Nyjeeri bituŋu wre na yo mbo, “Ŋulo jijirɛ we Persia ŋunumu li mbe taala pe yɛ na. A jijirɛwo wre we pe swafun mbe wɛ taarɛ pre na. U swa ta nyjila, na u jaŋga nyjila titi nu kre, we kanyaa le ndro kro nu mbe pe yiri mbe Greek nyu kaanri.

3 Kre nyjila kre ŋunu jaŋgafun wa we yiri, a we jaŋga ta waŋgrɛ tataara na, mbra ŋga u chaa kro pini. 4 La, u jaŋga kre kpɔɔ nyjila titi kre, u ŋunumu kre we yɔɔlɛ jijirɛ. A ŋulo mblɛ pe n yiri u sele nu pie paan ŋunumu li u titɛɛ, la, pe jaŋga wa da na u wo kre ni.

5 Egypt ŋunu wre we sheli, la, u ŋunɔwifɛɛnlɛ loplombo pre wa we yiri mbe sheli mbe wɛ u na, mbe wre titi ŋunumu li na jaŋga kpɔɔ ni. 6 Yɛlɛ yɛ kɔkro kre, Egypt tra ŋunu we nyu nunu pe na Syria tra ŋunu ni, mbe u bichlɔ wru mbe u ŋga mbe u leŋge. La, kre nyu nunu kre wa mu mbe ki nyu to, a chlɔ wre na u plɔ, na u pɔ, na u sumifɛɛnlɛ kro, pie pe gbo.

7 A kia mu mbe chlɔ wre sele ndro wa pan mbe pe ŋunu. Kre ŋunu wre we pan mbe Syria tra ŋunu wre ŋunɔwifɛɛnlɛ pre tɔ, mbe le pe chia ŋga pe mboe sin mu fɛ mu kun kre na, mbe wi na pe ni, mbe pe ja. 8 We wi mbe pe sɛɛnlɛ nyjɛ pe tɔɔnrɔ tɛɛ mu pe yire shɔ, yire na yirɛ nyjɛ pe swanyiɛ, na swafiŋge tɛɛ mu pe yire kro shɔ mbe sɛ na yi ni Egypt tra nu. We ti wejinyiŋge pan mbe pe yɛlɛ chiɛri yɛ, 9 mbe Syria tra ŋunu wre chiin pan mbe Egypt tɔ, la, Egypt tra ŋunu wre jaŋga we ti u ndru kro mbe sɛ u tra nu.

10 Syria ŋunu wre biile we peyɛ kna, mbe sojae tataara nyu ble mbe sɛ wi mbe lawee kla imi na lɔɔ nyini mbe lawee kla kpɔɔ kre, hali pie wi mbe sɛ su pe loŋgo wre mboo ŋga u sin mu u chia fɛ mu kun kre na. 11 Egypt ŋunu wre krɔ we kun kpɔɔ, mbe u sɛ wi na Syria ŋunu wre ni mbe u ŋunɔwifɛɛnlɛ tataara pre ja. 12 We u yɛ kpɔɔ wiire ŋga u wi mu yili, na ŋunɔwifɛɛnlɛ tataara mblɛ u gbo kre na, la, wa kro mbra wii mbra yilii nyjila kro nu.

13 Syria ŋunu wre we ndru mbe sɛ u yɛ kna mbe ŋunɔwifɛɛnlɛ tataara cha mbe pe nɛɛ mbe wɛ jle wolo pre na. A na nyjila titi kre waa da kre, we ndruu pan na ŋunɔwifɛɛnlɛ mblɛ pee wi yirɛ titi ni. 14 Kre nyjila kre nu lenɛɛrɛ we yiri mbe Egypt ŋunu wre taan, a ŋu titi Daniel waŋgra leele pɔɔrɔfɛɛnlɛ pre plɛ we yiri mbra chaa mbe kee nyjɛ pra nya nyiɛlɛ na yire pe kpra, kie ti mbe pe pnaŋa mbe sɛ wi, la, pie wi mbe to. 15 Ki tia Syria tra ŋunu wre ŋunɔwifɛɛnlɛ pre we pan mbe chia kre fɛ mbe kun, mbe yirɛ fa mbe ble mboo ŋga pe sin mu chia kre fɛ mu kun kre krɔ, mbe nduu yi na mbe tii chia kre na, mbe wi mbe ki shɔ. A Egypt ŋunɔwifɛɛnlɛ pre wa kro mbra wii, hali pe faŋgafɛɛnlɛ pre kple wa faŋga mbe yire pe yiɛ. 16 A Syria ŋunu wre we pe pe imi na u chaa, a ndro wa jaa kankan li na u ni, a we jaŋga ta tra ŋga Nyiɛkpɔɔ na nyu yo mna Israel leele ŋga ki yi kre na.

