Kraa wa wa a Zedekiah na yiri mna Babylon ŋunu wre taan. 4 Kena ŋga Zedekiah na jɔɔn li, ki yɛlɛ kɔɔnanyjirɛ wo kre nyiɛpɔ kɛ wo kre ble kɛ na, kre Babylon ŋunu Nebuchadnezzar na u ŋunɔwifɛɛnlɛ kro wru, mna sɛ wi na Jerusalem leele ni. Ŋga pra sɛ kre, pra sɛ tni mna kakpɔɔ kre fɛ mu kun, mna yirɛ fa mu ble ki mboo ŋga pe sin mu ki fɛ mu kun kre nɔɔ na, mbe nduu mbe le. 5 Pra kakpɔɔ kre fɛ mu kun mna sɛ su na Zedekiah li yɛlɛ kɛmbɔnunu jɔɔn kre na.

6 Kre yɛlɛ kɛmbɔnunu kre nyiɛpɔ jijirɛwo kre ble kɔɔnanyjirɛ wo na kre, klo badaaŋga na to leele pre na, na pia yaka ta mbe ka. 7 Babylon leele pre na kakpɔɔ kre mboo kre ja, na Babylon wifɛɛnlɛ pree wa mu ki fɛ mu kun, nde Zedekiah na u ŋunɔwifɛɛnlɛ mblɛ praa wa kakpɔɔ kre na pre, na ja mna yili mna tro jlonwee ŋga kraa wa mboe shiin lalaa, mna mbra ŋunu kagbla kre na kre nu blee, mna fɛ mu yiɛ le Jordan lɔɔ kre landɛɛ nu. 8 La, Babylon wifɛɛnlɛ pre na Ŋunu Zedekiah kɔŋgɔ ni mna sɛ u yii Jericho tra mbrɛrɛ kre nu, na u ŋunɔwifɛɛnlɛ pre kro fɛ mu nyina mu u ti.

9 A pra u yii wa, mna sɛ Ŋunu Nebuchadnezzar ŋga pe kakpɔɔ Riblah ŋga kraa wa Hamath leele tra nu kre na. Bawa wra u kala li mna u gbun pimi ni. 10 Riblah na wa, bawa Babylon ŋunu Nebuchadnezzar wre na Zedekiah bibilɛ gbo u yiɛ na, mna Judah loplombo pre gbo na mu ya. 11 A wra tia pra Zedekiah nyiɛlɛ foli, mna swafre sɛɛrɛ le u na, mna sɛ na u ni Babylon na. Bawa pra sɛ u le nyuŋgo, mna sɛ su na wra ku wa.

12 Ŋga Babylon ŋunu Nebuchadnezzar na jɔɔn li, ki yɛlɛ kɛmbɔkɔɔnanyjirɛ wo kre nyiɛpɔ kunɔ wo kre ble kɛ na, kre Nebuzaradan ŋmba wra pe Babylon ŋunu ŋunɔwifɛɛnlɛ pre lopom wre, na pan Jerusalem na. 13 Ŋga wra le kre, wra sɛ kanhun le o Tafun Nyiɛkpɔɔ Suminyuŋgo kre, na ŋunu katoo kre, na Jerusalem nyinyi yire kro na. Wra kalonyi nyjɛ kee yi shian kakpɔɔ kre na kro sro mu wo. 14 Ŋunɔwifɛɛnlɛ mblɛ praa wa Nebuzaradan jaara pre kro na Jerusalem mboe yire kro juari mu wo. 15 Nebuzaradan na chia kre pɔlɛfɛɛnlɛ pre pra kro wa pre plɛ yii mna ya kɛnyu tnumu tunfɛɛnlɛ, na mblɛ pra fɛ mna sɛ chaa Babylon ŋunɔwifɛɛnlɛ pre nu pre na, mna sɛ na pe ni. 16 La, wra pɔlɛfɛɛnlɛ pre plɛ ti tra kre nu, mna pe ŋga lawee a praa fali na lii.

17 Nebuzaradan na tia u ŋunɔwifɛɛnlɛ pre na sɛ le Suminyuŋgo wa, mna swafre pilaasi yire gbun mu juari, mna trogo kre, na swafre epo yire kro juari mna yi koli mu sɛ Babylon tra nu. 18 Pra chɔɛ, na sofi, na yirɛ nyjɛ ni pe kaniɛ maŋa nyu knumu, na kotie nyjɛ nu pe nyimi leni na nyaara, na nyjɛ nu pe tuwe ndion tɛɛn leni na sroi yire, na swafre yirɛ yire kro koli mna sɛ. 19 Nebuzaradan na taahɛɛ, na kanhun wɔyirɛ, na kotie nyjɛ ni praa nyimi tɔwii, na nyjɛ ni pe tɔɔnrɔ kolii, na yi chɔɛ bɛɛlɛ, na yi kaniɛ kɛɛn, na lagbuju nyjɛ nu praa simi leni na woni, na yirɛ nyjɛ pra swanyiɛ, na swafiŋge tɛɛ mu gbeele yire kro koli mu sɛ.

