2 Nyiɛpɔ kre ble kunɔ wo na, na kre yi ŋga pe Ŋunu Jehoiachin yii mu sɛ Babylon tra nu kre yɛlɛ kunɔ wo. 3 Mi srawɔfun Buzi biblɔ Ezekiel naa wa Kebar lɔɔ kre mbɛɛ na, a o Tafun Nyiɛkpɔɔ na uyɛ wɔ mna ni nyina, a ndaa u jaŋga nya.

4 A ndaa nya na fuflɛ kpɔɔ ka gbuun mu yiri nyjeeri haa wa na paan. A tlo kpɔɔ ka naa nyini plipli, a lawee naa chiɛnri mu ki fɛ mu kun, a lawee ŋga kraa nyini plipli kre, yira ka naa chiɛnri ki lalaa na swafre yi. 5 A ndaa yurɛ le wolo jijirɛ plɛ nya ki lalaa, na mu pe nya mu yo leele lɛ. 6 Pe kro naa yiɛ ni jinyjirɛnyjirɛ, a pe kuɛn naa jinyjirɛnyjirɛ ma na. 7 Pe jeelee na fraka fraka, a pe jewrɛ na pe na nuu pɔ yeŋgrɔɛ yi, mu na chiɛnri na swafre yi. 8 A praa wa na lewo kɛnyi ni pe kuɛn jinyjirɛnyjirɛ yire tapan, pe kokoe jijirɛ yire na kro. A pe kro jijirɛ pre yiɛ naa jinyjirɛnyjirɛ, a pe kuɛn yire naa jinyjirɛnyjirɛ na. 9 Yurɛ jijirɛ pre na yire yire mu krɔ kna mu wa peyɛ na, mu pe kuɛn yire nyaa a yi nyu kan kan yiyɛ na. A na pe shie kokoo ka na wa wa viŋge mbe kna.

10 Imi na yurɛ pre yiɛ yire na nyi pe pan yi kre, praa wa na lewo yiɛ ni pe yiɛ, a jira yiɛ wa pe kalie haa, a nablɛm yiɛ wa pe kamɛŋɛ haa, a nyuu yiɛ wa pe kro haa. 11 Na pe pe kuɛn yire nyaala, yi shiin shiin nyu we kan yi yɛ na, mbe pe shiin shiin tɛɛ mbe peyɛ tɔ tɔ. 12 Lawee ŋga nu yurɛ pre chaa kpan, bawa pie sɛ, pe wa wa viŋge mbe kna. 13 Na mu pe nya pan pe chiɛnri na kanhun muŋgo yi, ndee na mɔɔlɛɛ pe mu. A kanhun na nyini pe lalaa na shie na paan, na nyiɛ ki nyini. 14 Yurɛ pre naa feni nyaanyaa na shie yiɛ na paan kro na nyiɛtwanraa yi.

15 Ŋga ndaa yire na yurɛ jijirɛ pre le kre, ndaa nya na yirɛ yɛ pe na sakri jeelee yi, a yi kan kan tra yurɛ jijirɛ pre jaara. 16 Yirɛ nyjɛ yira pe na sakri jeelee yi kre naa chiɛnri plipli na dnɛ chichiele nyjɛ pe yeeri chrysolite yire yi, a yi kro jijirɛ yire na yiyɛ wru, a yira pe na pe na yi le le yiyɛ nu. 17 Kena na sakri jeelee yire shie, mna yi chaa kpan, yie jaa sɛ, a yia vile mbe kna. 18 Sakri jeelee yire jeŋgle na kpɔɔ kpɔɔ, mu pe fiɛrɛ ni, a nyiɛlɛ na yi jijirɛ yire kro fɛ mu kun. 19 Na ki pan na yurɛ pre shie kre, mbe yirɛ nyjɛ yi pe sakri jeelee yire na shie na pe ni, na nyjeeri pe yiri naa, mbe pe yiri na yi ni.

20 Lawee ŋga nu yurɛ pre chaa kpan, bawa pie sɛ, a ŋga pe chaa kpan, pan sakri jeelee yire pini, ŋgi na hin? Yurɛ pre titi ŋumu kraa wa sakri jeelee yire nu. 21 Kena nyjila ŋga ni yurɛ pre we na shie kpan, ndee na yire pe yire o, ndee na nyjeeri pe yiri o, pan sakri jeelee yire we pe na. Ŋgi na hin? Yurɛ pre ŋumu yiraa wa sakri jeelee yire nu.

22 Ndaa yira ka nya a kraa yurɛ pre ndrɛ tɔ na nyuŋgo ndra pe tɔ, a kraa chiɛnri na nyiɛ subie yi, mna pe fiɛrɛ ni. 23 A pra yire yire yira ŋga kraa pe ndrɛ tɔ kre tapan, mna pe kuɛn shiin shiin yire nyaala mu kan kan peyɛ na, mna shiin shiin tɛɛ mu peyɛ tɔ tɔ. 24 Ŋga yurɛ pre na yiri mbe sɛ kre, ndaa pe kuɛn yire tiŋge loo, a yiraa tini na epo nyumu ki tini kpɔɔ, ndee na ŋunɔwifɛɛnlɛ tataara tiŋge yi, hali yiraa tini na Nyiɛkpɔɔ Jaŋgafun wre mana yi, a na pe yire titɛɛ, mbe pe pe kuɛn yire tre tra.

25 Ŋga ndaa nya na pe yire titɛɛ mna pe kuɛn yire tre tra kre, a ndaa mana ka loo na ki yilii yira ŋga kra pe ndrɛ tɔ kre nyjeeri. 26 Yira ŋga kra pe ndrɛ tɛ kre nyjeeri wa ndaa yira ka nya na ŋujɔɔn ŋga pe dnɛ chichiele nyjɛ pe yeeri sapphire kre tɛɛ mu pe kre nya. A kra pe na ndro uu wa mu tni ki na. 27 Yira ŋga ndaa nya na lewo wi kre, mu yire u sɛlɛ haa na shie nyjeeri kre na pe na tɔɔnrɔ ki chiɛnri kanhun, a mu yire u sɛlɛ na mu pan tapan kre na pe na kanhun yi, a yira ka naa nyini plipli mu u fɛ mu kun. 28 Kre yira kre na pe na glaŋgoli ki yili tloe nu.

Ŋga ndaa ki nya ma kre, ndaa ni jawala pe na o Tafun Nyiɛkpɔɔ yɛnyiŋge ni nyaa, a ndaa to mu yiɛ juule tra, bawa ndaa loo na mana ka paara ni pan.