Isaiah Hlɛ
1
Kee nyjɛ yii wa hlɛ ŋga nu ŋga pe Judah na Jerusalem kee nyjɛ o Tafun Nyiɛkpɔɔ na wɔ mu Amoz pɔ Isaiah wre nyina, nyjila ŋga Uzziah, na Jotham, na Ahaz, na Hezekiah na pe ŋulo Judah tra nu kre.Nyiɛkpɔɔ U Leele Yiɛ Kee Yo Pe Pan
2 O Tafun Nyiɛkpɔɔ na yo mbo,
“Nyjeeri na tra e loo ni pan.
Mi ni ni biile pɔɔri,
a pe yiri mu ni taan.
3 Nui, na bubunlɔ pe tafɛɛnlɛ,
na lawee ŋga nu
pe pe kaan sro chin.
La, ni leele,
Israel leele n kala ka chin,
a pe n na kala nɔɔ ndru.”
4 Israel leele sisampefɛɛnlɛ waŋgra,
e pimi li mu na tro,
kefuɛn pefɛɛnlɛ na,
mblɛ pe n pe Nyiɛkpɔɔ le mu nya,
mu fɛ mu laa,
Israel Nyiɛkpɔɔ cheche wre kro.
5 Ŋgi ki tia ee wa mu yiri,
mu u taan tɛ ŋga hin?
Israel leele e chaa,
mbe u e ndie tini kpɔɔ mbe ya ree?
Fuŋgaami ŋga e ndrɛ pe klɛ bri,
a e sɔɔnrɔ ku.
6 Mu yire e ndrɛ na,
mu sɛ su e jewrɛ na,
faŋga n wa,
wa wejiŋge kokoo ka nu.
Klɛ bibre, na klɛ lɛɛlɛ bri na,
a tinyi klɛ bri yi e na,
e klɛ yire na fɔ,
a e na tuwe le yi nu mbe yi pɔ.
7 E waŋgra kre kla,
a e chiɛ yire shɔ mu tɔɔnrɔ wo.
E yire na le,
a tra ka leele pan,
mu e waŋgra kre wru mu ki kla.
8 Jerusalem chiin ki sɛ kro,
mu pe na kakpɔɔ,
ŋga loŋgoolo yirɛ koli,
mu tle ki mboo na,
mbe nduu mbe le ki nu yi.
Ki sɛ pe na asɛkɛ,
ŋga pe sin tre sɛnyi kagbla nu,
ndee na sugbaa,
ŋga pe sin see lamu yi.
9 Na o Tafun Jaŋgafun Nyiɛkpɔɔ,
wre nsra tolɛɛlɛ ti o pan,
Jerusalem wra kla,
na Sodom na Gomorrah leele lɛ.
10 Jerusalem, pan ki loplombo,
na ki leele nyi na,
Sodom na Gomorrah leele lɛ.
E loo kee ŋga o Tafun,
Nyiɛkpɔɔ wre yuu e pan.
E ndie tɛɛ kee ŋga o Tafun,
Nyiɛkpɔɔ wre e nyinai ŋga na.
11 U yo mbo,
“Kena e jawa na sra nyjɛ,
e woni suwi na ni kaan ŋga,
ni yiɛ shɔ yi na ree?
E mbaala, na e yurɛ chichiele,
nyina nyjɛ ni e sra woni,
na ni kaan yire kee sra wɔ ni na,
a e nui, na e mbaala na,
e sikaala nyimi yire kee ni bin.
12 Na e paan ni sumi haa,
ŋmbi u yo e paan na,
ni Suminyuŋgo taala hin?
13 E sra nyjɛ e woni yire,
pe yirɛ wɛɛ.
A e tuwe ndiom tɛɛn,
nyjɛ e sroi yire pe ni afuŋgo yirɛ.
E sisam nyjɛ e pini,
e Yeŋge Fɔŋgɔ blelie,
na Wuuble lie,
na ble nyjɛ nu e fni,
na ni sumi yire,
ni n na chaa mbe yi nya na.
14 E Yeŋge Fɔŋgɔ blelie,
na ble nyjɛ nu e wuui yire,
kee ni bin,
a ni n na yi chaa
mbe nya nyini ni.
15 Mu yire ŋga na,
e kɛnyi yire mu nyiɛtali,
mba kna mbe e le.
