4 A blɔ wre na sɛ na ni ni nyjeeri haa jlonwee ŋga kraa wa Suminyuŋgo kre yiɛ kre na. A ndaa nya na o Tafun Nyiɛkpɔɔ yɛnyiŋge kre Suminyuŋgo kre nyi, a ndaa to mna yiɛ juule tra.

5 A o Tafun Nyiɛkpɔɔ wre na yo ni pan mbo, “Ezekiel, lewo pɔ, ndie tɛɛ mu loo chichie, ni paan mbe mbra nyjɛ yii wa ni Suminyuŋgo kre na yo mu pan, kena ndie tɛɛ mu loo chiriri, mbe ni mu nyina leele mblɛ pe fna, na mblɛ pe n fna mbe le Suminyuŋgo kre nu mbe ndruu yili. 6 Yo Israel leele mblɛ pe yiri mu ni taan kre pan na, ‘Kee ŋga mi e Tafun Nyiɛkpɔɔ wre yuu yi kre, Israel leele e afunyi kee nyjɛ e pini yire ni yɔɔ. 7 E afunyi kee nyjɛ pini yire kɔkro ni, e paan na waŋgra nyjɛ leele pe n mi Nyiɛkpɔɔ wre chin, a pe n pe fɛnyi knumu ni ni Suminyuŋgo wa. A na e pan na sro, na nyina, na nyimi ni mbe ni ŋga ni Suminyuŋgo wa kre, e ki toni nɛɛrɛ ni, na ni nyu nunu kre klai. 8 Ŋga yire titi we ni tnumu kre le mbe ki tun, mbe ni yirɛ cheche yire le chichie kre, a e fumblɔ wɔ mu wa ni tnumu kre na Suminyuŋgo wa. 9 Kena kee ŋga e Tafun Nyiɛkpɔɔ Jaŋgafun wre yuu yi kre, Waŋgra ŋga leele pe n mi Nyiɛkpɔɔ chin, a pe n pe fɛnyi knumu kre, wa n fna mbe le ni Suminyuŋgo wa, hali na u fun wre yiri waŋgra ka nu mu pan mu tni mu chaa yire Israel leele nu.

10 Levi leele mblɛ pra laa ni kro mna sɛ ya Israel leele pre na na sɛɛnlɛ sumi kre, mbe pe ndie tini. 11 Pie jaa tnumu tuni Suminyuŋgo wa, mbra tnumu tuni jlonwee yire nu, pie jaa yurɛ sroo sra yurɛ pre gbo, mbe jaa na leele pre sra yurɛ pre kuu pe pan, mbra yaa pe na. 12 La, ŋga pra leele pre yiɛklu, a pra sɛ pe sɛɛnlɛ yire sumi, mna tia Israel leele pre na le sisam nu kre ndra na, ni da na pie sisam ŋga pe pe kre fɔtɔɔrɔ ta. Mi pe Tafun Nyiɛkpɔɔ wre ni ki yo. 13 Pe n fna mbe da ni na mbe ni sumi na srawɔfɛɛnlɛ lɛ na, ndee mbe da yirɛ cheche yire na, ndee mbe da ni sra cheche kre na. Ki fna mbe pe ti pe afunyi kee nyjɛ praa pini yire pe gbo nyifɛɛrɛ. 14 La, mbe ti mbe praa tnumu bɛɛlɛbɛɛlɛ tuni Suminyuŋgo wa.

15 La, Levi srawɔfɛɛnlɛ mblɛ lɛ Zadok nanae, a praa kpra lii mnaa tunumu tuni ni Suminyuŋgo wa, nyjila ŋga ni Israel leele na laa ni kro kre, pre we jaa pan mbe tnumu tun ni yiɛ. Pre pe fna mbe yire ni yiɛ, mbra sra woni na yurɛ nyina, na pe nyimi yire ni mbe ni ŋga. Mi e Tafun Nyiɛkpɔɔ wre ni ki yo. 16 Pre chiin pie jaa le ni Suminyuŋgo wa, mbe da ni tebru kre na, mbe yire ni yiɛ mbe pe tnumu tun.

