29
Lewo ŋmba pe jaari nyjila kro nu,a u je na ndikana pini kre,
u klaa we u fo,
a yaka wa jaa u shɔ.
2 Na lewo ŋmba u fraka jaŋga ta,
ki tii mbe leele yiɛ shɔ,
la, na sisampefun waa jaŋga ta,
mbe u leele na taanri.
3 Lewo kachiŋu tii mbe u lɛ yiɛshɔ,
la, ŋmba na tiɛrifɛɛnlɛ pe nyaari wre,
we u swa kla finfin.
4 Na ŋunu kpralie wru mu yiɛklu,
ki tii mbe u waŋgra yire,
la, na u yiɛ waa shɔ dɔlɔɔ na,
we waŋgra kre chan.
5 Lewo ŋmba u nyutnamu tɛɛ,
na u ŋmbrɔ fana kre,
uyɛ peerii pɛlɛ.
6 Sisam pefun sisam pe pɛlɛ mu wre titi ŋga,
la, ŋmba u fraka we mɛɛ kɔ mbe u yiɛ shɔ.
7 Lewo chichie u shianfun keshian chini,
la, sisampefun n kre kee kre chin.
8 Leele mblɛ pe leele pini na tɛɛ pre,
pe paan na kakrɔ ni chia na,
la, kachimblɛ kala nyu kuu.
9 Na kachiŋu na jijuo ta,
gble jijuo we na gble mbra tɛɛ,
a kraa kala kɔ.
10 Linkufɛɛnlɛ n na kpralifɛɛnlɛ kee chaa,
la, pe chaa mbe frakafɛɛnlɛ gbo.
11 Na jijuo krɔkun to,
ndro kro we ki nya,
la, kachiŋu ja na kee kro tii lɛɛ.
12 Na ŋunu ndie teeri kafinɛ kee na,
ki tii mbe u loplombo pe sisampefɛɛnlɛ.
13 Shianfun na u fiŋgefun kro,
Nyiɛkpɔɔ pe ŋga nyiɛlɛ,
a praa nyaa.
14 Ŋunu ŋmba u pɔlɛfun keshian chini kre,
u jɔɔn lii mbe mu.
15 Ŋmba u pɔ gbuun mbe u fraka kre,
u u nyina kachindɛ,
a na pɔ ŋga u chaa pini,
u lo yiɛ u leni nyumu.
16 Na sisampefɛɛnlɛ jaŋga ta,
mbe sisampee nɛɛ.
La, frakafɛɛnlɛ we ŋmaa li,
mbe pre leele mblɛ taahaa nya.
17 Na mu pɔ kefɔɔn pe,
u ndie tini,
kie ti wejiŋge nyjii mu na,
a wa ti nyifɛɛrɛ mu gbo.
18 Waŋgra ŋga na Nyiɛkpɔɔ kɛ n wa kre,
kee nyjɛ pe ta pe pini.
A ndro ŋmba u lii Nyiɛkpɔɔ mbra na,
wre wo yi dwamu.
19 Ma jaa sumifun fraka
paaranyinaa chiin ni,
we jaa mu kee kre loo,
la, wa ndie tɛɛ ki na.
20 Jijuo wa na dankna ni,
mu wɛ ndro ŋmba wraa kee jawa,
mbe chiin paara na.
21 Na mu mu sumifun kaan
yira ŋga u chaa kro u bimi kre,
we kɔɔ pan na yɛjeere ni.
22 Ndro ŋmba krɔ kraa mu mu kun kre,
u paan na kakrɔ na kala ni.
23 Yɛkpɔɔmu tii mbe lewo to,
la, na mu muyɛ nyjii,
ndro kro we mu ŋga buuro.
24 Ndro ŋmba u yiri juo pan kre
u uyɛ klai,
hali na u da na we kpra yo
wa jaa ki yo.
25 Na mu chaa mbe leele kro
yiɛshɔ mu na kee kro na,
ki n nyu
la, na mu dankna o Tafun Nyiɛkpɔɔ na,
kena mu kɔ.
26 Ndro kro chaa mbe ŋunu yiɛ nyi,
la, o Tafun Nyiɛkpɔɔ u kpra titi kuun.
27 Lewo ŋmba u fraka kre,
sisam pefun fun,
a pan chɔɔ sisampefun
ŋmba u fraka wre fun.