Daniel Hlɛ
Daniel na U Nɔɔlɔ Kee
(1:1–6:28)
Nyanyjɛbɛɛlɛ Mblɛ Pra Yii Mu Sɛ Ŋunu Nebuchadnezzar Katoo
1
Ŋga Jehoiakim na Judah tra ŋunumu li, ki yɛlɛ taarɛwo na Babylon Ŋunu Nebuchadnezzar na sɛ Jerusalem Judah tra kre ŋunu chia kre tɔ mna ki fɛ mu kun. 2 O Tafun Nyiɛkpɔɔ wre na u ŋga kolo a wra Ŋunu Jehoiakim ta mu yii, mna Suminyuŋgo kre yirɛ nyjɛ yi pe cheche yire yɛ ta mu wru. Wra leele plɛ ta mu yii mna sɛ na pe ni Babylon na. A Suminyuŋgo kre yirɛ cheche nyjɛ wra ta kre, u sɛɛnlɛ nyuŋgo wra sɛ yi tɛɛ.3 Ŋunu Nebuchadnezzar na yo Ashpenaz, ŋmba na wi u loplombo pre yɛklo wre pan na, u nyanyjɛbɛɛlɛ plɛ le mbe wɔ Israel wolo pre nu, mblɛ pe pe lebiile titie pre plɛ. 4 Ŋunu wre na yo na pre leele pre fna mbe pe gbagbambla mbe nyu nyu, mbe pe nyaanyaa, mbe kala chin, a pe fna mbe hlɛ chin imi kie pe mbe pe jaa na sumi ŋunu katoo wa. A pre leele pre fna pe pe nyina Babylonia yolo yire mbe pe ja mbra yi yuu, mbra yi nyunɔi. 5 Ŋunu wre na yo mbo, “E na pe kaan sro ŋga mbe li, na simi ŋga mbe gbɔ kre ka. Na e pe nyina yɛlɛ taarɛ, pie jaa paan pe ŋunu loplombo.” 6 Judae nyanyjɛbɛɛlɛ mblɛ pra wɔ pre plɛ na lɛ Daniel, na Hananiah, na Mishael, na Azariah, a pe kro na yiri Judah sele nu. 7 La ŋunu wre loplombo pre yɛklo wre na pe ŋga Babylonia mɛɛ. Wraa Daniel yeeri Belteshazzar, mnaa Hananiah yeeri Shadrach, mnaa Mishael yeeri Meshach, mnaa Azariah yeeri Abednego.
8 Daniel na u jawala pe na wre rɛ, wa ŋunu sro yire ka li, a wa u simi yire ka gbɔ mbe uyɛ tɔ nɛɛrɛ ni, ki tia wra Ashpenaz tali na u gbeŋmba mbe ya u na. 9 A Nyiɛkpɔɔ na tia wra u fooro le. 10 La, na Ashpenaz ŋunu wre fiɛ, ki tia wra yo Daniel pan mbo, “Ŋunu wre titi u yirɛ nyjɛ ki fna mna kaa mbra gboo nyina, ki tia na mu yi je, maa chɔɔn maa yili mu yɛ na mu ŋmbilɛ pre ni, na ŋunu ki nya ma we ni gbo.”
11 Ki tia Daniel na sɛ blɔ ŋmba Ashpenaz na tɛɛ na wra u le wre na u nɔɔlɔ taarɛ pre pan mna sɛ yo mbo, 12 “E ble kɛ tɛɛ e o pe e le, e na o kaan wrɛ sro, na nyumu chiin mbe o na gboo. 13 Na ki pe nyjila chiɛri, e o wejinyi na mblɛ pe ŋunu sro kre ka lii kre le, yire titi ee kpra yo.”
14 A wra ki nɔɔloo mna ble kɛ tɛɛ mna pe pe mu le yɛŋgɛ. 15 Ŋga ble yire nyu na to kre, na pe wejinyi nyu nyu mu wɛ mblɛ pe ŋunu sro kre ka lii na. 16 Ki tia mu yire kre nyjila kre na shie kre, pe lefun wre na tia praa wrɛ sro yire bribri lii, mna ŋunu wee yire ti.
17 Nyiɛkpɔɔ na nyanyjɛbɛɛlɛ jijirɛ pre ŋga kachindɛ, mna tia pra pe hlɛchinfɛɛnlɛ, a Daniel na ja na ŋunɛ nɔɔ nyina, na kee nyjɛ ndro we nya nyiɛlɛ na kro ni.
18 Ŋga yɛlɛ taarɛ nyjɛ ŋunu wre na tɛɛ kre na da kre, Ashpenaz na nyanyjɛbɛɛlɛ pre kro wru mna sɛ ŋunu wre yiɛ na. 19 Ŋunu wre na paara na pe ni kro, mna nya na Daniel, na Hananiah, na Mishael, na Azariah kee u yiɛ nyi mu wɛ hamblɛ pre na. Ki tia pra pan mu pe ŋunu katoo loplombo pre plɛ. 20 Imi na kala nyi mu sheli kpan, na kee ŋga pie wie kro, nyanyjɛbɛɛlɛ jijirɛ mblɛ na ja na ki nyu woni mu wɛ chlɛfɛɛnlɛ na mblɛ praa kaalɛɛ nyaa na yuu u ŋunumu kre kro nu ma gbee kɛ. 21 Daniel naa wa ŋunu katoo wa mna sɛ su na Cyrus Persia ŋunu wre na pan mu wi mu Babylon tra kre shɔ.