17 Na pe le lawee vankam kre jlonwee kre nu, ki fna mbe pe sɔfum dodonyi finyi nyjɛ pe tin kɔdɔli ni yire le, la na pe tnumu tuni jlonwee kre nu wa, ndee na Suminyuŋgo kre lam pe nyi na tnumu tuni kre, pia shia yurɔ yooro dodoŋgi le. 18 Pe fna mbe pe namu fiŋge pɔ ndra na, mbe kpla fiŋge chan lam. Pia na yirɛ nyjɛ pie le mbe ki ti mbe kafue na pe fuu leni. 19 A na ki pan na pie yili mbe sɛ lawee ŋga nu leele pre nyi kre nu, ki fna mbe pe sɔfum yirɛ yire wɔ pe yɛ na, mbe yi tɛɛ nyinyi cheche yire nu, mbe pre titi dodonyi wru mbe le. Imi kie pe mbe ndro wa kɔɔ da pe sɔfum dodonyi yire na, mbe kala cha mbe uyɛ ŋga.

20 Ki n fna mbe pe pe ndrɛ klu, ndee mbe ti mbe pe nyjure tɔ mbe tnu, ki fna mbe praa pe ndrɛ knumu. 21 Srawɔfun wa waa shia simi gbɔ mbe le lawee vankam lam wo kre nu. 22 Pia shia lekuchlɔ, ndee mbe chlɔ ŋmba na u plɔ pe je leŋge, Israel lechlɔ ŋmba u n blɔ chin, ndee lekuchlɔ ŋmba plɔ wra pe srawɔfun pe fna mbra leŋgei. 23 Pe fna mbe ni leele pre nyina mbe pe yira ŋga ki pe cheche, na ŋga ki n pe cheche lalaa chin. Mbe jaa yira ŋga ki pe nɛɛrɛ, na ŋga ki n pe nɛɛrɛ chin.

24 Na leele kala ta kpan, srawɔfɛɛnlɛ pre pe fna mbe yire ni mbra yire na mbe kala kre kpra kun. Pe fna mbra lii ni mbra yire, na ni nyu kee yire na, mbra ble kpɔɛ nyjɛ ni le pe pan yire lii, mbe ni Wuuble kre pe cheche.

25 Srawɔfun n fna mbe da gboo na mbe uyɛ tɔ nɛɛrɛ ni, la, na ki pan na u lo, ndee u lɛ, ndee u pɔ, ndee u chunu, ndee u nyjɔ, ndee u jaa ŋmba u n leŋge wi, na pre leele mblɛ wa wi rɛ, we jaa da pe wa gboo na mbe uyɛ tɔ nɛɛrɛ ni. 26 Na waa nɛɛrɛ laa uyɛ na, ki fna mbe u shie ble kɔɔnashin. 27 Kena ble ŋga na we le lawee vankam lam wo kre nu, mbe sɛ sɔfum tnumu tun Suminyuŋgo wa kre, ki fna mbe u sisam sra wɔ mbe uyɛ ŋga. Mi e Tafun Nyiɛkpɔɔ Jaŋgafun wre ni ki yo.

28 Mi chiin ni fna mbe srawɔfɛɛnlɛ pre ta krɔyira. Kena ki n fna mbe e pe ŋga krɔyira ka Israel tra nu na, mi Nyiɛkpɔɔ mbe pe pe krɔyira. 29 Pre pie na shɔlɔ sra, na sisam, na pimi sra yirɛ yire kaa. Yirɛ nyjɛ yire Israel leele we na mi Nyiɛkpɔɔ kaan lɛɛ nunu ni yire kro pe wee yi. 30 E see yirɛ jlewee chichiele nyjɛ e klu na woni yire, na shɔlɔ nyjɛ ee klu mbe tre yire kro pe wee yi, imi kie pe mbe dwamu tni e katoe nu. 31 Na srawɔfɛɛnlɛ pre hanyini, ndee yurɔ nya na u ku, ndee na yurɔ sisaa u u gbo mu wa kre, pia shia u ka.