Ŋunu Wre Na U Ble Kpɔɛ Lie
46
Kee ŋga o Tafun Nyiɛkpɔɔ Jaŋgafun wre yuu yi kre, “Lawee vankam lam wo kre jlonwee ŋga ki yiɛ tɛɛ yila finhaa kre krɔ kre fna mbe pe ki tɔ tnumu tun ble kɔɔnanu yire nu, la, Wuuble kre, na nyiɛpɔ fɔŋgɔ ble lie yire nu, ki fna mbe pe ki nyaa. 2 Ŋunu wre we yire lawee vankam kre nu mbe le jlonwee nyuŋgo kre nu, mbe sɛ yire mbe mbra ki krɔ jeelee yire na, mbra srawɔfɛɛnlɛ pre le mbe praa u sra yurɛ pre sroi popomblo, a we yire wa mbra le mbe pe u wejinyiŋge sra kre wɔ. Kre lawee kre nu we yire mbe sumi mbe ndru mbe yili, la, pia krɔ kre tɔ, fɔna yila kɔŋgɔ. 3 Wuuble kre, na nyiɛpɔ fɔŋgɔ ble kpan, ki fna mbe leele mblɛ pee wa tra kre nu kro sɛ fni o Tafun Nyiɛkpɔɔ Jaŋgafun wre yiɛ, mbe u sumi kre jlonwee kre nyu na. 4 Yurɛ sroo sra mblɛ ni ki fna mbe ŋunu wre pan mbe o Tafun Nyiɛkpɔɔ wre ŋga Wuuble nu yi kre, mbaala biile kɔɔnanu, na mbaplɔ nunu, pe n fna mbe fumnɔ. 5 Ki fna mbe u shɔlɔ nyjɛ snamu yi da kradnɛ fulo ya mbaplɔ wre na. La, mbaala biile pre rɛ, we jaa shɔlɔ nyjɛ u chaa kpan ya pre na, mbe olive simi kɔtua na yɔɔ ya yurɛ pre na shɔlɔ nyjɛ we kra yire na nununu. 6 Nyiɛpɔ fɔŋgɔ yili ble kre, ki fna mbe u nablɛm pɔlɔ, na mbaplɔ nunu, na mbaala biile kɔɔnanu mblɛ pe n na fumnɔ tɛɛ mbe sra wɔ. 7 Nablɛm wre, na mbaplɔ wre, ki fna mbe u shɔlɔ nyjɛ snam yi da kradnɛ fulo ya pe na, la, mbaala biile pre rɛ, we jaa shɔlɔ nyjɛ u chaa kpan ya pre na. Ki fna mbe u olive simi kɔtua jijirɛ ya shɔlɔ nyjɛ u kra yire na nununu. 8 Jlonwee ŋga nu ŋunu wre we tro mbe le jlonwee nyu nyuŋgo kre nu kre, kre nu chɔɔ ki fna u ndru mbe yili. 9 Na tra kre leele pan o Tafun Nyiɛkpɔɔ yiɛ pe ble kpɔɛ yire nu, ŋmba we yire nyjeeri haa jlonwee kre nu mbe le mbe sɛ sumi kpan, ki fna u sɛ yili jlonwee tapan haa wo kre nu. Wa waashia ndru mbe yili jlonwee ŋga nu u tro mu le kre nu, ki fna u sɛ yili jlonwee ŋga ki yiɛ kan ŋga nu u yire mu le kre nu. 10 Nyjila ŋga nu leele pre we na lee Suminyuŋgo wa kre, kre nyjila kre chɔɔ nu ŋunu wre we na lee na, a na pe yilii, mbe wra yilii na.11 Na pe yo pie yire ble kpɔɛ yire ka li kre, yua nyjɛ snamu yi da kradnɛ fulo ki fna pe ya nablɛm wre na, mbe ndru mbe yɛ kra ma na mbe ya mbaplɔ wre na mbe tɛɛ mbe sra wɔ. La, mbaala biile pre rɛ, shɔlɔ imi pe chaa pie ya pre na, mbe olive simi kɔtua jijirɛ ya ya shɔlɔ nyjɛ pe kra kradnɛ fulo fulo yire na kro. 12 Na ŋunu wre chaa mbe pan na wre titi chaara sra yurɛ ni mbe u Tafun Nyiɛkpɔɔ wre ŋga kre, na yurɛ sroo sra yi o, na wejinyiŋge sra yi o, ki fna mbe pe jlonwee ŋga ki shie yilafin haa kre nyaa mbe u ŋga. Ki fna mbe pe yurɔ sroo sra kre, na wejinyiŋge sra kre wɔ imi na pe Wuuble sra kre woni kre, na pe kɔ mbe u yili u kro, mbe pe krɔ kre tɔ.
