Waŋgra Nyukɔɔrɔ
12
Kre Nyjila kre nu, Michael ŋmba u pe nyjeeri bitumblɔ loplombo pre wa, na mu leele le kre waa uyɛ wɔ kre, kre nyjila kre we pe kanyana nyjila kpɔɔ, a mu yire waŋgra gbeele nyjila ki ka n da mu pan tun. Na kre nyjila kre waa da, mu leele mblɛ mɛɛ kii wa Nyiɛkpɔɔ ŋmaa hlɛ kre nu kre, we ŋmaa ta. 2 A Lenɛɛrɛ mblɛ pe klu mu ku kre we nyi mbe ŋmaa ta na. Plɛ we blenyini ŋmaa ta, a plɛ we yɛkuuro ta blenyini. 3 A kachimblɛ pre we pe na nyisee yi, a pe mblɛ pe lenɛɛrɛ nyina a pra ŋga ki fraka pini kre, we na chiɛnri na wɔɛlɛɛ yi nyjila kro nu.4 La, Ŋu Daniel, fuŋga rɛ, hlɛ kre tɔ, mu ki nyu yii yira ni mu sɛ su dnunya nyukɔɔrɔ na. Kre nyjila kre, leele we na kila mbra tro lawee lawee nu, mbe ka ya pe hachila na.”
5 A ndaa bilɛ shiin plɛ nya lɔɔ ka mbɛɛ na, nunu naa wa ki kɛ ŋga na, a nunu naa wa kokoo ŋgaa na. 6 Bilɛ pre wa na nyjeeri bituŋu pre ŋmba wra yirɛ finyi prupru le, mna yire lɔɔ kre nyjeeri haa wre wie mbo, “Nyjila ŋgi nu yire kawako kee nyjɛ krɛrɛ we pe ma hin?”
7 A nyjeeri bituŋu wre na u kɛnyi shiin yire nyjeeri, mna da Nyiɛkpɔɔ ŋmba uu wa nyjila kro nu wre mɛɛ ni mbo, “Yɛlɛ taarɛ na yɔɔ nyu na, na pe Nyiɛkpɔɔ leele pre fiŋge mu kɔ, kre yire kee nyjɛ krɛrɛ we pe.”
8 Ndaa kee ŋga u yo kre loo, la, ni nsra ki nɔɔloo, ki tia ndaa u wie na, Ni tafun, kena mni nyjɛ krɛrɛ we taa hin?
9 A wra kna mbo, “Daniel, fuŋga rɛ, ki fna mu sɛ. Ŋgi na hin? Yire kee nyjɛ pe ndrandra kee mbe sɛ su dnunya nyukɔɔrɔ nyjila. 10 Lenɛɛrɛ we pe chasi, mbe nɛɛrɛ ka wa pe pe na pe tnimu nu, la, sisampefɛɛnlɛ we kro mbra sisam pini, a pia kee ka nɔɔloo fio. La, kachimblɛ pre pie nɔɔloo ta.
11 Mu yire nyjila ŋga nu pie blenyini sra wɔɔ yire tɔ kolo kre, na nyjila ŋga afuŋgo kee ŋga ki lawee jee kre we Suminyuŋgo kre shɔɔ tni kre, ble kagbeŋge na lafɛɛ shiin, na fuloe jijirɛ na kɛ we tro. 12 Mblɛ pie frɔ ta mbe shie mbe ble kagbeŋge, na lafɛɛ taarɛ, na fulo, na kɛmbɔkunɔ pan mbe tro kre wo yi dwamu.
13 A ŋu Daniel, kpra li mu sɛ kɔ. Mu ku ya, la, mu ndruu nyi mbe mu fɔtɔɔrɔ ta nyjila haŋa kre nu.”