Tra Kre Yɔɔlɛɛ
45
Na ki pan na tra kre we yɔɔlɛ mbe Israel jlom yire ŋga mbe pe ta krɔyirɛ kre, ki fna mbe pe ki yɔm nunu wɔ mbe ki pe mi e Tafun Nyiɛkpɔɔ wre wo. Tra kre titnɔmu fna mbe da kɔnsni kɛ, mbe ki valam pe kɔnsni kɔɔnatarɛ. Kre tra kre kro we pe cheche. 2 Kre tra kre fna mbe e ki ka kun mbe ki kokoe jijirɛ yire kro yila, kena ki pe Suminyuŋgo kre tra, mbe ki pe fiiti lafɛɛ kɔɔnatarɛ na fuloe shiin mbe fɛ mbe kun. Kena e lawee kun mbe ki fɛ mbe kun mbe ki pe fiiti fuloe jijirɛ na jijirɛ. 3 Kre tra cheche kre yɔɔ we pe kɔnsni kɛ ki titnɔmu na, mbe ki valam pe kɔnsni jijirɛ, mbe e ki kun mbe wa Suminyuŋgo kre pan, kre lawee kre kie pe tra kre lawee ŋga ki pe cheche titi. 4 Kre lawee kre kie pe cheche tra kre nu, mbe pe srawɔfɛɛnlɛ mblɛ pe tnumu tuni mi e Tafun Nyiɛkpɔɔ wre yiɛ Suminyuŋgo wa kre wo. Kre na pie pe kalonyi sin, mbe ki ka tɛɛ mbe Suminyuŋgo kre sin. 5 Tra kre haŋa ŋga kie kro kre, mbe e ki wru mbe Levi leele mblɛ pie na tnumu tuni Suminyuŋgo wa kre ŋga krɔyira. Bawa pie pe chiɛ pɔ mbe tni.6 Kena e tra ka kun mbe mbra tra cheche kre na. Mbe ki titnɔmu da kɔnsni kɛ, mbe ki valam pe kɔnsni shiin. Kre tra kre nu pie Jerusalem pɔ mbe Israel leele pre ki ta pe kapɔɔ mbe tni wa.
7 Ki fna mbe e tra kre ka kun mbe ki pe waŋgra kre ŋunu tra. Kie yire tra cheche ŋga pe kun kre sam ŋga ki shie Mediterranean epo kre yilatohaa kre na, a ki sam kre we sɛ su waŋgra kre sam ŋga kii wa na shie yila finhaa kre na. Kena tra kre titnɔmu we pe na trɛ nyjɛ pra kun mu Israel jlon yire ŋga kre yi. 8 Kena kre tra kre we pe Israel ŋunu wre tra, imi kie pe mbe wa na leele pre fiŋge tra kee na, kena Israel jlom yire tra kre haŋa kre wru mbe tni.
9 Kee ŋga o Tafun Nyiɛkpɔɔ Jaŋgafun wre yuu yi kre, Yire Israel ŋulo, e sisam pe mu mu, kena e e pɔɔrɔ kee nyjɛ e pini na leele pre fiŋge kre ti ma, e na kpra lii, e na kee ŋga ki fraka pini. Yaashia ni leele pre ni mbe yili pe tra kre nu na. Mi e Tafun Nyiɛkpɔɔ Jaŋgafun wre ni ki yo. 10-12 A na e yirɛ kra mbe lɔ, e na kpra lii, yaa shia ndro dnumu. Na bɔtɔ yirɛ e loni o, na alooka yirɛ yi o, na gbolo yira yi o, e le na ee kpra li yi kra haa. 13-15 Kolo ŋga na ee na troi mbra e sra yirɛ woni yi kre, na shɔlɔ mu ta, mu yi yɔ fuloe taarɛ mbe pan na yi yɔm nunu ni, a na olive simi yi, mbe e ki yɔ lafaa, mbe pan na yɔm nunu ni, na mbaala e ta, mbe e pe chichiele pre tɔɔnri lafɛɛ shiin, mbe nunu wɔ. Ki fna e na shɔlɔ sra woni, mbra yurɛ popomblo sroi mbra sra woni, mbra wejinyiŋge sra woni, kena e sisam tinkɛɛ ta. Mi e Tafun Nyiɛkpɔɔ Jaŋgafun wre ni ki yo. 16 Ndro ŋmba uu wa tra kre nu kro fna mbe kre sra ŋga ka wɔ mbe Israel ŋunu wre ŋga. 17 Ŋunu wre tnumu yi na we na yurɛ sroo sra, na shɔlɔ sra, na simi woo sra yire woni e ble kpɔɛ lie yire nu, mbra nyiɛpɔ fɔŋgɔ sra kre woni, mbra Wuuble kre lii. Ki fna e na yire kee nyjɛ krɛrɛ pini Israel tra kre nu mbe leele pre sisam tinkɛɛ ta.
18 Kee ŋga mi e Tafun Nyiɛkpɔɔ Jaŋgafun wre yuu yi kre, Nyiɛpɔ jle kre ble ŋga ki yiɛklu na, ki fna mbe e nablɛm pɔlɔ ŋmba u n na fumnɔ tɛɛ mbe nɛɛrɛ laa ni Suminyuŋgo kre na. 19 Kena srawɔfun yurɔ ŋmba ni pe sisam sra wɔ wre nyimi yire yɛ tɛɛ mbe Suminyuŋgo kre krɔɛ jeelee mana, mbe yɛ tɛɛ mbe sragbunu kre jenu jijirɛ nyjɛ yi yiri chom chom yire mana, mbe yɛ tɛɛ mbe lawee vankam lam wo kre krɔɛ jeelee yire mana na. 20 Nyiɛpɔ kre ble kɔɔnashin wo na kre, mbe e sra kre wɔ ma na mbe ndro ŋmba u punu, ndee ŋmba u n chin mu sisaa ka pe kro ŋga. Kre kolo ŋga na ee tro mbe ni Suminyuŋgo kre na piin cheche. 21 A nyiɛpɔ kre ble kɛmbɔjijirɛ wo na, mbe e klɛntro ble yire li. Yire ble yire we sɛ su ble kɔɔnashin nyu na, a yire ble yire nu kre, wa wa paanu ŋga nu pe yiisi le ka. 22 Kre ble kre, ŋunu wre fna mbe nablɛm tɛɛ mbe sisam tinkɛɛ sra wɔ mbe wre titi, na leele mblɛ pee wa tra kre nu kro. 23 Na pe ble kpɔɛ yire lii, yi ble kɔɔnashin yire kro nu, ki fna pe nablɛm kɔɔnashin, na mbapilɛ kɔɔnashin mblɛ pe n na fumnɔ tɛɛ mbe yurɛ sroo sra wɔ mbe e Tafun Nyiɛkpɔɔ wre ŋga, mbe kaplɔ tɛɛ mbe sisam sra wɔ. 24 Mbe shɔlɔ nyjɛ snam yi da kradnɛ fulo, na olive simi kɔtua na yɔɔ ya nablɛm, na mbapilɛ pre na nununu.
25 Ble kɔɔnashin praa ble kpɔɛ yire lii, a yiraa nɔɔhlei nyiɛpɔ kɔɔnashin kre ble kɛmbɔkunɔ wo na, yire ble kɔɔnashin yire kro nu ki fna mbe ŋunu wre sisam sra, na yurɛ sroo sra, na shɔlɔ sra yire wɔ, mbe olive simi ya yi na.’”