Ble Nyini Sra Wɔɔ
13 Blenyini bnimi, ki fna mbe e mbɔɔ ŋmba u da yɛlɛ nunu, a u n na fumnɔ, tɛɛ mbe yurɛ sroo sra wɔ mbe mi e Tafun Nyiɛkpɔɔ wre ŋga. 14 Mbe e paanu mimi chichie ŋga snamu ki da kradnɛ taarɛ cha, mbe olive simi kɔtua nunu chaa ki nu, mbe ki tɛɛ mbe sro sra wɔ mbe ni ŋga. Kre mbra ŋga n fna mbe pe ki chinɛ fio. 15 Mbaala, na mimi, na olive simi yire fna mbe e na sra woni na yi ni mbra ni kaan blenyini bnimi.”
16 Kee ŋga mi e Tafun Nyiɛkpɔɔ Jaŋgafun wre yuu yi kre, “Na ki pan na Israel ŋunu wre u tra ŋga u ta kre ka kun mu u biile ŋga kre, kena kie pe u biile pre na pe nanae krɔyira. 17 La, na ki pan na ŋunu wre tra kre ka kun mu u sumifun wa ŋga, tra kre we kro sumifun wre pan mbe sɛ su yɛlɛ ŋga na pe yirɛ ndroi na pefɛɛnlɛ kaan kre na. Kena u ki ndoo mbe ŋunu wre ŋga. Ŋunu biile pre chiin trɛ yie jaa kro pe pan. 18 Ŋunu wre waa shia ndro wa tra ŋga u ta krɔyira shɔ u pan. Ŋunu wre titi tra ŋga u ta kre ka we jaa kun mbe u biile ŋga. Imi kie pe mbe wa leele pre wa tra shɔ u pan mbe wraa kala nyaa.”
19 A blɔ ŋmba wraa ni nyina Suminyuŋgo kre na ni wru mna sɛ lawee vankam fimi wo kre lam, a o na nyaari mu sɛ tapan haa, mna sɛ yire srawɔfɛɛnlɛ pre nyinyi yire krɔɛ na. A wra yire wa mna ni nyina nyinyi yɛ, lawee vankam kre nyukɔɔrɔ na, na shie ki yila tohaa. 20 A wra kna mu yo ni pan mbo, “Lawee ŋga nu srawɔfɛɛnlɛ pre we na pimi lie sra yurɛ pre, na sisam sra yurɛ pre soori, mbra shɔlɔ sra yire fɔ wa, imi kie pe mbe pia pan na yi ni lawee vankam kre nu, mbe leele pre kɔɔ da yi na mbe kala cha mbe peyɛ ŋga.”
21 A wra ndru mna sɛ na ni ni lawee vankam fimi wo kre nu, mna sɛ tro na ni ni ki jenu jijirɛ yire kro na. 22 Yi jenu jijirɛ yire kro na kre, ndaa lawee vankam yɛ nya wa, yi nsra kpɔɔ kpɔɔ, yi titnɔmu naa fiiti fuloe taarɛ na kɔɔnatarɛ, a yi valam naa fiiti fuloe shiin na kɔɔnatarɛ. 23 Ndaa nya na pe bubunyi sin yi lam na dnɛ ni mu fɛ mu kun, a pra kanhun gbɛɛri lawee pe mu mbra bubunyi yire na. 24 A blɔ wre na kna mu yo ni pan mbo, “Yire kagbaalɛɛ nyjɛ nu leele mblɛ pe tnumu tuni Suminyuŋgo wa pre we na sra nyjɛ ni leele pre we na paan yire soori.”