20 Pra swafre pilaasi, na epo kre, na swafre nablɛm kɛmbɔshiin pre, na trogo ŋga Ŋunu Solomon na gbeele mu tɛɛ o Tafun Nyiɛkpɔɔ Suminyuŋgo wa, a pe nsra ja mu ki kra mna ki snamu chin yire kro koli mu sɛ. 21 Yire pilaasi yire nunu gedem naa fiiti fulo na kɔɔnashin, a nunu na pe fiiti kɛmbɔkɔɔnatarɛ mu fɛ mu kun, a ki gbidiŋge na da na kambɛlɛ ni, a pra yi lam wɔ wee. 22 Pra swafre tɛɛ mna yirɛ pe mu pilaasi yire ndrɛ juule. Ki nunu gedem naa fiiti kɔɔnashin na yɔɔ, pan shiin wo kre na nyi na, a pra swafre tɛɛ mna pomegranate sɛnyi pe, mna yi tin mu wa yi ndra na mu tɛɛ mu yi san. 23 Pomegranate bie nyjɛ pra tin mu wa yi kokoe yire na yire naa fuloejijirɛ na kɛmbɔkɔɔnanu, a yi ndra wee yire naa lafaa.

24 Nebuzaradan na srawɔfun lopom Seraiah, na srawɔfun ŋmba wra taa u na lopom shiinwo Zephaniah, na Suminyuŋgo kre jlonwee nyu shiefɛɛnlɛ taarɛ yii mna sɛ na pe ni. 25 Leele mblɛ pra kro kakpɔɔ kre na kre, wra pe wifɛɛnlɛ lopom yii, mna lebiile paaranyinafɛɛnlɛ kɔɔnashin yii mu ya, mna lopom ŋmba wraa wifɛɛnlɛ nyu ble na shie na pe ni ŋunɔ wre yii, na pe wifɛɛnlɛ pre fuloe taarɛ ni mu ya. 26 Nebuzaradan na pre leele mblɛ kro wru mna sɛ na pe ni Babylon ŋunu wre pan Riblah na. 27 Riblah kakpɔɔ ŋga kraa wa Hamath leele tra nu kre, bawa wra tia pra pre leele mblɛ gbo. Kena pan kra le, a Judah leele na yili pe tra nu mna sɛ tnibim nu.

28 Kena Judah leele mblɛ Nebuchadnezzar na yii mna sɛ na pe ni u tra nu pre naa leele kagbenyi taarɛ na fulo na taarɛ. Kre nyjila kre, na u li jɔɔn na yɛlɛ kɔɔnashin. 29 Ŋga wra li jɔɔn na yɛlɛ kɛmbɔkɔɔnatarɛ kre, a pra Jerusalem leele lafɛɛ kɔɔnatarɛ na fulo na kɛmbɔshiin yii mna sɛ na pe ni Babylon tra nu. 30 A ŋga wra li jɔɔn na yɛlɛ fulo na taarɛ kre, Nebuzaradan na Judah leele lafɛɛ kɔɔnashin na fuloe shiin na kunɔ yii mna sɛ u ŋga.

Kena pe kro nyu na pe kagbenyi jijirɛ na lafɛɛ kɔɔnanu.

31 Ŋga pra Judah ŋunu Jehoiachin yii mu sɛ Babylon tra nu kre, na u da wa yɛlɛ fulo na kɛmbɔkɔɔnashin. Kre yɛlɛ kre na Evil-Merodach na pan mu jɔɔn li Babylon tra nu. Ŋunu wre na tia pra Judah ŋunu Jehoiachin wɔ nyuŋgo, nyiɛpɔ kɛmbɔshiinwo kre ble fulo na kunɔ na. 32 Ŋunu wre na nyu Jehoiachin na, mna u ŋga kpɔɔmu tnihaa. Wra u ŋga buuro mu wɛ u ŋulo mblɛ pra yii lawee yɛ nu mu ya u na pre na. 33 Kra tia pra ŋunu Jehoiachin dodonyi nyjɛ ni wra yili nyuŋgo yire wɔ u na mna wa, a wre na ŋunu wre praa lii u lihaa, mna sɛ su ble nyjɛ Jehoiachin na li yire kro nu. 34 Blenyini ŋga, ŋunu wre naa Jehoiachin kaan fɔtɔɔrɔ chɛchiɛri, mna sɛ su u kumu ble.