2 Asher jlom we ta mbe yire Dan wo kre nyu na mbra shie yilatohaa.

3 A Naphtali jlom we ta mbe yire Asher wo kre na mbra shie yilatohaa.

4 Manasseh jlom we ta mbe yire Naphtali wo kre na mbra shie yilatohaa.

5 Ephraim jlom we ta mbe yire Manasseh wo kre na mbra shie yilatohaa.

6 Reuben jlom we ta mbe yire Ephraim wo kre na mbra shie ki yilatohaa.

7 Judah jlom we ta mbe yire Reuben wo kre mbra shie yilatohaa.

8 Mu yire Judah wo kre na na shie ki yilatohaa wa kre fna mbe e ki kun mbe wa. Ki valam fna mbe pe kɔnsni kɛ, a ki titnɔmu we yire yila finhaa mu sɛ su yila tohaa, kre na jlom yire trɛ nyjɛ pe ta yire nunu we yila, mbe pe ni Suminyuŋgo kre sin ki lalaa.

9 Kre tra kre lalaa we pe mi e Tafun Nyiɛkpɔɔ wre wo, ki titnɔmu we pe kɔnsni kɛ, mbe ki valam pe kɔnsni jijirɛ. 10 Mi e Tafun Nyiɛkpɔɔ wre we srawɔfɛɛnlɛ pre ŋga ni tra cheche kre ka. Pe wo ŋga pie ta kre titnɔmu we pe kɔnsni kɛ, mbe ki valam pe kɔnsni jijirɛ. A kre tra kre lalaa ki fna mbe pe ni Suminyuŋgo kre sin. 11 Srawɔfɛɛnlɛ mblɛ pe yiri Zadok nanae nu pre chiin pie tra cheche kre ka ta, ŋgi na hin? Nyjila ŋga ni Levi srawɔfɛɛnlɛ pre, na Israel leele pre na laa ni kro mna sɛ na sisam pini kre, pre pra kpra li mna ni sumi, pe nsra sɛ ya pe na a pe kro na sisam pe. 12 Ki tia pre srawɔfɛɛnlɛ pre tra ŋga pie ta kre we pe cheche titi, a kie sni mbra shie Levi leele pre tra ŋga pie ta kre tapan haa.

13 Mbe ni ki yɔɔ haŋa kre wru mbe Levi leele pre ŋga, pe wo kre chɔɔ titnɔmu we pe kɔnsni kɛ, mbe ki valam pe kɔnsni jijirɛ. 14 Pia shia kre tra ŋga ka prɛ, ndee mbe ki chinɛ yaka na, tra kre tra chichie yi, a mi Nyiɛkpɔɔ wo yi.

15 Ni tra kre tapan haa kre titnɔmu we pe kɔnsni kɛ, mbe ki valam pe kɔnsni shiin. Kre lawee kre wa pe cheche, la, kie pe Israel leele pre wo, a kie chaa Jerusalem kakpɔɔ kre we to tra kre nu, pie kalonyi sin wa, mbe yurɛ ka haa ta wa. 16 Kakpɔɔ kre titnɔmu na ki valam we yila. Ki kokoe yire kro we pe yaadi kagbenyi shiin na lafɛɛ kunɔ na fulo, mbe fɛ mbe kun. 17 Pie tra kun mbe wa mbe ki fɛ mbe kun, kie pe yaadi lafaa na fuloe shiin. 18 Tra kre ŋga kie kro kakpɔɔ kre yilatohaa, na ki yila haa kre we pe fali haa mbe Jerusalem leele ta mbra fali, kokoo nunu titnɔmu we pe kɔnsni jijirɛ, mbe ki valam pe kɔnsni shiin, mbe kokoo haŋa kre pe ma na. 19 Ndro ŋmba u yiri Israel jlom na mu tni kakpɔɔ kre na kro we jaa tra kre ka fali. 20 Kena tra ŋga pe kun mu wa kre, ka we pe mi titi wo mbe ka pe kakpɔɔ kre tra. Tra kre kokoe yire kro we yila, kie pe kɔnsni kɛ mbe fɛ mbe kun.

21 Tra ŋga kie kro ki kokoe shiin yire na yire we pe Israel ŋunu wre tra. Tra kre sam we yiɛ tɛɛ yila fin haa mbe tro Jordan Lɔɔ kre na, mbe yire wa mbe kna yila to haa mbe sɛ su Mediterranean epo kre na. Kena u tra kre lalaa titi kie pe ni tra cheche kre, a bawa pie ni Suminyuŋgo kre sin. 22 Kena Levi leele pre tra kre, na Jerusalem kakpɔɔ kre tra yire kro we pe ŋunu tra kre lalaa. A ŋunu tra kre nyjeeri haa we pe Judah tra, mbe ki tapan haa kre pe Benjamin tra.

23-27 A tra cheche kre tapan haa tra kre kro we pe Israel jlom hɛnyi yire tra. Jlom hɛnyi yire kro we tra ta mbe yire tra kre sam ŋga kii wa na shie yilafin haa, mbe sɛ su Mediterranean epo kre na yila to haa wa. Imi jlom yire we tra kre ta mbe taala yi kre. Kie yire nyjeeri haa mbe sɛ su tapan haa wa. Benjamin jlom we ta, mbe Simeon jlom taa, mbe Issachar jlom taa, mbe Zebulun jlom taa, mbe Gad jlom ta mbe taa.

28 Gad tra kre tapan haa sam kre we sɛ su Israel tra kre tapan haa sam kre na. Kie yire chia ŋga pe yeeri Tamar kre na, mbe sɛ su bloe nyjɛ yii wa Meribath-Kadesh na yire tapan haa wa, mbe tro Egypt tra sam na, mbe sɛ to Mediterranean epo kre na. 29 Kena imi na ee tra kre yɔɔlɛ mbe Israel jlom kɛmbɔshiin yire ŋga ni e nyina kre. Mi e Tafun Nyiɛkpɔɔ Jaŋgafun wre ni ki yo.

30-34 Jerusalem kakpɔɔ kre jlonwee nyu we pe kɛmbɔshiin. Jlonwee taara we kokoe jijirɛ yire kro na. Mbe pe Israel jlom kɛmbɔshiin yire mɛɛ tɛɛ yi na kro. Kena Reuben, na Judah, na Levi mɛɛ we taa jlonwee taarɛ nyjɛ yie pe kokoo ŋga kii wa nyjeeri haa yire na. Joseph, na Benjamin, na Dan mɛɛ we taa nyjɛ yii wa yila fin haa wa yire na. Simeon, na Issachar, na Zebulun mɛɛ we taa nyjɛ yii wa na shie tapan haa yire na, mbe Gad, na Asher, na Naphtali mɛɛ taa nyjɛ yii wa na shie yila tohaa yire na. Mboo ŋga pie sin mbe ki fɛ mbe kun kokoe jijirɛ yire na kre, ki nunu titnɔmu we pe yaadi kagbenyi shiin, na lafɛɛ kunɔ na fulo. Pan yi kro we da mbe fɛ mbe kun. 35 Kena kakpɔɔ kre kokoo jijirɛ yire kro we pe yaadi kagbenyi kɛ, na fuloe jijirɛ. Kena mu yire fuŋgaami na shie, kakpɔɔ kre mɛɛ yi, “O Tafun Nyiɛkpɔɔ Wa Mna.”