Ndroo Ŋunɛ
Chlɔ Wre
3
Ndaa sni ni dɛŋglɛ na,mna ŋunɛ ŋunu ndroo,
na ni kila
na ni korifun wre chaa na tro,
a ni nsra u nya.
2 A ndaa yiri mu to chia lam.
Ndaa sɛ kila kakpɔɔ kre lete na,
mu tro,
mna sɛ jafa ndoe yire nu kro.
Ndaa kila mna ni nyiɛ korifun,
wre haa cha ni nsra u nya.
3 Ŋga ndaa u chaa kre,
chia shiefɛɛnlɛ mblɛ pe chia feni
na kuun pre na ni fni,
a ndaa pe wie na,
“Ni nyiɛ korifun wre,
e u nya ni paan?”
4 Ŋga ndaa pe wa mu tro to,
mna ni nyiɛ korifun wre nya.
A ndaa ni nyanyjɔ wre fa mu yii,
ndaa yo mba u wa mbe u sɛ,
fɔna ni sɛ na u ni ni lo katoo.
A ndaa sɛ na u ni nyuŋgo,
ŋga nu pra ni se mna wa nu.
5 Jerusalem bichiɛlɛ, e sable,
na kafaa mɛɛ tɛɛ e da e ni ŋga,
na yaa koroo yire ndro nu,
nyjila ŋga ni ki n fna nu,
fɔna ki nyjila da.
Mɛɛ Taarɛ Wo
6 Ndro ŋmbi u yiri tablɔ tra,
nu wa na paan na tlo yi,
mu pe na wree yi ŋga hin?
A kroboo, na tuwe ndiomu tɛɛn,
ndiom yili u na ma hin?
7 E le, ŋunu Solomon pe tio,
u ŋujɔɔn na,
a Israel ŋunɔ wifɛɛnlɛ titie,
fuloe taarɛ u fɛ mu kun,
8 a pe kro pe brɔfiɛn yiɛshiin paari,
a na mu pe le pe leele pre kro,
ŋunɔ wi mu chin.
A pe brɔfiɛnlɛ yiɛshiin yiree wa,
mu mbra mbra pe na,
a pra kee sisaa ŋga kie pan ble sri.
9 Ŋunu Solomon ŋujɔɔn
ŋga ni pe u tru kre,
Lebanon tiŋge ni pra ki tɛ.
10 A pra ki kɛɛn prɔrɔprɔrɔ pe,
na swafiŋge ni,
mna swanyiɛ nya mu wo
ki kro haa na.
A pra yoŋgo nyiɛduu,
ŋga Jerusalem chiɛlɛ tin,
a ki nyu titi tɛɛ mu ki tnihaa tɔ.
11 Zion bichiɛlɛ e pan,
e ŋunu Solomon le,
na u ŋujuulee ni,
kre ŋujuulee ŋga,
kre u lo na u ŋga u bijam pe ble,
kre ble kre na yi
u yɛshɔɔrɔ ble kpɔɔ.