Koroo Tii Mbe Yira Kro Nyu
Chlɔ Wre
2
Mi rɛ, pan ni nyi na toto,nyjɛ yii wa Sharon na kre yi,
pan ni nyi to na lɔɔchiatoto,
nyjɛ yii wa nyuɛ landɛɛ nu yi.
Blɔ Wre
2 Ni bichrɔ, na ni mu wru,
mu gbun bichabɛɛlɛ pre na,
pan mu nyi na lɔɔchiatoto,
wa mu chaa wuuro nu.
Chlɔ Wre
3 Ni nyanyjɔ,
na muu wa mu tni yirifumblɔ nu,
pan mu nyi ni pan na tiŋge liwo,
ŋga kii wa mu yire klɔ tinyi nu yi.
Ni yiɛshɔ na mbe sɛ tni mu jaara
mbe mu nyimi wo ni na,
a mu kee tna ni pan,
na tiŋge taan ŋga,
mbe kun mbe li yi.
4 Ni nyanyjɔ, sɛ na ni ni,
lihaa chichie nu,
a dansiɛrɛ yira,
ŋga ki ni tɔ yi u koroo.
5 Koroo tia ndaa yaa,
kena e ni ŋga tinyi sɛnyi,
mbe ni li mbe faŋga ta.
6 Ni nyanyjɔ u kamɛŋɛ kɛ le,
ni ndra tapan,
mu kalie tɛɛ mu ni yii,
mu mbra uyɛ na.
7 Jerusalem chiɛlɛ, e sable,
na kafaa mɛɛ tɛɛ e da e ni ŋga,
na yaa ni koroo yire,
ni nu nyjila ŋga ki n fna nu.a
Chlɔ Wre
8 Loo, ni blɔ ŋmba ni kori,
wre mana loo,
wra yeni na nyuɛ,
na kotum ndru na paan.
9 Ndro ŋmba ni kori wre pan u nyi
na sable ndee kafaa wi.
Le, wre u yire mu mbra mboo
mbɛɛ na wa,
mu na le ki vromboo nu,
na jee na jle,
ki paari kɛɛn ndoolo kre.
Blɔ Wre
10 Ni korifun wre ni yeeri mbo,
“Bichrɔ nyɔɔ, yiri mbe o sɛ.
11-12 Koo nyjila tro,
a nyiɛ kun, a toto jiri,
kena mɛɛ kɔ nyjila nu o nyi kre.
Lawee ŋga nu mu tro kpan,
kotulo gnɔɔ mu ndru,
tra kre nu poŋgo.
13 A fig tinyi kpolo,
a tre sɛnyi totoe ndiom,
lawee shɔ mu ta poŋgo.
Kena ni bichrɔ chichuo,
yiri mu pan mbe o sɛ.”
14 Pan mu nyi ni pan na kotro,
ŋmba u sɛ le dnɛ wee nu wi,
ti mbe ni mu yiɛ nya,
mbe mu mana loo, ŋgi na hin?
Mu mana tna,
a mu yiɛ kotolo nyu ni pan titi.
Chlɔ Wre
15 O tre see toto jiri,
kena ki fna mbe o,
ŋmbokuŋmbo bɛɛlɛ mblɛ,
pe yi klai pre yii mbe pia yi kla.
16 Ni ni nyanyjɔ wre kori,
ni wo wi, a u wo wi mi.
Ni nyanyjɔ wre,
totoe lawee we sɛ,
na u yurɛ ni kahaa.
17 Ni korifun, na nyisee nyu fuflɛ,
waa gbun mu mu da wa,
a ndram waa saan,
jande mu ndru mu pan ni pan,
pe na kafaa ndee sable,
ŋmba u ndru mu sɛ nduu,
u nyuɛ na wi.