Hali imi ee nyiɛtali mbe da kpan,
mba loo e pan, ŋgi na hin?
Nyimi e kɛnyi mana.
16 E weli e yili.
E e sisam kee nyjɛ,
e pini yire krɛrɛ ti.
17 E chichie pee twan.
E le na ee na kpra,
ŋga ki fraka kuun,
e na yaa mblɛ pe fiŋge pre na,
e na bijile kaan,
ŋga ki fna na pe ni,
mbra yaa lekuchiɛlɛ na.”
18 O Tafun Nyiɛkpɔɔ wre yo mbo,
“Fuŋga rɛ, e pan,
mbe o oyɛ lalaa gbeele.
Na e sisam tia e mana,
mu nyina piipii,
mbe e weli mbe e yili,
mbe fniŋge, na nyiɛ subie yi.
Ndee mbe fniŋge na,
mbafiun yooro yi.
19 Na ee li ni nyu kee na wala,
ee yirɛ chichiele nyjɛ,
yie yili tra kre nu kre ta mbe li.
20 La, na e waa yiri mu ni taan naa,
kena e loŋgoolo we e gbo.
Mi e Tafun Nyiɛkpɔɔ ni ki yo.”
Sisam Bribri Kakpɔɔ
21 Jerusalem ŋga nu,
kpralie na nyi fa kre,
ki leele kɔ na pini,
na chlɔ tɛtiɛrɔɔ wi.
Nyjila ka nu na leele,
frakafɛɛnlɛ bribri pee wa ki na,
la, linkufɛɛnlɛ bribri,
pe kro ki na fuŋga.
22 Jerusalem, nyjila ka nu,
na pan mu nyi na swafiŋge yi,
la, pan mu nyi na,
yira waa yi fuŋga.
Pan mna nyi na simi taan yi,
la, fuŋga rɛ,
mu kaari nyumu waa.
23 Mu yɛkulo pre kro kna,
mu na wii na ni taanla,
mu sɛ kaari juolo nɔɔlɔ.
Dɔli yirɛ, na latam pe yirɛ,
pe shio leele pan.
A pra yire bijile kro,
ndee mbe ndie tɛɛ,
lekuchiɛlɛ pan kala lihaa.
24 Kena e loo kee ŋga,
mi Israel Nyiɛkpɔɔ,
Jaŋgafun wre yuu,
“Ni loŋgoolo lɛ yire,
a mbe fɔlɔ tɔ e na,
mbe yaa ni tɔɔra ma na.
25 Mbe e fiŋge, mbe e pe,
imi na pe tɔɔnrɔ leni kanhun,
mbe ki nɛɛrɛ laa ki na kre,
pan mbe e pe,
mbe nɛɛrɛ kro laa e na.
26 Mbe e ŋga kprakunfɛɛnlɛ,
na paaranyinafɛɛnlɛ,
na e fa wolo pre lɛ.
Mbe ki ti pe Jerusalem yeeri,
kakpɔɔ ŋga leele pe fraka,
mu na lii ni kee na kpra ni.”
27 Ŋgi na hin?
O Tafun Nyiɛkpɔɔ fraka,
a we Jerusalem na leele,
mblɛ pee wa ki na,
mu pe jawala chinɛ pre shɔ.
28 La, ŋmba we sisaa pe,
mbe yiri mbe u taan kre,
we u kla, a ŋmba we laa u kro
kre we u gbo.
29 Nyifɛɛrɛ we e gbo,
oak tinyi badɛnyi nyjɛ na e yiɛshɔ,
a e sɛɛnlɛ tɛɛ tɛɛ yi jaara,
kre ndra na,
a ŋga e kagblɛ lawee wɔ,
mu na sumi wa ŋga,
nyifɛɛrɛ we e gbo.
30 Pan ee pe na oak tiŋge,
ŋga wrɛ ki nyaara mu wo yi,
mbe ndru mbe pe na kagbla,
ŋga yirɛ na nyumu klo yi.
31 Faŋgafɛɛnlɛ mblɛ e nu,
pre we pe na nyaa,
nyjɛ ni pe kanhun gbeerii yi.
Pre titi na tnumu nyjɛ pe tuni,
yire we shɔ nyaanyaa,
a ndro wa pe mbe kanhun kre fii.