Nyiɛkpɔɔ Yɛnyiŋge Na Ndru Mu Pan Suminyuŋgo Wa
43
A blɔ wre na sɛ na ni ni jlonwee ŋga kra yiɛ tɛɛ yilafin haa kre na. 2 A ndaa Israel Nyiɛkpɔɔ wre yiɛnyiŋge nya na ki yiri yila fin haa na paan. A ndaa Nyiɛkpɔɔ mana loo na ki tini na epo nyumu yi, a u yɛnyiŋge kre naa chiɛnri mu tra kre tɔ poŋgo. 3 Yirɛ nyjɛ ndaa nya nyiɛlɛ na kre na pe na nyjɛ ndaa nya nyiɛlɛ na nyjila ŋga ni Nyiɛkpɔɔ naa paan mbe Jerusalem kla kre yi, a yira ndru mu pe na nyjɛ ndaa nya Kebar lɔɔ kre mbɛɛ na mna to mna yiɛ juule tra kre yi. 4 O Tafun Nyiɛkpɔɔ wre yɛnyiŋge kre na tro jlonwee kre nu mna pan mu le Suminyuŋgo wa. 5 A Nyiɛkpɔɔ Ŋumu wre na ni wru nyjeeri mna sɛ na ni ni lawee vankam ŋga kii wa lam kre nu, a ndaa nya na o Tafun Nyiɛkpɔɔ wre yɛnyiŋge kre Suminyuŋgo kre nyi.6 Ŋga blɔ wre naa wa mu yire ni jaara kre, ndaa loo na Nyiɛkpɔɔ paara na ni ni Suminyuŋgo wa. 7 Mbo, “Ezekiel, lewo pɔ, ni ŋujɔɔn kre tni haa yi kre. Mna mbe tni ni leele Israel wolo pre nu nyjila kro nu. A ni leele pre, na pe ŋulo pre wa sɛɛnlɛ sumiɛ, na gboolo lee tɛɛ mbe ni mɛɛ cheche kre tɔ nɛɛrɛ ni na. 8 Israel ŋulo pre na pe ŋunu katoo sin mu mbra ni suminyuŋgo cheche kre na, mboo chiin kraa wa mi na pre lalaa. A pra pe afunyi kee nyjɛ praa pini yire tɛɛ mna ni mɛɛ cheche kre tɔ nɛɛrɛ ni, a kra tia ndaa krɔ tɛɛ mna pe kla. 9 Kena ti mbe pe laa pe tiɛrɛɛ kre kro, mbe laa pe ŋulo pre sɛɛnlɛ wɛɛ nyjɛ nu ŋmaa n wa yire kro, na pe pe ma, mbe paan tni pe nu nyjila kro nu.”
10 O Tafun Nyiɛkpɔɔ wre na yo ni pan mbo, “Ezekiel, lewo pɔ, ni Suminyuŋgo kre kee yo Israel leele pre pan, mbe pe ki kee jawa mbe nyifɛɛrɛ pe gbo na pra sisam pe mu ni taan. 11 Kena na nyifɛɛrɛ waa pe gbo kee nyjɛ pe pe yire krɛrɛ na kre, mbe mu pe nyina imi na ni ni Suminyuŋgo kre pe. Pe nyina yirɛ nyjɛ yii wa ki nu, na mna pie na tro mbra lee, na mna pie na troi mbra yilii. Na imi na ki nyini nyi, na mbra nyjɛ yii wa ki na. Ki kee nyunɔ mu pe ŋga, imi kie pe mbe pe chin imi nyini ki nyi, mbe jaa li ki mbra yire kro na.
12 Suminyuŋgo kre mbra yire yi kre. Lawee ŋga nu ni Suminyuŋgo kre nyi ni nyua cheche kre na kre pe cheche, kena ki fna mbe pe chin na ki lawee kre pe cheche titi. Kena mbra ŋga kee ki sheli ni na titi yi.
