Blɔ Wre
4
Ni bichrɔ, mu nyu ni pan titi,mu nyu ni pan mu tro,
na ni mu nyiɛlɛ bie nya sata nu,
pan yi nyi na kotro nyiɛlɛ yi.
Mu ndra nyjure pe na sikaala,
tataara mblɛ pe Gilead nyua tri,
na paan lɛ.
2 Mu ŋgaala kro fni mu nyuu,
a yi ka n kɔ mu to.
Pan yi fniŋge mu nyuu,
na mbafimble mblɛ yooro
pe knumu mu pe weli lɛ.
3 Mu nyu hlɛ nyina,
na maŋa nyiɛ yi,
na mu paara ki nyu mu tro.
A mu gbenyi nyu,
mu pe loŋgiloŋgi,
na pomegranate bie yi,
mu sata nu.
4 Mu yulɔ kaan pe na,
ŋunu David shie nyuŋgo
gedeŋge ŋga u sin kre yi,
ki nyu mu pe plɔm,
a pe lagboo kaari le ki na,
pan ki nyi na ŋunɔ wifɛɛnlɛ,
yirɛ nyjɛ ni pe peyɛ toni,
kagbeŋge pe hlu,
mu ki fɛ mu kun.
5 Mu nyinimi shiin yire nyu ni pan
na kafaala biile atae lii,
lɔɔchiatotoe nu.
6 Mbe sɛ tni nyua ŋga na kroboo,
na tuwe ndiom tɛɛn nyi kre na,
mbe sɛ su na nyisee nyu fuflɛ,
we gbun mbe tro,
mbe ndram saan.
7 Ni bijɔ mu nyu titi,
hali mu kokoo ka n peere.
8 Ni bijɔ, ti mbe o yili Lebanon
nyua na.
Ti mbe o tii Amana, na Senir,
na Hermon nyuɛ nyjɛ na jirae,
na kajinyi yurɛ nyi yire na.
9 Ni bijɔ, mu ni loloŋgo ju,
mu ju mu ni le gbee nunu,
a mu lagboo kaari tia mu ni ta.
10 Ni jaa, na ni bijɔ,
mu koroo tna ni pan,
mu wɛ simi gbɔwo na.
A tlade ŋga mu fa kre,
ki ndiom tna,
mu wɛ tuwe ndiom tɛɛn kro na.
11 Mu nyu kee tna ni pan,
na srɛ zezee ŋga ki nuni yi.
A mu nyu kee tii,
mbe wejiŋge nyjii ndro na,
na nɔnɔ ndee srɛ ta mu li.
A mu dodoŋgi ndiom tna,
na Lebanon tra nu ki yiri.
12 Ni jaa, ni bijɔ, pan mu nyi,
na kagbla ŋga nyu pe kan yi,
ndee na blo ŋga pe yirɛ tɛɛ,
mu ki fɛ mu kun,
mu ki nyu tɔ yi kimkim yi.
13 Mu kagbla wa,
bawa pomegranate tinyi,
na tinyi chichiele li wee nyi.
A kroboo na tuwe ndiom tɛɛn
nyini nyini bɔ wa.
14 Tuwe ndiom tɛɛn nyjɛ ni pe
tlade pini kro wa wa.
15 A pan mu nyi na nyumu
ŋga ki fuu na kagbla nyiŋgei yi.
Na ni mu nya to pan mu nyi na,
lafolo nyumu klemm,
ŋga ki yilii Lebanon nyua na yi.
Chlɔ Wre
16 Nyjeeri haa fuflɛ,
na tapan haa fuflɛ,
e gbun e tro ni kagbla kre nu,
mbe ki ti mbe ni kagbla
kre yirɛ ndiom yili mbe da lee,
mbe ki ti ni nyiɛ korifun wre
pan u kagbla kre nu,
mbe ki sɛnyi tɛɛn yire yɛ naa.