Hosea 1

Hosea Hlɛ

Kee ŋga o Tafun Nyiɛkpɔɔ na yo Beeri biblɔ Hosea pan, nyjila ŋga nu Uzziah, na Jotham, na Ahaz, na Hezekiah na ŋunumu li Judah tra nu kre yi kre. A kre nyjila kre chɔɔ nu Jehoash biblɔ Jeroboam wre na ŋunumu li Israel tra nu.

Hosea Chɔ Na U Biile

2 Ŋga o Tafun Nyiɛkpɔɔ na yire Hosea na mbe paara na Israel leele ni kre, kee ŋga wra yo u pan na yi kre mbo, “Hosea, sɛ chlɔ cha mu leŋge, la, chlɔ wre we kɔɔ yili mu kro mbe tiɛri. Pan mu biile we pe na chlɔ wre wi, ŋgi na hin? Pan chɔɔ ni tra kre leele Israel wolo pre we laa ni kro mbe sɛ na tiɛri sɛɛnlɛ na.” 3 A Hosea na sɛ Diblaim bichlɔ wa wru mna leŋge u mɛɛ naa Gomer, a wre na wre na biblɔ se.

4 A O Tafun Nyiɛkpɔɔ na yo Hosea pan mbo, “Mu pɔ wre mɛɛ tɛɛ Jezreel, ŋgi na hin? Kia mu kuraa mbe ni pan mbe Israel ŋunu wre na u leele pre kla, linkuuro kee nyjɛ Jehu na li Jezreel^a chia kre na kre ndra na. 5 A Jezreel landɛɛ kre nu wa chɔɔ, na nyjila kre waa da mbe Israel wifɛɛnlɛ pre jaŋga shɔ pe pan.”

6 Gomer na siire ta mna bichlɔ se na. A O Tafun Nyiɛkpɔɔ na yo Hosea pan mbo, “Pɔ wre mɛɛ tɛɛ Lo-Ruhamah, ki nɔɔ nyina na koroo kɔ, ŋgi na hin? Mba Israel leele pre kori na, ndee mbe pe sisam ti mbe pe kɛ na. 7 La, Judah leele pre rɛ, mbe pe kori. Mi, pe Tafun Nyiɛkpɔɔ wre, mbe pe shɔ, la, ŋunɔ, ndee brɔfiɛn yiɛshiin, ndee bɛŋɛ na snimi, ndee soolo na pe nduufɛɛnlɛ na ma mbe yire mbe pe shɔ.”

8 Ŋga Gomer na pɔ wre kun nyinimi na kre, wra siire ta na, mna biblɔ se. 9 A O Tafun Nyiɛkpɔɔ na yo Hosea pan mbo, “Pɔ wre mɛɛ tɛɛ Lo-Ammi, ki nɔɔ nyina na ni leele ma na, ŋgi na hin? Ni leele ma Israel leele pre na, a pe Nyiɛkpɔɔ ma mi na.”

We Ndru Mbe Israel Leele Shɔ

10 Israel leele pre we nɛɛ na epo nyu tanyiɛ yi. Ndro wa jaa pe tɔɔnri, ndee mbe pe nyu chin. Fuŋgaami ŋga Nyiɛkpɔɔ yuu na u leele ma na, la, ble kaa wa na paan mbe u yo pe pan na, “Mi Nyiɛkpɔɔ ŋmba nii wa nyjila kro nu wre biile lɛ yire.” 11 Judah leele pre, na Israel leele pre we ndru mbe chaa mbe pe leele nunu. Pie chaa mbe ndro nunu wɔ mbe u pe yɛklo, mbe ki ti mbe pe ndru mbe yiri, mbe peyɛ ta tra kre nu. Kre ble kre we pe ble kpɔɔ mbe Jezreel chia kre ŋga.