Agur Kee Nyjɛ Wra Yo
30
Kee nyjɛ Jakeh pɔ Agur,na nya mu yo yire yi kre,
mbo, “Nyiɛkpɔɔ n wa ni kro na,
ni shɔnli na Nyiɛkpɔɔ n wa ni kro na,
ki tia mba jaa yaka pe.
2 Ndro ma mi na,
ni kaari yurɔ.
Ni n na jawa na lewo wi mi na.
3 Ni n kachindɛ kee tuan,
a ni n Nyiɛkpɔɔ kee ka chin.”
4 Ŋmbi u da mu sɛ nyjeeri,
mu ndru mu pan tun hin?
Ndro ŋmbi u da mu fuflɛ fa,
mu yii tun hin?
A ndro ŋmbi u da,
mu nyumu fo yoŋgo ni tun hin?
A ŋmbi u tra ndee waŋgra ŋga,
samu nyu tnɔ mu tro hin?
Ŋu ŋmba mu u chin,
ni nyina u mɛɛ,
a u pɔ mɛɛ ŋgi hin?
5 Nyiɛkpɔɔ lii u nyu kee,
ŋga u yuu kro na.
A mblɛ pe u haa chaa pre,
u kɛ toni pe na.
6 Maashia kala fnɛ mbe ya,
kee ŋga Nyiɛkpɔɔ yo kre na,
na kre ma we mu yiɛ kee yo mu pan,
mbe mu nyina na kafnu wi ŋu.
7 Nyiɛkpɔɔ, kee shiin yɛ ni mu tali,
mbe mu ni ŋga yi yi,
mbe ni chiin ku.
8 Ni wɔ mu yili kafinɛ kee yoo nu,
a maa shia ti mbe ni shian mbe tro,
ndee mbe ni swa ta mbe tro.
La, ta ni kaan ni blenyini aliire,
ŋga kie ni shian.
9 Na ni niyɛ ta mu tro,
aada mba mu le mbe nya,
a na ni shian mu tro,
aada mbe kɔɔ sɛ ju,
mbe mu mɛɛ kla.
10 Maashia sumifun keesaa yo
u tafun pan,
na kre ma we mu sun,
mbe ki ti mu kala nya.
11 Leele plɛ pe lɛɛlɛ suni,
a pan chɔɔ praa pe loolo le mu nya.
12 Leele plɛɛ wa mu pe cheche peyɛ pan,
ande pe le nɛɛrɛ nu.
13 Leele plɛ peyɛ kpɔɔri,
na jawa na pe wɛ ndro kro na.
14 Leele plɛɛ wa pɔlɛfɛɛnlɛ,
na shianfɛɛnlɛ pe dnumu,
a kre kolo kre na pe troi,
na pe aliire taa.
15 Jajaara biile shiin plɛ se,
a pe kro mɛɛ yi,
“Ni ŋga ka na.”
Yirɛ jijirɛ yɛɛ wa,
a yaka na ja mu yi fuŋgo nyu yii
16 Yire yi kuulo ndoo,
na chlɔ ŋmba u n biile ni,
na tra ŋga ki yua na nyiɛ nyumu chaa,
na kanhun ŋga ki nyini
a kia jaa ki fii.
17 Ndro ŋmba we na u lɛ pini
mbra tɛɛ, ndee mbe u lo le fiɛn
u lɛlɛm nyjila kre,
ki fna mbe kɔkɔsakie u kaara li,
ndee mbe gɔɔgɔɔe u nyiɛlɛ
suulo mbe li.
18 Yirɛ jijirɛ yɛɛ wa,
a yi pe kawako ni ni pan,
19 nyuu ŋmba u yirii mbe sɛ
nyjeeri haalee,
na wɔɔ ŋmba u fulo dnɛ na,
na krɔ ŋga ki ki kolo haa chin,
na tro epo yiɛ na,
na koroo ŋga kii wa chlɔ
na blɔ lalaa.
20 Imi na chlɔ tɛtiɛrɔɔ pini yi kre,
na u sɛ sni blɔ fuŋu ni mu pan,
mbe u weli mbe yo mbo,
“Na ni n keesaa ka pe.”
21 Kaalɛɛ jijirɛ yɛɛ wa,
a tra ŋga titi wa jaa yi dumbrɛ.
22 Yire yi, tnu ŋmba u kaari ŋunu.
Jijuo ŋmba u yira ŋga u chaa
mbe ka kro taa.
23 Chlɔ lepra ŋmba u blɔ ta mu leŋge.
Na tnichlɔ ŋmba u kɔ mu u
tafun chlɔ tnihaa shɔ mu ta.
24 Yurɛ jijirɛ plɛɛ wa dnunya ŋga nu,
pan pe nyi fiɛnfiɛn imi,
a nde pe kala chin titi.
25 Pre lɛ, nimble,
faŋga n wa pe nu,
ande pe sro chaa na teeri tla na.
26 Frijaala, pe n faŋga ni ma,
ande pe ja na wee woni dnɛ ndoo.
27 Kpatɔ, pe n wa ŋunu ni,
ande chaa pe chaa na nyaari.
28 Kakila, mu jaa wa yii kɛ ni,
ande na mu wa chaa,
ŋunu katoo mu u nya.
29 Yurɛ jijirɛ plɛɛ wa, na pe nyaari,
pe kee yɛshɔɔrɔ ni.
30 Jirae mblɛ lɛ yurɛ kro faŋgafɛɛnlɛ,
a pe n na yaka fiɛ.
31 Kapilɛ, na ŋgopilɛ mblɛ,
pe nyaari mbra jɛŋgi mbra tro,
na ŋunu ŋmba wifɛɛnlɛ
pe u fɛ mu kun.
32 Na daŋgo titi wi ŋu,
a mna muyɛ kpɔɔri,
na sisam kee jawa kre,
ki ti mu jawala nu.
33 Na mu nɔnɔ tɛɛ a ki mu,
naara mu ta,
a na mu mu ŋmbrɔ mana fɔɔri,
nyimi kie yili.
A na mu chɔmbɔ le krɔ kee nu,
katala kee kie kaari.