17 A imi Syria tra ŋunu wre we pe mbe u loŋgo wre ja kre, we u ŋunɔwifɛɛnlɛ kro nyu ble, la, we klu mbe u pɔ chlɔ wru mbe u loŋgo wre ŋga mbe u leŋge, mbe ki ti nyu nunu paan pe pe lalaa, la, nyu nunu kre wa ja mbe tnumu tun. 18 Kre kɔkro, Syria tra ŋunu wre we sɛ trɛ nyjɛ yii wa epo mɛɛ na wa yire leele tɔ, mbe wi mbe yi tataara shɔ, la, ŋunɔwifɛɛnlɛ lopom wa we paan u ja, mbe ki ti u u yɛkpɔɔmu kre ti, mbe u nyu ku. 19 A we ndru mbra shie u chiɛ nyjɛ pe mboo sin mu fɛ mu kun yire na Syria tra nu, la, na waa ndru na shie to, na u kɔlɔ yi.

20 Na wre yili wa, ŋunu ŋmba we pan kre we tɔɔ shɔfun wɔ, wre we paan leele pre fiŋge na tɔɔ shɔɔ ni imi kie pe mbe ka ya ŋunu wre yɛtaara na. Kia mu, ŋunu wre we ku, ŋunɔ nu ma we ku, a krɔ ni ma wa we u gbo.”

21 A nyjeeri bituŋu wre na yo mbo, “Syria ŋunu ŋmba u taa na kre wa lewo le mbe nya, a u n fna mbe pe ŋunu, la, nyu tnamu kolo na we tro mbe paan ŋunumu kre li jaŋga na mbe ki leele fo. 22 A ŋunɔwifɛɛnlɛ mblɛ pie kankan li na u ni kpan, hali na Nyiɛkpɔɔ Srawɔfun Lopom titi wi, we pe pɔ mbe laa wa. 23 Wre na waŋgrɛ yɛ we yira ka, mbe u yire ki na mbe pe ta mbe fana, mbe ki ti u faŋga ta mbe ya, ande tra fiɛn ka u le. 24 We sɛ yɛtaarafɛɛnlɛ plɛ fo, mbe pe tɔ mbe pe tra shɔ mbe ta. A we kee nyjɛ u tolɛɛlɛ n da mu pe tun yɛ pe. A we yirɛ nyjɛ u ta mu bali ŋunɔ yire yɔɔlɛ mbe u kotɔmblɔ pre ŋga. We u jawala pe mbe sɛ chia ŋga pe mboo sin mu fɛ mu kun tɔ, la, nyjila chiɛri ka ni we kre jawala kre pe, a kia jaa tnumu tun.

25 We gbuntitirem tɛɛ mbe sojae tataara cha mbe sɛ Egypt ŋunu wre tɔ, a kre nyjila kre, na wre uyɛ kna na sojae tataara faŋgafɛɛnlɛ ni na mbe wi, la, pie Egypt ŋunu wre fana mbe u wi mbe to. 26 Ŋgi na, u paaranyinafɛɛnlɛ titi pre plɛ we sɛ u wɔ mbe ŋga, mbe ki ti u sojae pre tataara to ŋunɔ, a wa sojae ta na. 27 Bawa ŋulo shiin pre we chaa mbe kɛ le kotolo nunu nu mbe li. Ande pe jawala n nyu na peyɛ ni chɔ, kala pie na fnɛ peyɛ pan. Pia kee ŋga pe jawa kre nya imi pe ki chaa, ŋgi na, ki nyjila n ta mu da tun. 28 Syria Ŋunu wre we ndru mbe sɛ u tra nu na yirɛ tataara nyjɛ wra foolo mu ta yire ni, we u jawala pe na we Nyiɛkpɔɔ leele pre sumiɛ kla. A we kee ŋga u chaa kro pe mbe chiin ndru mbe sɛ u tra nu.

29 Mbakɔ we ndruu paan Egypt tra kre tɔ na, a kre nyjila kre kaalɛɛ we yili yi yɛ na jle wee yire ni. 30 Leele we yiri krɔɛ kpɔɛ ni yila tohaa mbe paan u tɔ, mbe ki ti u sɔɔnrɔ ku.

A we krɔkuɔn tɛɛ mbe knaa Nyiɛkpɔɔ leele pre taan, mbra chaa mbe pe sumiɛ kre kla. A mblɛ yili Nyiɛkpɔɔ sumiɛ kre nu kre pre na we nyu.

