3 A blɔ wre na yiɛ tɛɛ yila finhaa, mna u kaan ŋga ni wraa lawee kra kre wru, mna lafolo kre kra yaadi lafɛɛ kunɔ na fuloe taarɛ na shie lɔɔ kre tapan haa. A wra yo ni pan na ni nyaari mbe tro nyumu kre nu, a ndaa le ki nu mu tro, a kra ni jele yeŋmbele tɔ. 4 A wra ndru mna ki kra yaadi lafɛɛ kunɔ na fuloe taarɛ mu na shie lɔɔ kre tapan haa, mna yo ni pan na ni le ki nu mbe tro. A nyumu kre na da ni kosoo na. A wra ndru mna ki kra ma na, a nyumu kre na ni da sɛlɛ. 5 A wra ndru mna ki kra yaadi lafɛɛ kunɔ na fuloe taarɛ ma na, na shie tapan haa, a kra pe lɔɔ badaaŋga, ŋga ndro wa jaa le ki nu mbe kun, fɔna mu blu. 6 A blɔ wre na yo ni pan mbo, “Ezekiel, lewo pɔ, kee nyjɛ mu nyaa yire le chichie.” A wra ndru mna sɛ na ni ni lɔɔ kre mbɛɛ na. 7 Ŋga ndaa da wa kre, ndaa tinyi tataara nya lɔɔ kre kokoe shiin yire na. 8 A wra yo ni pan mbo, “Kre nyumu ŋga fuu na shie yila fin haa tra kre nu, na tro Jordan lɔɔ kre landɛɛ nu na lee epo weŋge wo titi kre nu, mbe ki kaara nyumu taan. 9 Lawee ŋga nu kre lɔɔ ŋga fuu na shie kre, yurɛ, na mbroe we pe wa titi, ŋgi na hin? Kie sɛ na nyumu chiriri ni mbe sɛ le epo kre nu, mbe ki ti yira ŋga kii wa ki nu kro ŋmaa ta. 10 Mbroe wɔfɛɛnlɛ we yire epo kre nyu na, mbe yire En-Gedi na mbe sɛ su En-Eglaim na, mbe pe asau wa, na pe kɔ mbe pe lawee ta mbe pe asau chali. Mbroe we nɛɛ epo weŋge wo kre nu, mbe pe na Mediterranean epo kre yi. 11 La, epo kre mbɛɛ mafɛɛn yire we pe weŋge, mbe leele na weŋge taa wa mbra lii. 12 Tinyi li wee nyini nyini we fin lɔɔ kre mbɛɛlɛ shiin yire kro nu. A yi wrɛ wa na yuai mbra knumu mbra woni, a nyjila kro nu yie na sɛni. Sɛnyi we na pini yi na nyiɛpɔ kro nu, ŋgi na hin? Nyumu yilii Suminyuŋgo kre jaara na fuu na shie yi pan. Mbe pe yi sɛnyi ta mbra kuun mbra lii, mbe yi wrɛ tɛɛ mbra peyɛ trai.”

13 Kee ŋga o Tafun Nyiɛkpɔɔ Jaŋgafun wre yuu yi kre, “Tra kre sam nyjɛ na ee tro mbe tra kre yɔɔlɛ mbe Israel jlom kɛmbɔshiin yire ŋga mbe pe ta krɔyirɛ yi kre, na e ki yɔɔlɛ Joseph jlom kre we ta shiin. 14 Ki fna mbe e tra kre yɔɔlɛ mbe eyɛ ŋga, mbe e yi ta mbe yila, ŋgi na hin? Mi ndaa da mu niyɛ ŋga, mna tra kre wru mu e tolɛɛlɛ pre ŋga, na brikana tra kre we pe e krɔyira.

15 Tra kre sam mbe e nyina kre. Ki nyjeeri haa sam kre we yire Mediterranean epo kre na, mbra shie, mbe sɛ yili Hethlon na, mbe tro Lebo-Hamath na mbe sɛ to Zedad na, 16 mbe yire wa mbe sɛ to chiɛ nyjɛ pe yeeri Berothah na Sibraim yire na, yire chiɛ nyjɛ naa wa Damascus, na Hamath sam na, kre sam kre nyu we sɛ kɔ Hazer-Hatticon na, kre chia kre naa wa Hauran sam na. 17 Kena nyjeeri haa sam kre we yire Mediterranean epo kre yilafin haa mbe to Hazar-Enan na, kre chia kre naa wa Damascus na Hamath sam na. 18 E yila fin haa sam kre we yire Hauran na Damascus sam kre na. Mbe yire wa mbe yiɛ tɛɛ tapan haa mbe tro Jordan lɔɔ kre mbɛɛ na, kre lɔɔ ŋga na yi Gilead tra kre na Israel tra sam. Kena e sam kre we tro wa mbe sɛ su epo weŋge wo titi kre na, mbra mbrai chia ŋga pe yeeri Tamar kre na. 19 E tapan haa sam kre we yire Tamar na, mbe yiɛ tɛɛ tapan haa mbra shie yila to haa, mbe sɛ to Meribath-Kadesh bloe yire nu. Kie yire wa mbe tro Egypt tra sam na, mbe sɛ su Mediterranean epo kre nu. 20 E yilatohaa sam kre we yiɛ tɛɛ nyjeeri haa, mbe tro Mediterranean epo kre mbɛɛ na, mbe sɛ to Lebo-Hamath na.

21 Kena tra ŋga ki fna mbe e yɔɔlɛ mbe Israel jlom yire ŋga yi kre. 22 E ki yɔɔlɛ e Israel leele pre, na fumblɔ mblɛ pe yiri waŋgra ka nu mu pan mu tni mu biile se Israel tra nu kre, mbe pe ki ta krɔyira. Ki fna mbe e pe pe na Israel kabiile lɛ, mbe pe ŋga tra. 23 Jlom ŋga nu fuŋu nyi mu tni kpan, kre jlom kre nu ki fna u tra ta krɔyira. Mi e Tafun Nyiɛkpɔɔ ni ki yo.”