Ŋunu Jaaraa
31
Kee nyjɛ ŋunu Lemuel lo,na yo u pan yi kre.
2 Ni pɔ ŋmba ni kori wi ŋu,
Nyiɛkpɔɔ ndaa tali,
a wra tia ndaa mu se,
ki tia ndie tɛɛ ni pan chiriri.
3 Maashia mu faŋga kla chlɔ snɛɛ na,
a maashia mu swa kla u na.
Kre kepele ŋga ŋulo tataara kla.
4 Lemuel loo,
ŋulo n fna simi gbɔɔrɔ ni,
ndee mbe ti simi shelee
niŋge pe yii kple.
5 Na pe gbɔ pie mbra yire fɛɛ,
mbe foorofɛɛnlɛ kekpra kna.
6 Mblɛ pe chaa mbe ku kre,
na mblɛ yiɛ ki je pre wo yi simi.
7 Ti mbe pra gboo,
mbe pe shian
na pe fooro fɛɛ.
8 Lewo ŋmba wa jaa paara kpan,
paara u pan,
mu pɔlɛfɛɛnlɛ kala yo
kpra ni mu pe ŋga.
9 Paara mu pe ŋga,
mu kpra li mu keyoo nu,
mu foorofɛɛnlɛ na
shianfɛɛnlɛ kee yo mu pe ŋga.
Chlɔ Chichie Kepele
10 Ma ta na mu chlɔ chichuo ta,
u kee sheli mu wɛ
lagboo yirɛ chichiele na.
11 U plɔ dankna u na,
a yaka wa blɔ wre shian.
12 Nyjila kro nu
u u plɔ pini chichie,
a wa u pe sisaa fio.
13 We nyibinyiɛ tɛɛ,
mbe kɔdɔli suuru
mbe yoŋgo tin.
14 U shie mbe sɛ sro cha haalee,
mbe pan katoo,
pan u nyi na
krɔ ŋga ki tro epo yiɛ na,
na shie na sro wru
haalee na paan yi.
15 We gbolo mbe yiri mbe sro pe,
mbe wre na u plɔ na u biile li,
mbe u u tnichiɛlɛ nyina
tnumu ŋga pie tun.
16 Wre u kila mbe sɛ tra cha mbe lɔ
mbe u greree saan,
mbe tra kre fɔlɔ tɔ,
mbe chiin ki pe kagbla.
17 A uu faŋga ni
na tnumu tuni kpɔɔ,
na uyɛ gbeŋmba kee kro na.
18 U le na tnumu ŋga we tun kpan,
we tnu ta ki nu,
u tnumu tuni mbe ndroo sɛ u lɛ.
19 Wre titi u u jese suuru,
mbe u yoŋgo tin.
20 A u yaa shianfɛɛnlɛ,
na pɔlɛfɛɛnlɛ na.
21 U kee ka ma na weere nyjila ni,
ŋgi na hin? Weere nyjila yonyii
wa, u katoo leele pan.
22 Wre titi u u sniyirɛ tini,
a yonyi chichiele u toni.
23 U plɔ pe ndro ŋmba leele kro chin,
na u kaan buuro chia kre na.
24 U yonyi na greree tini,
na prɛ jafa lifɛɛnlɛ pan.
25 Uu faŋga ni,
a ndro kro u kaan yiɛ,
a u n na kee ŋga kie pan baŋga fiɛ.
26 A imi na u nyji to,
pan u kachindɛ kee paara.
27 U u katoo leele le chichie,
a u n gbashia ni.
28 U biile u pni na u ka pini,
a pan u plɔ u kaan mɛɛ na yuu,
29 mbo, “Chiɛlɛ chichiele nɛɛ,
ande ŋu rɛ,
mu wɛ pe na kro.”
30 Lewo niŋge we jaa ndro fana,
pan lewo nyumu ja na klai,
la, chlɔ ŋmba u Nyiɛkpɔɔ fiɛ wre,
pie u ŋga mɛɛ nyjila kro nu.
31 Kena e u ŋga buuro,
e u ŋga mɛɛ leele nu,
kee ŋga u pe kre ndra na.