Lamentation Hlɛ
Jerusalem Fooro Lie
1
Kakpɔɔ ŋga kra nyi leele fa kre,fuŋga kre ki sni waara kre.
Kakpɔɔ ŋga kraa mɛɛ kpɔɔ ni
waŋgrɛ nu kre,
na mu ki nya aŋga,
mu yo chlɔ ŋmba plɔ u ku
mu u ti wi.
Pan Jerusalem na nyi
na ŋuchlɔ wi tra ŋga nu,
fuŋga rɛ, ki le tnibim nu.
2 Na ble wɔ,
ki leele wa nyɛnɛɛ ti,
mbe yotunyi na pe fuu.
A mblɛ na chia kre koroo nyi kre,
ndro n wa mbe pe bre.
Mblɛ pra chia kre yii nɔɔlɔ kre,
pe kro ki wɔ mu ŋga,
mu ki kaari pe loŋgo.
3 Judah leele pre sɛ kaari tinlɛ,
mu na kala nyaa
waŋgra fɔŋgɔ nu,
pe sɛ tni waŋgrɛ nu,
hali pe n lawee ta mbe wuu.
Pe loŋgoolo mblɛ pe pe yii pre,
Pe pe ta na pe fiŋge
ndra shelee ni.
4 Kolo ŋga pe yiri
na shie Zion nyua kre na,
Jerusalem na kre,
ndro na ja mu ki yii
pe ble kpɔɛ nyjila kre nu na.
A ndro n wa
na pe jlonwee krɔɛ yire le na.
A pe srawɔfɛɛnlɛ na jiin,
a pe bichabɛɛlɛ na kala nyaa,
na fooro lii kpɔɔ.
5 Jerusalem loŋgoolo
sɛ kaari pe tafɛɛnlɛ,
mu na kee ŋga pe chaa
pini pe na.
O Tafun Nyiɛkpɔɔ wre u tia
pra fooro kpɔɔ lii,
pe sisam ndra na.
Jerusalem loŋgoolo pe yii,
mu sɛ waŋgra fɔŋgɔ nu.
6 Ki yɛnyiŋge laa ki na,
pan ki loplombo nyi na kafaala,
mblɛ pe nyaa cha mu la kahaa,
a pe faŋga kɔ pe nu,
a praa chaa mbe fɛ
mbe shɔ bɔfɔ kɛɛ lɛ.
7 Ŋga pe pe gbun mu nyina,
a pe sɛ na kala nyaa kre,
bawa pe chin mu yɛnyiŋge,
ŋga pra ta na lii fa kre sɔɔnri.
Ŋga ki leele na to
pe loŋgoolo kɛɛ kre,
ndro nsraa wa mbe ya pe na.
Pe loŋgoolo pre na kna
mu kakpɔɔ kre le,
ŋga pra nya imi na kra kla
mu da kre,
a pra laa mu to na pe tɛɛ.
8 Jerusalem leele sisam pe kpɔɔ,
a ki tia pe kaari nɛɛrɛ leele.
Mblɛ praa pe kaan buuro fa kre,
pe le fiɛn fuŋga.
Ŋgi na hin? Pe fɛɛrɛ sni fimi na,
a ki tia pe krɔ kna
na shie na jiin lɛɛ.
9 Jerusalem sisam
pe mana na nɛɛrɛ yi,
a pe kee ka ma na pe baŋga ni.
Jerusalem too kre kpɔɔ,
a ndro n wa mbe pe bre.
Ki leele nyɛni
na Nyiɛkpɔɔ yeeri mbo,
O Tafun Nyiɛkpɔɔ, o kanyana le,
ŋgi na hin? O loŋgo wre o ja,
mu na uyɛ lii o na.
10 Loŋgo wre oyɛ taara yirɛ
kro koli mu sɛ.
O waŋgrɛ nyjɛ leele
pe sɛɛnlɛ sumi kre nya,
a pe pan mu le Suminyuŋgo wa.
Leele mblɛ mu jaari na
pia chaa mu leele pre nu pre.
11 Jerusalem leele kro jiin
na sro chaa na tro,
pe pe yirɛ wru mu na sro chinɛ,
mbe li mbe ŋmaa ta.
