlɛ nyjila tuun?
3 E ki kee yo e biile pan,
mbe pre kɔɔ ki yo pe biile pan,
mbe biile pre kɔɔ ki yo
mblɛ pie yiri pre kɔkro pan.
4 Kpatɔ na pan gbee tataara,
mna pan mu sro ka.
Plɛ na pan mu ka mu yɛ ti,
a hamblɛ na pan
mu yi hɛnyi taa mu ka.
5 Yire mblɛ e gboo na tuuri kre,
e yiri e nyɛni,
yire mblɛ e simi gboo kre,
e bibɛɛ le.
Ŋgi na hin?
E tre sɛnyi nyjɛ ni e simi pini
yire kla.
6 Ŋunɔ wifɛɛnlɛ tataara plɛ pan
mu o tra kre tɔ,
pe sheli, mu nɛɛ,
a ndro wa jaa pe tɔɔnri,
pan pe ŋgaala nyu tna
na jira wee yi.
7 Pe o afue seele ka peii,
mu o fig tinyi yire kla kro.
Hali pe yi naŋgrɔɛ laala yi na
mu wo,
a yi fniŋge mu yire.
8 E nyɛni na bichable
ŋmba u n blɔ chin,
u kumu yoŋgo paari,
na blɔ ŋmba we na leŋge nyɛni.
9 Shɔlɔ, ndee simi n wa,
mbe pe tɛɛ mbe sra wɔ
Suminyuŋgo wa.
A srawɔfɛɛnlɛ pre na nyɛni,
ŋga pe n yaka ta mbe sra wɔ,
mbe o Tafun Nyiɛkpɔɔ ŋga
kre ndra na.
10 Tra kre sni ma waara, mu yua,
a shɔlɔ nyjɛ tra kre nu kro kla,
a simi fɔŋgɔ fooro to,
a simi liwo n wa na.
11 Yire falifɛɛnlɛ, e fooro li e nyɛni.
Yire mblɛ e afue see teeri kre,
e bibɛɛ le,
e ti mbe fooro e yii
shɔlɔ nyjɛ e fali yire na,
ŋgi na hin?
E sro kro kla.
12 Afue seele yire kro yua,
a fig tinyi yire kro nyaara,
a tinyi hɛnyi nyjɛ sɛnyi pe lii,
na tinyi nyininyini yire kro ku.
Ki tia leele pre yɛshɔɔrɔ kɔ.
Jawala Chinɛɛ
13 Yire srawɔfɛɛnlɛ
mblɛ e sumi sragbunu kre na kre,
e kumu yonyi tɔ, e nyɛni.
E sɛ Suminyuŋgo wa,
e sɛ nyɛni mbe nyiŋge paan se,
ŋgi na hin? Shɔlɔ, ndee simi n wa,
mbe e tɛɛ sra wɔ
mbe e Nyiɛkpɔɔ wre ŋga.
14 Leele pre,
na loplombo pre kro yeeri,
mbe e sɛ fni o Tafun Nyiɛkpɔɔ,
Suminyuŋgo wa,
mbe blefun mbe nyɛni mbe u yeeri.
15 O Tafun Nyiɛkpɔɔ ble kre mbra mna,
a Jaŋgafun Nyiɛkpɔɔ wre
we lawee kla.
Ki ble kre we pe fiɛrɛ ni titi.
16 O yiɛ ŋga na o seele yirɛ kro kla,
a yɛshɔɔrɔ kɔ
Nyiɛkpɔɔ Suminyuŋgo wa.
17 Yirɛ nyjɛ o luu kro fɔɔn tra na,
ki tia o n shɔlɔ ta mbe tɛɛ,
a o sro tɛɛhaa yire kla.
18 O Nui wa na nyɛni na fooro ni,
a pan o mbaala kala nyaa,
ŋga nyaa n wa mbe pe ka kre ndra na,
a ki tia pe nyina.
19 O Tafun Nyiɛkpɔɔ,
ŋu ni nyɛni na yeeri,
ŋgi na hin?
O yurɛ kahɛɛ yire kro yua,
na yi tinyi kro ni,
na kanhun ki yi shɔ.
20 Hali nyaalam yurɛ nyɛni
na mu yeeri,
ŋgi na hin? Lafooloe yire yua,
a pe kahɛɛ yire kro yua
na sro pe yi sro.