Ecclesiastes Hlɛ
Lewo Wa Jaa Tnimu Ŋga Nu O Nyi Ŋga Nɔɔ Loo
1
Ŋunu David biblɔ kachiŋu,ŋmba na wi Jerusalem ŋunu wre,
u nyu kayooro yi kre.
2 Yaka n wa nɔɔloo ni,
ni yiɛ wa mu waŋgra le,
kre yira n wa a nɔɔ loo wa ki nu,
a yaka n wa mbe lewo jaa ki nɔɔ loo.
3 Tnumu ŋga lewo tuni,
na fnaa ŋga u fnai tra ŋga nu ŋga krɛrɛ,
yira ŋgi tnu we ta ki nu hin?
4 Leele paan na shie,
la, waŋgra ŋga imi na ki nyi,
pan ki nyi nyjila kro nu.
5 Yila yilii mbe sɛ to,
mbe ndru mbe pe nyaanyaa,
mbe sɛ yili ki finhaa.
6 Fuflɛ gbuun mbe yire nyjeeri haa,
mbe knaa gbuun sɛ tapan haa,
kie gbun mbe fɛɛ kun chiin,
mbe ndru sɛ yili mna ki yire na gbuun kre.
7 Lɔɛ kro fuu na shie na lee epo nu,
a nde kia jaa nyi.
Mna lɔɛ yire na fuun kre,
bawa yie fo mbe ndru sɛ le.
8 Waŋgra ŋga kee kro pe fnaa bri,
lewo wa jaa ki nyina
mbe ndro ki nɔɔ loo.
Nyini wa jaa fna kala lee na,
a ndie wa jaa yɔɔ kala loo na.
9 Kee nyjɛ yi da pan kre,
da mu pan fa,
a nyjɛ yi da mu pe fa kre,
yie kɔɔ pe na.
Yaka n wa mu pe yira fɔŋgɔ
tra ŋga nu.
10 Yira ŋgi kii wa waŋgra ŋga nu,
mbe lewo ki nya mbe yo na
yira fɔŋgɔ yi ŋga hin?
Kre yira kre da mu pan fa mu tro.
Kre yira kre da mu pe,
a pe chin mu o se.
11 Leele mblɛ pe ku mu sɛ kre,
ndro na pe sɔɔnri na.
Pan chɔɔ mblɛ pe n ta mu se tun kre,
wa kɔɔ pe krofɛɛnlɛ pre sɔɔnri na.
Yira Ŋgi Kii Wa Kachindɛ Nu Hin
12 Mi ŋmba pe yeeri Kachiŋu kre, mi na wi Israel ŋunu Jerusalem na. 13 Ndaa niyɛ kɔ mu tɛɛ, mu kachindɛ kee nyjɛ yi pini tra yiɛ na kro twan. Ŋga ndaa nya yi na, tuuro kpɔɔ titi Nyiɛkpɔɔ cha mu lewo na nyjuro tio. 14 Ni yirɛ nyjɛ yi pini tra ŋga yiɛ na kro nya, yi krɛrɛ lewo wa jaa yi nɔɔ loo, pan ki nyi na lewo fuflɛ nini.
15 Yira ŋga ki ŋmaala kre,
kia jaa fraka.
Yira ŋga ki n wa kre,
ma jaa ki tɔɔnri na kii wa.
16 Ndaa yo niyɛ pan na, ni yiri mu kachindɛ ta mu wɛ leele mblɛ pe yiɛklu mu jɔɔn li Jerusalem na kro na. A ni chin yira ŋga kii wa kachindɛ, na jawala taa nu. 17 Ndaa ni jawala pe na mbe kachindɛ na jijiere, na jawala taa, na tɔɔlɛɛ lalaa chin, la, ŋga ndaa nya yi na, kra pe na fuflɛ ni nini.
18 Kee ŋga ni nya yi na,
na lewo kachindɛ kpɔɔ,
kena u foorolie kie nɛɛ.
A lewo jawalafun kro,
u tɔɔra nɛɛ.