Sragbunu Kre
13 Imi na ki sragbunu kre kramu nyi yi kre, kaan ŋga ni pra Suminyuŋgo kre kra kre chɔɔ ni pra tɛɛ mu ki kra. Pra wee tuu sragbunu kre tapan mu ki fɛ mu kun, a ki jijuom na pe inchi fulo, a ki valam pe inchi fulo. A pe yira tɛɛ mu sragbunu kre nyu kre yii mu ki fɛ mu kun, a ki gedem na da inchi kɛ. 14-17 Pra sragbunu kre taa yira ka na, a pra ki yɔɔlɛ taarɛ, a ki yɔɔlɛɛ taarɛ yire kokoe yire kro na yila. Ki tapan haa kokoe yire kro mu fɛ mu kun naa fiiti fulo na kɔɔnashin, a ki gedem naa fiiti taarɛ. A ki lalaa wo kre naa fiiti fulo na jijirɛ mu fɛ mu kun, a ki gedem naa fiiti kɔɔnashin. A pra yira tɛɛ mu ki nyu yii fimi na mu fɛ mu kun, yira kre naa inchi kɛ. Ki ndra kre naa fiiti fulo kokoe yire kro na, a ki gedem naa fiiti kɔɔnashin. A bawa praa sra wɔ yurɛ pre sroi. Ki jenu jijirɛ yire na yiri chom chom na nablɛm nyamblɛ yi. A yirɛ nyjɛ na mu taan mbe nduu mbe sɛ ki na kre naa wa na shie yila fin haa wa.”
Pra Sragbunu Kre Pe Cheche
18 A o Tafun Nyiɛkpɔɔ wre na yo ni pan mbo, “Ezekiel, lewo pɔ, kee ŋga mi mu Tafun Nyiɛkpɔɔ wre yuu yi kre, ‘Na pe waa sragbunu kre sin mu kɔ kre, kolo ŋga na pie yire mbe yurɛ sroo sra wɔ, mbe nyimi nyaara ki na yi kre. 19 Ki fna mu srawɔfɛɛnlɛ pre ŋga nablɛm pɔlɔ, mbe pe u tɛɛ mbe sisam sra wɔ, srawɔfɛɛnlɛ mblɛ pe yiri Levi nɔɔ leele nu, a pe pe Zadok nanae pre chiin pee kolo ni na pie paan tnumu tun ni yiɛ Suminyuŋgo wa. Pan mi e Tafun Nyiɛkpɔɔ Jaŋgafun wre yo. 20 Na pe sra kre wɔ, kena pe nyimi kre ka tɛɛ mbe sragbunu kre jenu nyjɛ yi yiri chom chom na nyamblɛ yi yire mana ki jeŋgle jijirɛ yire na, mbe ki nyu nyjeeri haa kre mana mbe fɛ mbe kun, kena kre kolo ŋga na ee tro mbe nɛɛrɛ laa sragbunu kre na mbe ki pe cheche. 21 Kena e nablɛm ŋmba ni e sisam sra wɔ wre wru, mbe sɛ u sro Suminyuŋgo kre krɔ, lawee ŋga ni e nyina kre nu.
22 Ki ble shiin wo na, mbe e kaplɔ ŋmba u n na fumnɔ tɛɛ mbe sisam sra wɔ, mbe yurɔ wre nyimi tɛɛ mbe nɛɛrɛ laa sragbunu kre na, imi na e na nablɛm wre nyimi pe kre. 23 Na e waa nɛɛrɛ laa ki na mu kɔ kre, kena e nablɛm pɔlɔ, na mbaplɔ mblɛ pe n na fumnɔ wɔ e yurɛ pre nu mbe sra wɔ. 24 E sra kre wɔ mi e Tafun Nyiɛkpɔɔ wre yiɛ wa, mbe srawɔfɛɛnlɛ pre weŋge nyaara pe na, mbe pe tɛɛ mbe yurɛ sroo sra wɔ mbe ni ŋga. 25 Ble kɔɔnashin nyjɛ yie taala yire kro nu ki fna mbe e kaplɔ, na nablɛm pɔlɔ, na mbaplɔ wɔ e yurɛ nu, mblɛ pe n na fumnɔ, mbe pe tɛɛ mbe sisam sra wɔ ble yire kro nu. 26 Yire ble kɔɔnashin yire kro nu, ki fna mbe srawɔfɛɛnlɛ pre na nɛɛrɛ laari sragbunu kre na, mbe ki pe cheche, mbe pe jaa na sra woni ki na. 27 Na yire ble yire nyu wa to, mu yire ki ble kɔɔnatarɛ wo kre na na shie, kre srawɔfɛɛnlɛ pre we jaa na yurɛ sroi sra, na wejinyiŋge sra woni mbra leele pre kaan. Na ki pan ma kre ni yiɛ we shɔ e na.’ Mi e Tafun Nyiɛkpɔɔ Jaŋgafun wre ni ki yo.”