31 U ŋunɔwifɛɛnlɛ pre plɛ we Nyiɛkpɔɔ Suminyuŋgo kre tɔ na nɛɛrɛ ni. Pie blenyini sra wɔɔ kre tɔ kolo, mbe afuŋgo kee, ŋga ki lawee jee kre tɛɛ wa. 32 Ŋunu wre we tro fana kolo na, mbe mblɛ pe pe sumi kolo wa kre ta mbe pe taa u kro, la, mblɛ pe taa Nyiɛkpɔɔ kro kre we yire gbiŋmbi mbe wi na u ni.

33 Yɛkulo kachimblɛ mblɛ pe Nyiɛkpɔɔ chin kre, we na lenɛɛrɛ nyina kee ŋga pie pe. La, kia mu, pie kre yɛkulo mblɛ plɛ gbo ŋunɔ, ndee mbe pe sro bibre. A pie plɛ yirɛ shɔ pe pan, mbe sɛ plɛ le nyuŋgo. 34 A nyjila ŋga nu pie na pe kuu kre, leele chiɛri plɛ pie ta mbe pe ya pe na. La mblɛ pie ya pe na kre kuraa, kpra ni ma pie ya pe na. 35 Pie yɛkulo kachimblɛ pre plɛ gbo, a kre kie ti mbe Nyiɛkpɔɔ leele pre pe chasi, mbe su nyjila ŋga wre Nyiɛkpɔɔ tɛɛ mbe ti yira kro nyu to kre nu.

36 Kee ŋga Syria tra ŋunu wre chaa kre we pe. We na u yɛ kpɔɔri na u wɛ sɛɛn kro na, hali we uyɛ pe na u kpɔɔ mu wɛ Jaŋgafun Nyiɛkpɔɔ wre na. Pan we kro mbra u yɛ kpɔɔri mbe sɛ su nyjila ŋga Nyiɛkpɔɔ we u ndie tini nu. Kee ŋga Nyiɛkpɔɔ jawa mbe pe kre we pe. 37 Ŋunu wre we sɛɛnlɛ nyjɛ u tolɛɛlɛ naa sumi yire je, yire na sɛɛnlɛ nyjɛ kee chiɛlɛ naa chaa yire kro. Kpra na, wa yiɛ taa sɛɛn ka na, ŋgi na, u jawala we u pe na u kpɔɔ mu wɛ yi kro na. 38 La, sɛɛn ŋga kie jaa kɛ tɔ chia ŋga pe mboo sin mu fɛ mu ku na we na kaan buuro. We swanyiɛ, na swafiŋge, na dnɛ chichiele, na yirɛ nyjɛ ndrɔ yi sheli wru mbra sɛɛn ŋga u tolɛɛlɛ n da mu sumi tun kaan. 39 Haka sɛɛn ni we sɛ wi na chiɛ nyjɛ pe mboe badɛnyi titi sin mu fɛ mu kun yire ni. A mblɛ pe u pe pe ŋunu kre, pre we ŋga buuro kpɔɔ, na lihaa kpɔɛ, na trɛ mbe ki pe pe fɔtɔɔrɔ.”

40 “Na Syria ŋunu wre nyjila haŋa kpɔklɔ waa da, Egypt ŋunu wre we paan u tɔ. Bawa Syria ŋunu wre we soo kɛɛ, na soolo nduufɛɛnlɛ, na krɔɛ wi wee tataara, na u faŋga kro tɛɛ mbe sɛ u fni. We trɛ tataara fo mbe pe tɔ, mbe pe lawee shɔ mbe ta, imi lɔɔ nyini mbe lawee shɔ mbe ta kre. 41 Hali we sɛ yili tra ŋga Nyiɛkpɔɔ na nyu yo mna Israel leele ŋga ki yi kre na, mbe leele kagbenyi tataara gbo, la, Edom tra, na Moab tra, la, Ammon tra loplombo pre we shɔ ki nu. 42 Na waa sɛ yire trɛ nyjɛ kro tɔ kre, hali wa Egypt tra kuraa ti. 43 We Egypt tra kre krɔyirɛ nyjɛ yi pe swanyiɛ, na swafiŋge, na yirɛ nyjɛ kee yi shian yire krɛrɛ wru. A we wi mbe Libya, na Ethiopia trɛ shɔ mbe ya. 44 A kee nyjɛ yie yiri yila finhaa, na nyjeeri haa mbe pan kre we u yii fiɛrɛ ni kpɔɔ, mbe ki ti u krɔ kun kpɔɔ, mbe ki ti u wi nyibinyiɛ ni mbe leele tataara gbo. 45 Hali we u lebim yoŋgo nyinyi sin epo kre, na nyua ŋga na Suminyuŋgo kre nyi kre lalaa. La, we ku wa, a ndro wa pe wa mbe ya u na.