Ŋunu Solomon Mɛtɛɛn
1
Ŋunu Solomon mɛtɛɛn nyjɛ pra kɔ mu u ŋga.Chlɔ Wre
2 Ti mbe ŋunu ni nyu shiun,
ŋgi na hin?
U koroo tna mu wɛ simi gbɔwo na.
3 Mu tlade ŋga mu fa tia mu ndiom tna,
a mu mɛɛ tna ndie,
na tlade ndiom taan ŋga pe fa yi.
Kre ki tia bichabɛɛlɛ mu kori ma kre.
4 Tolɛɛ, pe nyaanyaa
mu ni wru mu sɛ na ni ni,
mu nyuŋgo too.
Ŋunu, o yiɛshɔ mu na kpɔɔ,
a oo mu koroo pni
mbe wɛ simi gbɔwo na.
A pan ki fna
mbe o mu kori kpɔɔ mbe da.
5 Jerusalem lechiɛlɛ,
ni wɔ, la, ni nyu.
Ni wɔ na Kedar yoŋgo nyuŋgo yi,
mu nyu na Solomon yoŋgo
ŋga ni u u nyuŋgo lam yɔ yi.
6 Maa yila ni wɔmu kre na,
mbra ni le kpɔɔ ma.
Ŋgi na hin?
Yila ki ni wejiŋge wɔ ma kre.
Ni lo biile bibilɛ krɔ yii na ni ni,
pe tia ndaa tnumu tuni
tre sɛnyi see.
Ki tia ni nsra nyjila ta mna ni yɛ le.
7 Ni korifun, ni nyina mna mu shie
na mu yurɛ ni kahaa.
A na yila da lafo sena mu shie
na pe ni mbe pe sɛ wuu hin?
Ni nyina wa,
mbe mba pe na chlɔ ŋmba,
u sata wa yiɛ wi,
mbe kɔɔ sɛ na mu chaa
mu nɔɔlɔ mbaala lefɛɛnlɛ lawee.
Blɔ Wre
8 Ni bichrɔ chichie,
kena mu n chin lawee,
ŋga nu ni shie ra?
Yiri mu taa mbaala pre tlo na,
mu sɛ na yurɛ biile pre le
mbe pra kaa lawee ŋga nu mbaala
lefɛɛnlɛ pre yonyi nyinyi yire nyi kre.
9 Ni nyiɛ korifun,
mu pe ni pan na sochlɔ ŋmba
u ŋunu Pharaoh sookaa tinii wi.
10 Na mu ndiile yirɛ le,
mu lagboo yirɛ le,
mbe ki ti mu yiɛ chiɛnri mbe ya.
11 Oo swanyiɛ tɛɛ,
mbe mu ndiile yirɛ pe,
mbe yi san na swafiŋge ni.
Chlɔ Wre
12 Na ŋunu tni u kagbala na lii,
mbe ni tlade ndiom,
lawee kre shɔ mbe ta.
13 Ni nyiɛ korifun,
pan u nyi ni pan na,
tlade ndiom taan
titi ŋga ni taa ni nyinimi shiin,
lalaa yi.
14 Pan ni korifun wre nyi
na En-Gedi tre see toto jiri.
Blɔ Wre
15 Ni bichrɔ,
mu nyu titi,
ni korifun
pan mu nyiɛlɛ bie nyu
na katoo kotro nyiɛlɛ yi.
Chlɔ Wre
16 Ni nyanyjɔ ŋmba ni kori,
mu nyu titi,
a muu niŋge ni ni pan mu tro,
nyaa nyinyi na oo sni.
17 Cedar tinyi,
na cypress tinyi chichiele
yire nyimi lawee oo tni.