O Tafun Nyiɛkpɔɔ,
o le mu nyu o na, ŋgi na hin?
Ndro n o le mu nya na.
12 Hali leele mblɛ pe tro
na o nyaa pre,
pe kee ka ma na o ni.
E yiɛ yire e o le,
kena leele plɛɛ wa
na kala nyaa na wre lɛ ŋgaa?
O Tafun Nyiɛkpɔɔ wre
krɔ ki kun na o ni,
mu tia o na yire kanyana
nyjɛ sembremu nyaa.
13 Mu tia kanhun yiri nyjeeri,
mu wo o na na o sroi kajle nu,
mu o pɛɛri mɛnyi pɛlɛ,
mu tia o ndru mu kna
na shie o kro.
U o wa, mu tia o na kala nyaa
nyjila kro nu.
14 U o sisam pɔ mu le o lagboo.
Yi sna mu wɛ o na,
a ki tia o faŋga kro kɔ.
O loŋgoolo mblɛ faŋga
ki wɛ o na pre,
u tia o to pe kɛɛ.
15 Ŋunɔwifɛɛnlɛ mblɛ pee wa
o nu pre,
Nyiɛkpɔɔ krɔ kna mu wa pe na.
Wra kɛ wa mna ŋunɔwifɛɛnlɛ
plɛ nyini yeeri mu wa o na,
mbe pe o yirifumblɔ pre kla.
O Tafun Nyiɛkpɔɔ tia
pe wre Judah leele taanla,
mu mbra tra na tre sɛnyi
pe taanla yi fɛɛrɛ ndoo.
16 Kre kee ŋga ki tia ndaa nyɛni,
a yotunyi na ni fuu,
a ni n ndro ta mbe o ni bre,
ndee mbe ni gbun nyiŋge.
Loŋgoolo pre wi mu o ja,
a ki tia ni leele pre na kala nyaa.
17 Jerusalem leele kɛnyi nyaa
na shɔfun chaa,
la, ndro n wa mbe pe bre.
O Tafun Nyiɛkpɔɔ wre
ki yo mu tɛɛ na,
leele mblɛ pe tni mu mbra
Jacob nanae pre na pre,
pie pe pe loŋgoolo.
Jerusalem kaari nɛɛrɛ yira
pe lalaa aŋga.
18 O Tafun Nyiɛkpɔɔ wre fraka,
nde ndaa je mu yiri
mu u nyu kee taan.
Leele mblɛ ee wa lawee kro nu,
e loo, e kanyana ŋga nu ni nyi le.
Pe ni nyanyjɛbɛɛlɛ,
na ni bichabɛɛlɛ yii,
mu sɛ na pe ni waŋgra fɔŋgɔ nu.
19 Ndaa kɛ wa
mna ni yafɛɛnlɛ yeeri,
la, pra ni wɔ mu ŋga.
Ni Sɔfue, na ni loplombo,
pre kro ku kakpɔɔ kre na,
na pee wa na sro haa chaa,
mbe li mbe ŋmaa ta.
20 O Tafun Nyiɛkpɔɔ,
fooro kpɔɔ ŋga ni lii le,
kanyana kpɔɔ titi nu ni nyi,
a ni nyiɛ na kala nyaa.
Ŋgi na hin?
Ni yiri mu mu taan imi na ki n fna.
Na ni leele yili lete na o,
ndee na pee wa katoo lam o,
kuu pe pe kuu.
21 Leele ni jiɛn kre loo,
la, ndro n wa mbe ni bre.
Ni loŋgoolo kro
ni fooro kee kre loo,
a pe yiɛshɔ kee
ŋga mu ni pe kre na.
Kena pe ndie tini nyaanyaa,
imi na mna mu nyu yo kre.
22 Nyiɛkpɔɔ, ti mbe pe
ndrashelee kee nyjɛ pe pini yire,
mbe yi kro yili mu yiɛ na,
mbe mu pe pe imi na
mu yila ni sisam na,
mu ni pe ŋga.
Ni jiɛn nɛɛ,
a ni dankna kro kɔ.